1, 2. (a) Anong pagpili an dapat tang gibuhon gabos? (b) Ano an nagin reaksiyon kan sarong maimbod na anghel kan may magpurbar na magsamba saiya?

 AN LAMBANG saro sato dapat na simbagon an sarong mahalagang hapot: Siisay an sasambahon ko? Dakul an tibaad magsabi na komplikado an hapot na ini asin nakakaribong an mga pagpipilian. Pero an totoo, malinaw asin simple an pagpipilian—magsalang sasambahon ta an Diyos na Jehova o si Satanas na Diyablo.

² Gustong-gusto ni Satanas na sambahon. Nagin risang-risa iyan kan tentaran niya si Jesus. Arog kan pinag-ulayan sa Kapitulo 1, may pambihirang iinalok si Satanas ki Jesus—an awtoridad sa gabos na kahadian sa daga. Pero ano an gusto kan Diyablo na karibay kaiyan? “Maggibo [ka] nin sarong pagsamba sa sako,” an sabi niya ki Jesus. (Mat. 4:9) Sa kabaliktaran, an anghel na nagpaabot kan kapahayagan ki apostol Juan nagsayumang sambahon. (Basahon an Kapahayagan 22:8, 9.) Kan purbaran ni Juan na sambahon an anghel, an mapakumbabang espiritung aki nin Diyos na iyan nagsabi: “Dai mo iyan paggibuhon!” Imbes na magsabing, ‘Sambahon mo ako,’ sinabi kan anghel, “Sambahon mo an Diyos.”

3. (a) Ano an katuyuhan kan publikasyon na ini? (b) Ano an pag-uulayan ta ngunyan?

³ An katuyuhan kan publikasyon na ini iyo na pakusugon an satong determinasyon na gibuhon an ipinagbuot kan anghel na idto—an Diyos na Jehova sana an sambahon. (Deu. 10:20; Mat. 4:10)  Repasuhon ta nin halipot an mga nanudan ta manungod sa dalisay na pagsamba sa mga propesiya asin bisyon ni Ezekiel. Dangan, sa tabang kan Kasuratan, hilingon ta an mga mangyayari sa maabot na panahon kun nuarin an lambang tawo sa daga mapapaatubang sa pangultimong pagbalo—sarong pagbalo na madeterminar kun siisay an mabubuhay asin makakahiling kan lubos na pagbabalik sa dalisay na pagsamba ki Jehova sagkod lamang.

4. Ano an tulong tema na idinuon sa libro nin Ezekiel?

⁴ Itinutukdo sa sato kan libro nin Ezekiel na an dalisay na pagsamba bako an basta pauruutrong paggibo sana nin mga bagay na may koneksiyon sa pagsamba. Nangangaipo iyan na (1) itao ta an satong eksklusibong debosyon ki Jehova, (2) magdanay na nagkakasararo sa malinig na pagsamba, asin (3) magpahiling nin pagkamuot sa iba. Pag-isipan kun paano itinatampok kan mga propesiya saka mga bisyon na tinukar sa publikasyon na ini an tulong temang iyan.

5-9. Ano an nanudan ta manungod sa pagtao ki Jehova nin eksklusibong debosyon?

⁵ Kapitulo 3: * An kahanga-hangang bisyon manungod ki Jehova na napapalibutan nin bulalangaw (rainbow) asin nasa ibabaw nin makapangyarihan na mga espiritung linalang nagtutukdo sa sato nin sarong mahalagang katotoohan—an Makakamhan sa Gabos sana an maninigo sa satong pagsamba.—Ezek. 1:4, 15-28.

⁶ Kapitulo 5: Nakakabigla nanggad na mahiling an bisyon kun paano rinaramugan an templo ni Jehova! Ipinapahiling kan bisyon na iyan na mayo nin maitatago ki Jehova. Nahihiling niya an bakong maimbod na mga gibo, arog kan magsamba sa mga idolo an saiyang banwaan, dawa pa kun an mga gibong iyan dai nahihiling kan mga tawo. Nakukulgan siya kaiyan, asin pinapadusahan niya an mga nagsasagibo kaiyan.—Ezek. 8:1-18.

⁷ Kapitulo 7: An mga paghukom na ipinahayag laban sa mga nakapalibot na nasyon na “grabe an . . . pagtuya-tuya” sa Israel nagpapatunay na pinapanimbag ni Jehova an mga nang-aapi sa saiyang banwaan. (Ezek. 25:6) Pero may nanudan man kitang saro pang leksiyon sa pakikiiba kan Israel sa mga nasyon na idto—dapat na panginot sa sato an kaimbudan ki Jehova kisa sa gabos na iba pang bagay. Dai lamang niyato ibababa an satong mga pamantayan para lang uyunan kan mga kapamilya na dai man nagsasamba ki Jehova. Dai man kita magtitiwala sa kayamanan o ikokompromiso an satong neutralidad paagi sa pagtao sa mga gobyerno nin tawo kan satong kaimbudan na maninigo sana ki Jehova.

