GABOS nakakaeksperyensiya nin kahaditan—dawa an mga lingkod nin Diyos. “Duminakul an sakuyang mga ikinakahadit,” an sabi kan salmista. (Salmo 94:19, NW) Asin sinabi ni Jesus na sa panahon kan katapusan, mas magigin masakit maglingkod ki Jehova huli sa mga ‘kahaditan sa buhay.’ (Lucas 21:34) Kumusta ka man? Nasasakitan ka daw huli sa mga problema sa pinansiyal, sa pamilya, o sa salud? Paano ka matatabangan ni Jehova na makaya iyan?

Dai ta makakaya an mga kahaditan kun kita sana. ‘Nagigipit kita sa gabos na paagi,’ an isinurat ni apostol Pablo. ‘Nariribaraw kita . . . ; ilinalampog kita.’ Pero sinabi man niya na ‘dai kita napipiutan na dai na makahiro,’ ‘bako kitang dai na talaga nin maluluwasan,’ asin ‘dai kita nalalaglag.’ Ano an nakakatabang sa sato na makatagal? An “puwersa na labi sa ordinaryo”—puwersa na hali sa satong makakamhan sa gabos na Diyos, si Jehova.—2 Corinto 4:7-9, NW.

Isip-isipon kun paano ka kaidto nag-ako nin “puwersa na labi sa ordinaryo.” Nagigirumduman mo daw kun paanong an sarong nakakapakusog na pahayag nagpararom kan pagpapahalaga mo sa maimbod na pagkamuot ni Jehova? Mas nagkusog daw an pagtubod mo sa mga panuga ni Jehova kan itinukdo mo sa iba an paglaom dapit sa Paraiso? Pag nag-aatender kita sa Kristiyanong mga pagtiripon asin sinasabi sa iba an dapit sa pagtubod ta, nagkakaigwa kita nin kusog tanganing matagalan an mga kahaditan asin nin tuninong na isip tanganing maugmang mapaglingkudan si Jehova.

Totoo, tibaad dai mo aram kun ano an gigibuhon. Halimbawa, hinahagad sa sato ni Jehova na inuton nguna an Kahadian asin pagdanayon an marahay na rutina nin espirituwal na aktibidad. (Mateo 6:33; Lucas 13:24) Pero, paano kun nauulang ka huli sa pagkontra, maluyang salud, o problema sa pamilya? O paano kun nakukua kan saimong trabaho an oras asin kusog mo na para kutana sa kongregasyon? Huling dakulon an dapat gibuhon—asin kadikiton an panahon saka kusog tanganing maasikaso an mga iyan—tibaad isipon mong dai mo na kaya. Tibaad isipon mo pa ngani na dakulaon an hinahagad sa saimo ni Jehova.

Mapagsabot si Jehova. Dai siya nuarin man naghahagad sa sato nin sobra sa makakaya ta. Asin aram niya na kaipuhan nin panahon tanganing makabawi kita sa pangluluya sa pisikal asin emosyonal.—Salmo 103:13, 14.

Bilang halimbawa, isip-isipon kun paano nagmalasakit si Jehova ki propeta Elias. Kan si Elias madisganar asin matakot nin grabe kun kaya duminulag siya pasiring sa kaawagan, sinagwi daw ni Jehova an propeta asin pinabalik sa asignasyon kaini? Dai. Duwang beses na nagsugo si Jehova nin anghel tanganing luway-luway na pukawon si  Elias asin tawan nin kakanon. Pero pakalihis nin 40 aldaw, hadit asin takuton pa man giraray si Elias. Paano pa siya tinabangan ni Jehova? Inot, ipinahiling niya na kaya niyang protektaran si Elias. Ikaduwa, rinanga niya si Elias paagi sa kalmado asin malumanay na boses. Ultimo, sinabi ni Jehova sa saiya na may rinibo pang iba na maimbod na nagsasamba sa Diyos. Dai nahaloy, nagin aktibo asin maigot na propeta giraray si Elias. (1 Hade 19:1-19) An leksiyon? Kan madaog si Elias nin kahaditan, si Jehova nagin mapasensiya asin mapagmalasakit sa saiya. Dai nagbabago si Jehova. Arog man kaiyan an pagmalasakit niya sa sato ngunyan.

Kun iniisip ta kun ano an maitatao ta ki Jehova, magin realistiko. Dai mo ipagkumparar an nagigibo mo ngunyan sa nagigibo mo kaidto. Sa pag-ilustrar: An sarong paradalagan na nagkapirang bulan o taon nang nagpundo sa pagsasanay dai tulos maibabalik an dati niyang rutina. Imbes, dikit-dikit niyang kinokondisyon an saiyang hawak tanganing magin makusog asin matagal. An mga Kristiyano garo mga paradalagan. Nagsasanay sinda na malinaw na isinasaisip an pasuhan. (1 Corinto 9:24-27) Taano ta dai nguna abuton an sarong espirituwal na pasuhan na sa hiling mo pinakamadaling abuton ngunyan? Halimbawa, puwede mong gibuhon na pasuhan an pag-atender sa pagtiripon sa kongregasyon. Mamibi ki Jehova na tabangan kang magibo iyan. Mantang nagkukusog giraray an saimong espirituwalidad, ‘mahihiling mo na marahayon si Jehova.’ (Salmo 34:8) Tandaan na an gabos na ginigibo mo tanganing ipahiling na namumutan mo si Jehova—gurano man iyan kasadit—mahalagang marhay sa saiya.—Lucas 21:1-4.

Paano pinakusog ni Jehova si June na bumalik sa saiya? Sabi niya: “Padagos akong namibi ki Jehova na tabangan ako. Dangan sinabi sako kan manugang kong babayi na may asembleya sa lugar mi. Nagdesisyon akong mag-atender nin sarong aldaw. Nakakaugmang makaibanan giraray an mga lingkod ni Jehova! An asembleyang iyan an pampakusog na haloy ko nang hinahalat. Ngunyan, maugma akong naglilingkod giraray ki Jehova. Mas makahulugan na an buhay ko. Urog sa gabos, nahiling kong kaipuhan ko talaga an mga tugang pati an tabang ninda. Maray na sana ta may panahon pa akong bumalik.”