Sumaryo kan mga Paglilinaw
Sa nag-aging mga taon, An Torrengbantayan nagpaluwas nin mga paglilinaw manungod sa satong pakasabot sa nagkapirang parte kan propesiya ni Ezekiel. Asin sa publikasyon na ini, na Dalisay na Pagsamba ki Jehova—Ibinalik Na!, mababasa an dugang pang mga paglilinaw. Purbaran kun masisimbag mo an minasunod na mga hapot.
Ano an irinerepresentar kan apat na lalawgon kan mga buhay na linalang?
Dating pakasabot: An kada saro sa apat na lalawgon kan mga buhay na linalang, o kerubin, nagrerepresentar sa saro sa apat na panginot na kuwalidad ni Jehova.
Paglilinaw: Bagaman an kada saro sa apat na lalawgon kan mga buhay na linalang nagrerepresentar sa saro sa apat na panginot na kuwalidad ni Jehova, pag hiniling sa kabilugan, an apat na lalawgon nagrerepresentar sa gabos na kuwalidad niya. Idinuduon man sa sato kan apat na lalawgon an nakakalabing marhay na kapangyarihan asin kamurawayan ni Jehova.
Basehan kan pagbabago: Sa Tataramon nin Diyos, parating ginagamit an bilang na apat tanganing iparisa an pagigin kumpleto, o sakop an gabos. Kaya, pag an apat na lalawgon hiniling sa kabilugan, bako sana basta apat na kuwalidad an irinerepresentar kaiyan—an mga iyan an pinakapundasyon kan kahanga-hangang personalidad ni Jehova. Siring man, mga lalawgon iyan nin mga linalang na nagrerepresentar sa kamahalan, kusog, asin kapangyarihan. Pero, an apat na makapangyarihan na linalang, na ilinaladawan kan apat na lalawgon kan lambang kerubin, nasa irarom kan trono ni Jehova. Idinuduon kan paglaladawan na iyan na si Jehova an Kahuruhalangkawing Tagapamahala sa gabos.
Kiisay nagrerepresentar an lalaki na may tintero nin sekretaryo?
Dating pakasabot: An lalaki na may tintero nagrerepresentar sa linahidan na mga natatada. Paagi sa gibuhon na paghuhulit asin paggibo nin disipulo, an mga linahidan nagbubugtak ngunyan nin simbolikong marka sa angog kan mga nagigin kabilang sa “dakulang kadaklan.”—Kap. 7:9.
Paglilinaw: An lalaki na may tintero nin sekretaryo nagrerepresentar ki Jesu-Cristo. Mamarkahan niya an dakulang kadaklan pag nahukuman na niya sinda bilang mga karnero durante kan “dakulang kasakitan.”—Mat. 24:21.
Basehan kan pagbabago: Ipinagkatiwala ni Jehova sa saiyang Aki an paghukom. (Juan 5:22, 23) Sigun sa Mateo 25:31-33, si Jesus an magibo kan pangultimong paghukom manungod sa kun sairisay an “mga karnero” saka kun sairisay an “mga kanding.”
An magtugang daw na hostes na si Ohola saka Oholiba naglaladawan sa Kakristiyanuhan, partikular na kan mga relihiyon na Katoliko asin Protestante?
Dating pakasabot: An mas matuang si Ohola (Samaria, an kabisera kan Israel) naglaladawan sa relihiyon na Katoliko; an mas nguhod na si Oholiba (Jerusalem, an kabisera kan Juda) naglaladawan sa relihiyon na Protestante.
Paglilinaw: An magtugang na hostes na ini bakong tipikong paglaladawan nin ano man na parte kan Kakristiyanuhan. Imbes, an pag-eksister ninda nagtutukdo sa sato manungod sa namamatian ni Jehova pag an dating mga maimbod sa saiya naggigibo nin espirituwal na prostitusyon. Arog man kaiyan an namamatian niya sa gabos na palsong relihiyon.
Basehan kan pagbabago: Mayo nin ipinaparisa sa Kasuratan na si Ohola asin Oholiba mga tipikong paglaladawan kan Kakristiyanuhan. An Israel asin Juda ibinibilang na maimbod na mga agom ni Jehova kan inot, pero an Kakristiyanuhan dai nuarin man nagin agom ni Jehova. Apuwera kaiyan, an bakong maimbod na banwaan nin Diyos na ikinumparar sa mga hostes sa kapitulo 16 asin 23 kan Ezekiel tinawan nin paglaom na babalukaton asin ibabalik. An Kakristiyanuhan, bilang kabtang kan Dakulang Babilonya, mayo kan siring na paglaom.
An Kakristiyanuhan daw an antitipiko kan suanoy na apostatang Jerusalem?
Dating pakasabot: An bakong maimbod na Jerusalem iyo an tipiko kan Kakristiyanuhan. Kaya, an pagkalaglag kan Jerusalem nagserbing anino kan mangyayari sa Kakristiyanuhan.
Paglilinaw: An mga kamugtakan sa bakong maimbod na Jerusalem—arog kan idolatriya saka lakop na karatan—nagpapagirumdom sa sato sa Kakristiyanuhan, pero dai na niyato sinasabi na an Kakristiyanuhan iyo an antitipiko kan Jerusalem.
Basehan kan pagbabago: Mayo nin malinaw na basehan sa Kasuratan para sa arog kaiyan na tipiko saka antitipiko na pagpaliwanag. Bakong arog kan suanoy na Jerusalem, an Kakristiyanuhan dai nuarin man nagsagibo nin dalisay na pagsamba. Asin may panahon na pinatawad ni Jehova an Jerusalem, pero mayo kan siring na oportunidad an Kakristiyanuhan.