⁸ Kapitulo 13 asin 14: An bisyon manungod sa templo na nasa ibabaw kan halangkawon na bukid nagtutukdo sa sato na dapat kitang mamuhay kauyon kan halangkaw na mga pamantayan ni Jehova, na nasasabutan na mas halangkaw siya kisa sa iba pang mga diyos.—Ezek. 40:1–48:35.

 ⁹ Kapitulo 15: An propetikong mga paglaladawan sa Israel asin Juda bilang mga hostes nagpapagirumdom sa sato na ikinakaungis na marhay ni Jehova an espirituwal na pagsambay.—Ezek., kap. 16, 23.

10-14. Paano idinuon an pangangaipo niyato na magdanay na nagkakasararo sa malinig na pagsamba?

¹⁰ Kapitulo 8: An mga propesiya na nangangako na matao si Jehova nin “sarong pastor” para pangatamanan an Saiyang banwaan nagduduon kan pangangaipo na maglingkod kitang nagkakasararo asin may katuninungan sa irarom kan panginginot ni Jesus.—Ezek. 34:23, 24; 37:24-28.

¹¹ Kapitulo 9: An mga propesiya ni Ezekiel manungod sa pagpatalingkas sa banwaan nin Diyos sa pagkabihag sa Babilonya asin sa pagbalik sa sainda sa sadiri nindang daga may mensahe para sa mga gustong mapaugma si Jehova ngunyan. An malinig na mga parasamba ni Jehova dapat na magin talingkas asin magdanay na talingkas sa nakakaating impluwensiya kan palsong relihiyon. Dawa hali sa manlain-lain na relihiyon, asin iba-iba an estado sa buhay saka lahi, dapat tang papagdanayon an pagkasararo na nakakatabang na mamidbid kita bilang an banwaan nin Diyos.—Ezek. 11:17, 18; 12:24; Juan 17:20-23.

¹² Kapitulo 10: An pagkasararo itinampok duman sa bisyon manungod sa alang na mga tulang na nagkaburuhay liwat. Dakulaon nanggad an pribilehiyo ta na magin kabilang sa ibinalik na grupo nin lininig na mga parasamba na nagtatarabangan bilang sarong hukbo!—Ezek. 37:1-14.

¹³ Kapitulo 12: An pagkasararo lalo pang idinuon sa propesiya manungod sa duwang pidaso nin kahoy na pinagsaro. Nakakapakusog nanggad sa pagtubod na mahiling na inuutob kan mga linahidan asin kan ibang mga karnero an propesiyang iyan! Dawa nabubuhay kita sa kinaban na nababanga huli sa relihiyon asin iriwal sa pulitika, nagdadanay kitang nagkakasararo dahil sa pagkamuot asin kaimbudan.—Ezek. 37:15-23.

¹⁴ Kapitulo 16: An bisyon manungod sa lalaki na may tintero asin sa mga lalaking may kapot na armas na pangrunot nagtatao nin seryosong patanid—durante kan “dakulang kasakitan,” an tunay na mga parasamba sana an mamarkahan para sa kaligtasan.—Mat. 24:21; Ezek. 9:1-11.

15-18. Taano ta dapat kitang padagos na magpahiling nin pagkamuot, asin paano ta iyan magigibo?

¹⁵ Kapitulo 4: An bisyon manungod sa apat na buhay na linalang nagtutukdo sato kan mga kuwalidad ni Jehova, na an pinakanangungurog iyo an pagkamuot. Pag nagpapahiling kita nin pagkamuot sa satong pagtaram asin paggawi, pinapatunayan ta na si Jehova an satong Diyos.—Ezek. 1:5-14; 1 Juan 4:8.

 ¹⁶ Kapitulo 6 asin 11: Huli sa pagkamuot, nagtalaga an Diyos nin mga bantay, arog ni Ezekiel. Dahil an Diyos pagkamuot, habo niya na an siisay man malaglag pag tinapos niya na an pamamahala ni Satanas sa daga. (2 Ped. 3:9) Igwa kita kan pribilehiyo na ipahiling an pagkamuot nin Diyos paagi sa pag-utob kan satong paninimbagan na suportaran an gibuhon kan presenteng panahon na bantay.—Ezek. 33:1-9.

