Siisay an Tunay na Namomoon sa Kinaban?

An isisimbag nin dakol na tawo sa hapot na nasa itaas saro sanang termino​—Dios. Alagad ta makahulogan na marhay, daing sinasabi an Biblia na magsalang si Jesu-Cristo o an saiyang Ama an tunay na mga poon sa kinaban. Al kontraryo, si Jesus nagsabi: “Iaapon an poon kan kinaban na ini.” Asin idinugang nia: “An poon kan kinaban madatong. Asin mayo siang kapangyarihan sa sako.”​—Juan 12:31; 14:30; 16:11.

Kaya an poon kan kinaban na ini tumang ki Jesus. Siisay daw ini?

Sarong Tanda Hale sa mga Kamugtakan sa Kinaban

Sa ibong kan mga paghihingoa nin mga tawong marahay an intension, grabe an pagsakit kan kinaban sa bilog na kasaysayan. Huli kaini nag-iisip-isip an mapaghorophorop na mga tawo, arog kan dating parasurat nin editoryal na si David Lawrence: “‘Katoninongan sa daga’​—haros gabos gusto kaiyan. ‘Marahay na boot sa gabos na tawo’​—haros gabos na tawo sa kinaban nakamamate kaiyan para sa lambang saro. Kun siring ano an diperensia? Taano ta namemeligro an guerra sa ibong kan kanaturalan na mga pagmawot nin mga tawo?”

Garo iyan masakit paniwalaan pero totoo, ano? Mantang an kanaturalan na pagmawot nin mga tawo mabuhay na may katoninongan, sa kadaklan sinda nagkakainongisan asin naggagaradanan​—asin sa maringison na paagi pati. Horophoropa an daing herak na mga pagpalabilabi sa grabeng karingisan. Ginamit nin mga tawo an mga kuwarto na duman ginagadan an mga bilanggo paagi sa nakaiilong gas, kampo de konsentrasyon, flamethrower, bombang napalm, asin iba pang makababaldeng mga paagi sa pagpadusa asin paggaradanan nin daing herak.

Nagtutubod daw kamo na an mga tawo, na nagmamawot nin katoninongan asin kaogmahan, kayang gibohon, sa sainda sanang sadiri, an siring kagrabeng karatan tumang sa iba? Anong mga  puwersa an nagtutulod sa mga tawo sa siring kamakababaldeng mga gibo o minamaniobra sinda sa mga kamugtakan na dian napipiritan sindang gumibo nin kabikoan? Naisip-isip na daw nindo kun baga may maraot, dai naheheling na puwersa na nag-iimpluwensia sa mga tawo na gumibo nin siring na mga akto nin kadahasan?

Ipinamimidbid an mga Poon kan Kinaban

Dai kaipuhan na toodan an bagay, ta malinaw na ipinaheheling kan Biblia na an sarong intelihente, dai naheheling na persona pinamomogolan kapwa an mga tawo asin nasyon. Iyan nagsasabi: “An bilog na kinaban namumugtak sa kapangyarihan kan maraot.” Asin ipinamimidbid sia kan Biblia, na sinasabi: “An inaapod Diablo asin Satanas . . . nandadaya sa bilog na ineerokan na daga.”​—1 Juan 5:19; Kapahayagan 12:9.

Sarong beses kan si Jesus ‘sugotan kan Diablo,’ dai pinagdudahan ni Jesus an katongdan ni Satanas bilang poon kan kinaban na ini. Ipinaliliwanag kan Biblia an nangyari: “Dinara sia kan Diablo sa sarong halangkawon na bukid, asin ipinaheling sa saiya an gabos na kahadean kan kinaban asin an kamurawayan kan mga iyan, asin sia nagsabi sa saiya: ‘Ini gabos itatao ko sa saimo kun ika lumohod asin gumibo nin sarong akto nin pagsamba sa sako.’ Dangan si Jesus nagsabi sa saiya: ‘Humale ka, Satanas!’”​—Mateo 4:​1, 8-10.

Isip-isipa ini. Sinugotan ni Satanas si Jesus paagi sa pag-opresir sa saiya kan “gabos na kahadean kan kinaban.” Pero, magigin tunay daw na sugot an opresir ni Satanas kun si Satanas bakong iyo an tunay na poon kan mga kahadean na ini? Dai. Asin mangnoha, dai dineharan ni Jesus na an gabos na kinabanon na gobyernong ini ki Satanas, na ginibo nia kutana kun si Satanas mayong kapangyarihan dian. Kun siring, si Satanas na Diablo an talagang dai naheheling na poon kan kinaban! An totoo, inaapod sia kan Biblia na “dios kan palakaw na ini nin mga bagay.” (2 Corinto 4:4) Pero, paano nagkaigwa nin makapangyarihan na katongdan an siring karaot na persona?

An sarong nagin Satanas dating anghel na linalang nin Dios, alagad ta nauri sia sa kamugtakan nin Dios. Inangat nia an may diretsong paghade nin Dios. Sa katuyohan na ini ginamit nia an sarong halas bilang parataram tanganing madaya an enot na babae,  si Eva, asin sa siring nahimong an kabotan nia an gibohon kan babae asin kan saiyang agom, si Adan, imbes na kumuyog sa Dios. (Genesis 3:​1-6; 2 Corinto 11:3) Hiningako man nia na kaya niang patalikodon sa Dios an gabos na dai pa namumundag na aki ni Adan asin Eva. Kaya an Dios nagtao nin panahon tanganing patunayan ni Satanas an saiyang paghihingako, alagad ta daing naginibo si Satanas.​—Job 1:​6-12; 2:​1-10.