Paano nautob an bisyon manungod sa kababan nin mga alang na tulang?
Dating pakasabot: Kan 1918, an pinersegir na mga linahidan nagin bihag kan Dakulang Babilonya. Huli kaiyan, garo man sana sinda gadan. An halipot na panahon na pagkabihag na iyan natapos kan 1919 kan buhayon sinda ni Jehova bilang mga parabalangibog kan Kahadian.
Paglilinaw: An pagigin gadan ninda saka bihag sa espirituwal naghaloy nin halawigon na panahon, asin nagpuon iyan haloy pa bago an taon 1918. Nagpuon iyan kan ikaduwang siglo C.E. asin natapos kan 1919 C.E., asin haros kapareho ini kan halawig na panahon nin pagtalubo sa parabula ni Jesus manungod sa trigo asin duot.
Basehan kan pagbabago: An pagigin bihag kan suanoy na Israel naghaloy nin halawig na panahon. Nagpuon iyan kan 740 B.C.E. asin natapos kan 537 B.C.E. Sinasabi sa propesiya ni Ezekiel na an mga tulang “alang” o “alang na marhay.” Ipinaparisa kaiyan na an irinerepresentar kan mga tulang halawigon na panahon nang gadan. Asin sinabi man sa propesiya na an pagbuhay sa mga tulang luway-luway na mangyayari, na nangangahulugan na nangangaipo ini nin panahon.
Ano an kahulugan kan pagdukot sa duwang pidaso nin kahoy?
Dating pakasabot: Pagkatapos kan halipot na panahon na dai pagkasararo durante kan Giyera Mundiyal I, an maimbod na mga miyembro kan linahidan na mga natatada nagkasararo giraray kan 1919.
Paglilinaw: Idinuduon kan propesiya na pagsasaruon ni Jehova an saiyang mga parasamba. Pagkatapos kan 1919, mantang minalihis an panahon, padakul nin padakul na mga may daganon na paglaom an minaiba sa linahidan na mga natatada. An duwang grupong ini magkaibanan na nagsasamba ki Jehova bilang sarong banwaan.
Basehan kan pagbabago: An propesiya dai nanunungod sa sarong pidaso nin kahoy na pinutol dangan pinagdukot. Kaya, dai ilinaladawan kan propesiya an sarong grupo na nabanga dangan nagin saro giraray. Imbes, ilinaladawan kaiyan an duwang magkalain na grupo na nagin saro.
Siisay si Gog nin Magog?
Dating pakasabot: An Gog nin Magog sarong propetikong pangaran ni Satanas pagkatapos siyang palayason sa kalangitan.
Paglilinaw: An Gog nin Magog nanunungod sa koalisyon nin mga nasyon sa daga na maatake sa tunay na mga parasamba durante kan dakulang kasakitan.
Basehan kan pagbabago: An propetikong paglaladawan ki Gog—na ipapakakan siya sa mga gamgam na nananaklot asin tatawan nin lubungan sa daga—nagpaparisa na bakong espiritung linalang si Gog. Dugang pa, an pag-atake ni Gog kapareho kan sinasabi sa libro nin Daniel asin Kapahayagan na pag-atake sa banwaan nin Diyos kan mga nasyon sa daga.—Dan. 11:40, 44, 45; Kap. 17:14; 19:19.
Nahiling daw saka linibot ni Ezekiel an dakulang espirituwal na templo na ipinaliwanag ni apostol Pablo kan huri?
Dating pakasabot: An templo sa bisyon ni Ezekiel iyo man sana an espirituwal na templo na ipinaliwanag ni apostol Pablo.
Paglilinaw: An nahiling ni Ezekiel bako an espirituwal na templo na nagpuon na mag-eksister kan 29 C.E. Imbes an nahiling niya iyo an perpektong arugan kun paano ibabalik an dalisay na pagsamba, na kauyon kan Katugunan ni Moises, pagkatapos kan pagkadistiyero. An ipinasabong na paliwanag ni Pablo manungod sa espirituwal na templo nakapokus sa gibuhon na naisagibo ni Jesus puon 29 sagkod 33 C.E. bilang an Urog na Dakulang Halangkaw na Saserdote. An bisyon ni Ezekiel manungod sa templo, na dai lamang nagsambit kan manungod sa halangkaw na saserdote, nakapokus sa espirituwal na pagbabalik na nagpuon kan 1919 C.E. Kaya dai niyato hinahanapan nin antitipikong kahulugan an gabos na detalye asin sukol kan templo sa bisyon ni Ezekiel. Imbes, dapat na an panginot na pokus niyato yaon sa mga leksiyon na itinutukdo kan bisyon ni Ezekiel manungod sa mga pamantayan ni Jehova para sa dalisay na pagsamba.
Basehan kan pagbabago: May mga pagkakaiba an templo sa bisyon ni Ezekiel saka an espirituwal na templo. Halimbawa, dakul na hayop an inaatang sa templo na nahiling ni Ezekiel; sa espirituwal na templo, saro sanang atang an idinulot, “saro sanang beses para sa gabos na panahon.” (Heb. 9:11, 12) Kaidtong mga pirang siglo bago mag-abot si Cristo, bako pang panahon para ihayag ni Jehova an hararom na mga katotoohan manungod sa espirituwal na templo.