¹⁷ Kapitulo 17 asin 18: Aram ni Jehova na dakul an dai mapahalaga sa saiyang pagkahirak, asin pupurbaran ninda na paraon an saiyang maimbod na mga parasamba. Papahiruon si Jehova nin pagkamuot na idepensa an saiyang banwaan pag inatake na ni “Gog kan daga nin Magog” an mga maimbod sa Saiya. Dahil sa pagkamuot ta sa satong kapwa, napapahiro kita na patanidan an pinakadakul na tawong posible manungod sa gigibuhon ni Jehova na paglaglag sa mga nang-aapi sa saiyang banwaan.—Ezek. 38:1–39:20; 2 Tes. 1:6, 7.

¹⁸ Kapitulo 19, 20, asin 21: An pagkamuot ni Jehova sa mga tawo risang-risa sa bisyon manungod sa salog na an tubig nagtataong-buhay asin sa bisyon manungod sa pagbanga-banga kan daga. Ilinadawan kan mga bisyon na iyan an mga resulta kan pinakadakulang kapahayagan kan pagkamuot ni Jehova, an pagtao kan buhay kan saiyang Aki tanganing magin posible an kapatawadan kan satong mga kasalan asin magkaigwa kita nin perpektong buhay bilang parte kan pamilya nin Diyos. Saro sa pinakamarahay na paagi na maipapahiling ta an satong pagkamuot sa mga tawo iyo an pagsabi sa sainda kan magayon na puturo na itinagama ni Jehova para sa mga igwa nin pagtubod sa saiyang Aki.—Ezek. 45:1-7; 47:1–48:35; Kap. 21:1-4; 22:17.

19. Ano an gigibuhon ni Jesus sa panahon kan Sangribong Taon na Paghadi? (Hilingon an kahon na “Pag-atubang sa Pangultimong Pagbalo.”)

¹⁹ Sa Sangribong Taon na Paghadi ni Jesus, binilyon an bubuhayon niya liwat asin hahalion niya an kulog na dara kan satong “kaiwal, an kagadanan.” (1 Cor. 15:26; Mar. 5:38-42; Gibo 24:15) An kasaysayan kan katawuhan nagin garo istorya nin trahedya na pano nin kamunduan asin kagadanan. Pero mantang binubuhay liwat an lambang henerasyon, paparaon ni Jesus an istoryang iyan nin trahedya asin tatawan nin pagkakataon an mga binuhay liwat na magsurat nin mas magayon na istorya. Basado sa atang na pantubos, hahalion niya an gabos na danyos na dara kan hilang, giyera, kamatian, asin tiggutom. Labi pa diyan, tatabangan niya kitang halion an pinakakawsa kan satong grabeng kamunduan—an kasalan na minana ta ki Adan. (Roma 5:18, 19) Biyo ni Jesus na ‘rarauton an mga gibo kan Diyablo.’ (1 Juan 3:8) Tapos ano an sunod na mangyayari?

20. Paano si Jesus saka an 144,000 mapahiling nin pambihirang kapakumbabaan? Ipaliwanag. (Hilingon an ritrato sa kapinunan kan kapitulo.)

²⁰ Basahon an 1 Corinto 15:24-28. Pag an gabos na tawo perpekto na, pag an daga nagi nang Paraiso arog kan orihinal na katuyuhan ni Jehova, si Jesus asin an saiyang 144,000 na kairibang tagapamahala mapahiling nin pambihirang kapakumbabaan; itatao ninda ki Jehova  an Kahadian. Gikan sa buot asin matuninong nindang bubutasan an awtoridad na kinaputan ninda sa laog nin sangribong taon. An gabos na naisagibo kan Kahadian magdadanay sagkod lamang.

21, 22. (a) Sa katapusan kan sangribong taon, ano na an magigin kamugtakan kan kinaban? (b) Taano ta bubutasan ni Jehova si Satanas saka an mga demonyo?

²¹ Dangan may pambihirang gigibuhon si Jehova, sarong bagay na nagpapahiling kan dakulang pagtitiwala niya sa saiyang mga sakop sa daga. Ipagbubuot niya na paluwason si Satanas saka an mga demonyo hali sa kairaruman kun sain sinda ikinulong sa laog nin sangribong taon. (Basahon an Kapahayagan 20:1-3.) An kinaban na mahihiling ninda magigin ibang-iba nanggad sa kinaban na dating aram ninda. Bago an Armagedon, ilinagalag ni Satanas an kadaklan sa katawuhan asin an mga tawo nagkakabaranga dahil sa pagkaungis saka pagpalain-lain. (Kap. 12:9) Pero sa katapusan kan sangribong taon, an gabos na tawo nagsasamba ki Jehova bilang sarong pamilya na nagkakasaro asin nagkakaminuruutan. An daga magigin nang matuninong na Paraiso.

