PAURUUTRONG iinaagid ni Jehova an saiyang sadiri sa arog kaiyan na pastor. Sa saiyang Tataramon, sinisigurado niya sa sato na “hahanapon” niya mismo an saiyang mga karnero asin aatamanon niya sinda.—Ezequiel 34:11, 12.

Siisay an mga karnero ni Jehova? Sinda an mga tawo na namumuot asin nagsasamba sa saiya. Sinasabi kan Bibliya: ‘Madya, magsamba asin magluhod kita; magruluhod kita sa atubangan ni Jehova na satuyang Kaglalang. Huli ta siya an satuyang Diyos, asin kita an banwaan na saiyang rugaring, an saiyang mga karnero.’ (Salmo 95:6, 7) Arog nin literal na karnero na nagsusunod sa pastor, gustong-gusto kan mga nagsasamba ki Jehova na magsunod sa saindang Pastor. Buot sabihon daw kaiyan dai na sinda nakakagibo nin sala? Iyo man. An mga lingkod nin Diyos, kun beses, nagigin garo ‘mga karnerong nagkawararak’ asin ‘nalalagalag.’ (Ezequiel 34:12; Mateo 15:24; 1 Pedro 2:25) Pero dawa pa an saro maparayo, dai siya binabayaan  ni Jehova na garo dai nang paglaom na magbago.

Namamatian mo daw na si Jehova pa man giraray an saimong Pastor? Paano niya pinapatunayan ngunyan an pagigin Pastor? Pag-isipan an tulong paagi:

Pinapakakan niya kita sa espirituwal. ‘Sa marahay na pasabsaban papasabsabon ko sinda,’ an sabi ni Jehova. ‘Maturog sinda sa marahay na sirungan asin papasabsabon sa mahihibog na sabsaban.’ (Ezequiel 34:14) Dai nuarin man nagkulang si Jehova sa pagtao sa sato nin lain-lain asin nakakarepreskong espirituwal na kakanon sa tamang panahon. May naiisip ka daw na artikulo, pahayag, o video na nagin simbag sa pamibi mo? Dai daw iyan nakakumbinsir sa saimo na si Jehova personal na nagmamakulog sa saimo?

Pinoprotektaran asin sinusuportaran niya kita. Nanunuga si Jehova: ‘Hahanapon ko an nawawara, bubugkusan ko an nabarian, asin papakusugon an naghihilang.’ (Ezequiel 34:16) Pinapakusog niya an mga nangluluya o nagagabatan huli sa mga kahaditan. Binebendahan niya an saiyang mga karnero tanganing tabangan sindang maumayan kun sinda nakulgan—tibaad nin sarong kapagtubod pa. Asin ibinabalik niya an mga naparayo asin tibaad may pinaglalabanan na negatibong sabuot.

Para ki Jehova, paninimbagan niya kita. ‘Ililigtas ko sinda sa gabos na lugar na nagkawararakan ninda,’ an sabi ni Jehova. ‘Hahanapon ko an nawawara.’ (Ezequiel 34:12, 16) Para ki Jehova, an nawawarang karnero bakong saro na dai nang paglaom. Aram niya kun may nawawarang karnero. Hinahanap niya iyan, asin nauugma siya pag nanunumpungan niya iyan. (Mateo 18:12-14) Kun sa bagay, inaapod niya an mga nagsasamba sa saiya na ‘sakuyang mga karnero.’ (Ezequiel 34:31) Saro ka sa mga karnerong iyan.

Taano ta hinahanap ka ni Jehova saka inaagdang bumalik sa saiya? Huling gusto niya na magin maugma ka. Nanunuga siya na an mga bendisyon ipapabulos niyang garo uran sa mga karnero niya. (Ezequiel 34:26) Totoo an panugang iyan. Napatunayan mo na mismo iyan.

Girumduma kaidtong mamidbid mo si Jehova. Ano an namatian mo kan inot mong manudan an nakakapukaw sa buot na mga katotoohan dapit sa ngaran nin Diyos asin sa saiyang katuyuhan para sa mga tawo? Nagigirumduman mo daw kun gurano kaugma na makaiba an mga kapwa Kristiyano sa mga asembleya asin kumbensiyon? Kan maihulit mo an maugmang bareta sa sarong interesado, bako daw na nagpuli kang maugma asin kontentong marhay?

Puwede mong mamatian giraray an kaugmahan na iyan. ‘Ibalik mo kami sa saimo, O Jehova,’ an pamibi kan mga lingkod nin Diyos kan suanoy, ‘asin ta mabalik kami. Baguha an samuyang mga aldaw na siring kan inot.’ (Lamentacion 5:21) Sinimbag ni Jehova an pamibing iyan kan mga lingkod niya. Nagbalik sinda asin maugma giraray na naglingkod sa saiya. (Nehemias 8:17) Arog man kaiyan an gigibuhon ni Jehova para sa saimo.

Pero sa totoo, an pagbalik ki Jehova mas madaling sabihon kisa gibuhon. Pag-isipan an nagkapirang kadipisilan sa pagbalik asin kun paano mo iyan mapapangganahan.