Kun minsan, tibaad nagagabatan na kitang marhay dahil sa mga problema asin mga pagbalo na inaagihan niyato kaya napapagal na kita asin pagmati ta garo baga dai ta na kaya. Alagad, sa arog kaining mga sitwasyon, puwede kitang mapakusog kun huhurop-hurupon ta an buhay na buhay na paglaladawan sa bisyon ni Ezekiel manungod sa pagbabalik. Taano? Manunudan ta sa propesiyang ini na kun kaya kan makapangyarihan na Diyos na tawan nin buhay an mayong buhay na mga tulang, siguradong kaya niya man kitang tawan nin kusog na kaipuhan ta para mapangganahan an mga pagbalo—dawa pa garo baga imposible para sa mga tawo na mapangganahan iyan.—Basahon an Salmo 18:29; Fil. 4:13.

Magigirumduman ta na dakul na siglo bago kan panahon ni Ezekiel, sinabi ni propeta Moises na apuwera sa may kapangyarihan si Jehova, gusto niya man na gamiton an saiyang kusog alang-alang sa saiyang banwaan. Isinurat ni Moises: “Puon pa kan suanoy na mga panahon, an Diyos sarong pailihan, inaalalayan ka kan saiyang mga takyag na daing katapusan.” (Deu. 33:27) Iyo, makakasigurado kita na kun madulok kita sa Diyos sa mga panahon nin kasakitan, aalalayan kita kan mapagmakulog na mga takyag ni Jehova asin luway-luway kitang ibabangon sagkod na makatindog giraray kita.—Ezek. 37:10.