 ²² Taano ta bubutasan ni Jehova sa malinig na dagang iyan an kriminal na arog ni Satanas saka kan mga demonyo? Huling sa katapusan kan sangribong taon, an kadaklan sa mga tawo duman dai pa lamang nabalo an saindang kaimbudan bilang parasamba ni Jehova. An kadaklan sa sainda nagadan na dai nakakamidbid ki Jehova asin binuhay na sana liwat sa Paraiso. Bako lang buhay an itinao sa sainda ni Jehova kundi pati man an gabos na pangangaipo ninda sa pisikal saka sa espirituwal. Dai sinda nakaeksperyensiya nin maraot na impluwensiya duman, huling marahay na mga tawo an kaiba-iba ninda. Napapalibutan sinda nin mga tawo na namumutan si Jehova asin naglilingkod sa saiya. Puwedeng iakusar ni Satanas sa mga binuhay liwat na ini an akusasyon niya ki Job—naglilingkod sana sinda sa Diyos dahil pinoprotektaran asin binebendisyunan Niya sinda. (Job 1:9, 10) Kaya bago permanenteng isurat ni Jehova an satong pangaran sa libro nin buhay, tatawan niya kita nin oportunidad na patunayan na talagang maimbod kita saiya bilang satong Ama asin Soberano.—Kap. 20:12, 15.

23. Sa anong isyu mapapaatubang an lambang indibidwal?

 ²³ Sa halipot na panahon, tatawan si Satanas nin pagkakataon na tentaran an katawuhan na magpundo sa paglilingkod sa Diyos. Ano daw an magigin pagbalong iyan? Siguradong mapapaatubang an lambang indibidwal sa parehong isyu na napaatubang ki Adan asin Eva—magsalang masunod sa mga pamantayan ni Jehova asin susuportaran an saiyang pamamahala saka sasambahon siya o marebelde sa Diyos asin susuportaran si Satanas.

24. Taano ta inapod na Gog asin Magog an mga marebelde?

²⁴ Basahon an Kapahayagan 20:7-10. Interesante na an mga marebelde pagkatapos kan sangribong taon inaapod na Gog asin Magog. An mga ugali ninda kapareho kan sa mga rebelde na iprinopesiya ni Ezekiel na maatake sa banwaan nin Diyos sa panahon kan dakulang kasakitan. An inot na grupong iyan, an “Gog kan daga nin Magog,” kompuwesto nin iba-ibang mga nasyon na nagkokontra sa pamamahala ni Jehova. (Ezek. 38:2) Kaagid kaiyan, an mga marebelde pagkatapos kan Sangribong Taon na Pamamahala ni Cristo inaapod man na “mga nasyon.” Interesante nanggad an paggamit kan terminong iyan. Taano? Huling sa Sangribong Taon na Paghadi, mawawara na an pagkabaranga huli sa pagkaigwa nin iba-ibang nasyon; an gabos na tawo magigin sakop nin saro sanang gobyerno, an Kahadian nin Diyos. Magigin kabilang kita sa sarong espirituwal na nasyon.  Kaya paagi sa pag-apod sa mga rebeldeng iyan na Gog asin Magog saka pagsambit na sinda “mga nasyon,” ipinaparisa kan propesiya na magigin mapanggana si Satanas sa saiyang paghihinguwang magkaigwa nin pagkabaranga sa nagkapira sa banwaan nin Diyos. Dai pipiriton an siisay man na kumampi ki Satanas. An lambang perpektong indibidwal an magibo nin sadiri niyang desisyon.

25, 26. Gurano kadakul an makampi ki Satanas, asin ano an mangyayari sainda?

²⁵ Gurano kadakul an makampi ki Satanas? An bilang kan mga marebelde magigin “siring kan baybay sa dagat.” An fraseng ini dai man nangangahulugan na kadaklan sa mga tawo marebelde. Paano ta iyan naaraman? Pag-isipan an ipinangako ki Abraham. Sinabi ni Jehova na an mga gikan ni Abraham magigin “arog sa mga baybay sa gilid kan dagat.” (Gen. 22:17, 18) Pero, 144,001 sanang indibidwal an bilang kan minakompuwesto sa saiyang gikan. (Gal. 3:16, 29) An bilang na iyan, dawa ngani dakula, sadit sanang porsiyon kan kabilugan na bilang kan katawuhan. Kaagid kaiyan, puwedeng dakul an magkampi ki Satanas, pero dai man iyan magigin dakulon na marhay. An mga rebelde dai magigin dakulang peligro sa maimbod na mga lingkod ni Jehova.