Makahulogan nanggad, si Satanas dai nagsosolo sa saiyang pamomoon sa kinaban. Nahimo niang kombensiron an nagkapira sa ibang anghel na umiba sa saiya sa pagrebelde tumang sa Dios. An mga ini nagin mga demonyo, an mga kasapakat niang espiritu. An Biblia nagtataram manongod sa sainda sa pagsadol kaiyan sa mga Kristiano: ‘Kamo marigon na manindogan tumang  sa mga pakana kan Diablo; huli ta kita nakikipaglaban, bakong tumang sa dugo asin laman, kundi . . . tumang sa mga poon kan kinaban sa kadikloman na ini, tumang sa maraot na espiritung mga puwersa sa langitnon na mga lugar.’​—Efeso 6:​11, 12.

Labanan an Maraot na mga Espiritu

An dai naheheling, maraot na mga poon na ini sa kinaban determinadong dayaon an gabos na tawo, na pinatatalikod sinda sa pagsamba sa Dios. An sarong paagi na ginigibo ini nin maraot na mga espiritu iyo an pagpalakop sa ideya nin pagdadanay na buhay pagkagadan, minsan malinaw na ipinaheheling kan Tataramon nin Dios na an mga gadan daing pag-aram. (Genesis 2:17; 3:19; Ezequiel 18:4; Salmo 146:​3, 4; Eclesiastes 9:​5, 10) Kaya, an sarong maraot na espiritu, na inaarog an boses kan nagadan, puwedeng kaolayon an buhay na mga paryentes o katood kan nagadan, magsalang paagi sa patagolainan o sa “boses” hale sa lugar nin mga espiritu. An “boses” nagsasagin an nagadan, pero an totoo iyan demonyo!

Kaya kun may nadangog kamong “boses,” dai kamo padaya. Sayumahan an ano man na sinasabi kaiyan, asin isabi an mga tataramon ni Jesus: “Humale ka, Satanas!” (Mateo 4:​10; Santiago 4:7) Dai togotan na an pag-usyoso nindo sa lugar nin mga espiritu magpangyari saindo na mapalabot sa maraot na mga espiritu. An pakikilabot na iyan inaapod na espiritismo, asin an Dios nagpapatanid sa saiyang mga parasamba tumang dian sa gabos na porma kaiyan. Kinokondenar kan Biblia an “siisay man na minagamit nin pagtoodtood . . . o siisay man na nakihuhumapot sa patagolainan o parahula o siisay man na nakihuhumapot sa gadan.”​—Deuteronomio 18:​10-12; Galacia 5:​19-21; Kapahayagan 21:8.

Mantang an sarong tawo ipinaiirarom nin espiritismo sa impluwensia kan mga demonyo, labanan an gabos na gibo kaiyan minsan pa gurano iyan kanakaaaling, o makaoogma. Kabale sa mga gibong ini an pagheling sa bolang kristal, paggamit nin Ouija board, ESP, pagheling sa mga linya sa kamot (panhihimalad), asin astrolohiya. An mga demonyo nagpangyari nin mga ribok asin iba pang pisikal na mga pangyayari sa mga harong na ginigibo nindang teritoryo.

Dugang pa, kinakapital nin maraot na mga espiritu an pagigin makasalan nin mga tawo paagi sa pagpalakop nin mga babasahon, pelikula, asin programa sa telebisyon na nagtatampok nin inmoral  asin bakong natural na mga gawe sa sekso. Aram kan mga demonyo na an salang mga kaisipan kun dai hahaleon sa isip matatanom na dian asin madara sa mga tawo na gumawe nin inmoral​—arog kan mga demonyo mismo.​—Genesis 6:​1, 2; 1 Tesalonica 4:​3-8; Judas 6.

Totoo, dakol an pinagtutuya an ideya na an kinaban na ini pinamamahalaan nin maraot na mga espiritu. Pero bakong makangangalas an dai ninda paniniwala, ta an Biblia nagsasabi: “Si Satanas nagmamalemale na anghel nin liwanag.” (2 Corinto 11:14) An pinakatuso niang pandadaya iyo an pagbuta sa dakol dapit sa bagay na sia asin an saiyang mga demonyo talagang nag-eeksister. Alagad ta dai kamo padaya! An Diablo asin an saiyang mga demonyo tunay, asin kaipuhan na padagos nindo sindang labanan.​—1 Pedro 5:​8, 9.

Makaoogma, harani na an panahon na si Satanas asin an saiyang mga kampon mawawara na! “An kinaban [pati an mga demonyong poon kaiyan] maagi sana,” an iginagarantiya kan Biblia, “alagad an naggigibo kan kabotan nin Dios magdadanay sagkod lamang.” (1 Juan 2:17) Kanigoan na kaginhawahan na mahale an maraot na impluwensiang iyan! Kun siring, mapabilang logod kita sa mga naggigibo kan kabotan nin Dios asin magkakamit nin buhay na daing sagkod sa matanos na bagong kinaban nin Dios.​—Salmo 37:​9-11, 29; 2 Pedro 3:13; Kapahayagan 21:​3, 4.

Apuwera sana kun may ibang indikasyon, an gabos na kotasyon sa Biblia hale sa New World Translation of the Holy Scriptures.

[Ritrato sa pahina 4]

Ikaoopresir daw ni Satanas ki Jesus an gabos na gobyernong ini sa kinaban kun an mga iyan bakong saiya?