Si Jesu-Cristo—Siisay Sia?

“DAWA an dakol na bakong Kristiano naniniwala na Sia dakula asin madonong na paratokdo. Sia saro nanggad sa pinakamaimpluwensiang tawo na nabuhay kasuarin man.” (The World Book Encyclopedia) Siisay “Sia”? Si Jesu-Cristo, an kagtugdas nin Kristianismo. Aram daw nindo kun siisay sia? Sia daw nakaaapektar sa saindong buhay sa ano man na paagi?

An mga pangyayari sa ministeryo ni Jesus nasusurat sa Biblia sa apat na historikong libro na inaapod na mga Ebanghelyo. Gurano katunay kan mga pagkasaysay na ini? Pakaanalisara kan mga iyan, an midbid na marhay na historyador na si Will Durant nagsurat: “Na an pira sanang simpleng tawo nakaimbento sa laog nin sarong kapag-arakian nin sarong mapuersa asin nakaaakit nanggad na personalidad, nin halangkawon na etika asin nakaiinspirar na gayong ideya nin pagkanitugang nin mga tawo, magigin sarong milagro na orog nanggad na masakit paniwalaan kisa sa arin man na nasusurat sa mga Ebanghelyo.”

Pero, para sa minilyon na tawo sa Oriente asin sa iba pa, si Jesu-Cristo tawong dai midbid. Tibaad naniniwala sinda na sia nabuhay, alagad dai ninda hinohona na sia may ano man na koneksion sa saindang buhay. An iba ibinibilang si Jesus na dai maninigo sa atension huli sa ginibo kan mga naghihingakong parasunod nia. ‘Hinologan ninda nin bomba atomika an Nagasaki,’ an sasabihon kan nagkapira sa Hapon, ‘siudad na mas dakol an Kristiano kisa sa kadaklan na siudad sa Hapon.’

Pero, ibabasol daw nindo sa doktor an helang nin sarong pasyente kun dai sinunod kan pasyente an reseta kan doktor? Siempre dai. An mga nasa Kakristianohan haloy nang dai iniintindi an preskripsion ni Jesus para sa pakapanlaban sa saindang mga problema sa aroaldaw. Kaya imbes na haboan si Jesus huli sa mga Kristiano daa, na dai nagsusunod sa saiyang  mga instruksion, taano ta dai kamo mag-adal mismo manongod sa saiya? Siyasaton nindo an Biblia, asin helingon kun siisay man nanggad si Jesus asin kun paano ngani nia mababago an saindong buhay.

Pagkamoot​—An Saiyang Preskripsion

Si Jesu-Cristo dakulang paratokdo na nabuhay sa Palestina haros 2,000 na taon na an nakaagi. Kakadikit kan aram manongod sa saiyang pagkaniaki. (Mateo, kapitulo 1 asin 2; Lucas, kapitulo 1 asin 2) Kan sia mag-30 anyos, pinonan ni Jesus an saiyang ministeryo tanganing “magpatotoo sa katotoohan.” (Juan 18:37; Lucas 3:​21-​23) An apat na historikong parasaysay kan nagin buhay ni Jesus nagkonsentrar sa saiyang pampublikong ministeryo, an huring tolo may kabangang taon kan saiyang temporaryong pag-istar digdi sa daga.

Durante kan saiyang ministeryo, si Jesus nagtao sa saiyang mga disipulo kan pinakasolusyon sa pag-atubang sa manlaenlaen na problema sa saindang buhay. Ano an pinakasolusyon na iyan? Iyan an pagkamoot. Sa saro kan pinakamidbid na sermon sa kasaysayan, na inaapod na Sermon sa Bukid, tinokdoan ni Jesus an saiyang mga disipulo kun paano ipaheheling an pagkamoot sa kapwa. Sabi nia: “Kun siring, an gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) An prinsipyong ini inaapod na Bulawan na Reglamento sa Paggawe. Kaiba sa “mga tawo” na sinasabi digdi ni Jesus pati an mga kaiwal nin saro. Sa sermon man sanang iyan, sinabi nia: “Padagos na kamotan an saindong mga kaiwal asin ipamibi idtong mga naglalamag sa saindo.” (Mateo 5:44) Bako daw na an siring na pagkamoot makareresolber sa dakol kan problemang inaatubang niato  ngonyan? Iyan an paghona kan namomoon na Hindu na si Mohandas Gandhi. Kinokotar sia na nagsasabi: “Kun [kita] magkaoyon na sa mga katokdoan na isinabi ni Cristo sa Sermon sa Bukid na ini, mareresolberan na niato an mga problema . . . kan bilog na kinaban.” An mga katokdoan ni Jesus manongod sa pagkamoot, kun iaaplikar, makareresolber sa mga kasakitan kan katawohan.