²⁶ An mga maiba sa pagrebelde tulos-tulos na paparaon. Kaiba ni Satanas saka kan mga demonyo, mawawara na sinda—na mayo  nin paglaom na mabuhay liwat. An magigirumduman na sana iyo an saindang salang mga desisyon asin an mga konsekwensiya kaiyan.—Kap. 20:10.

27-29. Anong mga bendisyon an aakuon kan mga makakapasar sa pangultimong pagbalo?

²⁷ Sa ibong na kampi, an pangaran kan mga makakapasar sa pangultimong pagbalo permanenteng isusurat sa “libro nin buhay.” (Kap. 20:15) Dangan, bilang nagkakasararong pamilya, an gabos na maimbod na aki ni Jehova magsasamba sa saiya sa paaging maninigo nanggad sa saiya.

²⁸ Imahinara an panahon na iyan. Magkakaigwa ka nin nakakaugmang trabaho asin marahay na mga amigo. Ika saka an saimong mga mahal sa buhay dai na giraray magsasakit. Bilang perpektong tawo, dai mo na kaipuhan an atang na pantubos para magkaigwa nin malinig na kamugtakan sa atubangan ni Jehova. Mayo nang ulang sa pakikipag-amigo kan lambang tawo sa Diyos. Asin an pinakaimportante sa gabos, sa langit saka sa daga, perpekto nang isinasagibo an dalisay na pagsamba. Iyan an lubos na pagbabalik kan dalisay na pagsamba!

²⁹ Yaon ka daw duman asin mahihiling mo daw an magayunon na panahon na iyan? Iyo, kun padagos mong iaaplikar an tulong panginot na leksiyon sa libro nin Ezekiel—itao ki Jehova an eksklusibong debosyon, magdanay na nagkakasararo sa malinig na pagsamba, asin magpahiling nin pagkamuot sa iba. An mga propesiya ni  Ezekiel nagtatao nin saro pang pangultimo asin mahalagang leksiyon. Ano iyan?

30, 31. Ano an magigin kahulugan kan deklarasyon na “mamimidbid nanggad ninda na ako si Jehova” para sa (a) mga kaiwal nin Diyos? (b) banwaan nin Diyos?

³⁰ Sa bilog na libro nin Ezekiel, pauruutrong sinambit an fraseng “mamimidbid nanggad ninda na ako si Jehova.” (Ezek. 6:10; 39:28) Para sa mga kaiwal nin Diyos, an deklarasyon na iyan mangangahulugan nin giyera asin kagadanan. Dai lang sinda mapipiritan na midbidon na nag-eeksister si Jehova. Maaaraman man ninda sa makulog na paagi an kahulugan kan saiyang dakulang pangaran—“Pinangyayari Niyang Magin.” Si “Jehova na pamayo nin mga hukbo” magigin “sarong makapangyarihan na parapakilaban” na makikipaglaban sa sainda. (1 Sam. 17:45; Exo. 15:3) Huri na an gabos, masasabutan ninda an mahalagang katotoohan manungod ki Jehova: Mayong makakapugol sa saiya sa pag-utob kan saiyang katuyuhan.

³¹ Para sa banwaan nin Diyos, an deklarasyon na “mamimidbid nanggad ninda na ako si Jehova” mangangahulugan nin katuninungan asin buhay. Papangyarihon ni Jehova an saiyang orihinal na katuyuhan para sa sato—na kita magin saiyang mga aki na perpektong ipinapahiling an mga kuwalidad niya. (Gen. 1:26) Ngunyan pa sana, si Jehova saro nang mamumuton na Ama asin Pastor na nagpoprotektar sa sato. Sa dai na mahahaloy, magigi siyang nandadaog na Hadi. Bago mangyari iyan, isapuso ta an mensahe ni Ezekiel. Sa kada aldaw, patunayan niyato paagi sa satong tataramon asin gibo na midbid ta si Jehova asin na aram ta kun anong klase siyang Diyos. Dangan, pag binutasan na an mapanglaglag na duros kan dakulang kasakitan, dai kita matatakot. Sa kabaliktaran, iiitaas ta an satong payo huling aram ta na an pagliligtas sa sato harani na. (Luc. 21:28) Sa ngunyan, lugod na tabangan ta an mga tawo sain man na lugar na mamidbid asin mamutan an solamenteng Diyos na maninigong sambahon, an Saro na igwa kan pinakanangungurog na pangaran—si Jehova.—Ezek. 28:26.