An Saiyang Pagkamoot na Ginigibo

Ginibo ni Jesus an saiyang itinokdo. Inenot nia an intereses nin iba kisa sa sadiri nia asin ipinaheling an pagkamoot na ginigibo. Sarong aldaw, si Jesus asin an saiyang mga disipulo naglilingkod sa dakol na tawo, na dai na nagpondo tanganing makakakan. Naheling ni Jesus an pangangaipo na an saiyang mga disipulo ‘magpahingalo nin kadikit,’ kaya nagduman sinda sa sarong puerang lugar. Alagad naenot na sa sainda an sarong kadaklan asin naghahalat na sa saindang pag-abot. Ano an magigin reaksion nindo kun kamo an nasa lugar ni Jesus? Bueno, si Jesus “napahiro nin pagkaherak sa sainda” asin “nagpoon na magtokdo sa sainda nin balakid na bagay.” (Marcos 6:​30-34) An makosog na pagkaherak na ini nagpahiro sa saiya na mag-opresir nin tabang sa iba.

An ginibo ni Jesus para sa kapakinabangan nin iba bako sanang espirituwal na pagtotokdo. Sia nagtao man nin praktikal na tabang. Halimbawa, pinakakan nia an 5,000 na kalalakihan (apuera sa mga babae saka aki) na sarong aldaw naghinanyog sa saiya sagkod na banggi na. Pinakakan nia an 4,000 pa sa mas huring pangyayari. Sa naenot na pangyayari, ginamit nia an limang tinapay saka duwang sira asin, sa huri, pitong tinapay saka pira sanang saradit na sira. (Mateo 14:​14-​21; 15:​32-​38; Marcos 6:​35-​44; 8:​1-9) Milagro? Iyo, sia paramilagro.

 Si Jesus nagpaomay man sa dakol na may helang. Pinaomayan nia an mga buta, pilay, leproso, asin bongog. Tara, binuhay pa ngani nia liwat an mga gadan! (Lucas 7:​22; Juan 11:​30-​45) Sarong beses, nakimaherak sa saiya an sarong leproso: “Kun boot mo sana, mapalilinig mo ako.” Ano an reaksion ni Jesus? “Inunat nia an saiyang takyag asin dinootan sia, asin sinabi sa saiya: ‘Boot ko. Luminig ka.’” (Marcos 1:​40, 41) Si Jesus pinahiro nin makosog na kamawotan na tabangan sinda. Paagi sa siring na mga milagro, ipinaheling nia an saiyang pagkamoot sa mga nagsasakit nin makuri.

Masakit paniwalaan? Alagad ginibo ni Jesus an kadaklan niang milagro na hayag sa gabos. Dawa an mga kontra sa saiya, na nagprobar na hanapan sia nin sala sa lambang okasyon, dai makanegar sa bagay na sia nagmilagro. (Juan 9:​1-​34) Apuera kaiyan, may katuyohan an saiyang mga milagro. An mga iyan nakatabang sa mga tawo na mamidbid si Jesus bilang an saro na isinugo nin Dios.​—Juan 6:​14.

An halipot sanang pag-estudyar sa mga katokdoan ni Jesus asin sa saiyang nagin buhay nagpangyari na sia mapamahal sa sato asin nagpapahiro sa sato na magmawot na arogon an saiyang pagkamoot. Pero, bako sana iyan an paagi na si Jesus puedeng makaapektar sa saindong buhay. Sia bako sanang dakulang paratokdo na nagtokdo nin pagkamoot. Sinabi nia na sia nagkaigwa nin buhay bago nagin tawo bilang an bugtong na Aki nin Dios. (Juan 1:​14; 3:​16; 8:​58; 17:5; 1 Juan 4:9) Igwa man sia nin buhay pagkatapos magin tawo, na nagpapangyari na sia magin orog pang mahalaga sa saindo. Sinasabi kan Biblia na si Jesus binuhay liwat asin ngonyan natutukaw sa trono bilang Hade sa Kahadean nin Dios. (Kapahayagan 11:15) Sinabi ni Jesus: “Ini nangangahulogan nin buhay na daing  katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3; 20:31) Tunay nanggad, an paglaog sa isip nin kaaraman dapit ki Jesu-Cristo puedeng mangahulogan nin buhay na daing katapusan sa Paraiso! Paano iyan mangyayari? Taano ta dai mag-adal nin orog pa manongod ki Jesus asin helingon kun paano kita “itinutulod . . . kan pagkamoot na yaon sa Cristo” na arogon sia? (2 Corinto 5:14) An Mga Saksi ni Jehova maoogmang tumabang sa saindo.​—Juan 13:​34, 35.

Laen sana kun may ibang tanda, an mga kotasyon sa Biblia trinadusir hale sa Ingles na New World Translation of the Holy Scriptures.