Mahal Niyamong mga Namumuot ki Jehova:

Taon kaidto nin 1971. Ugmahon na marhay su mga nag-atender sa “Divine Name” na Pandistritong Asembleya huling nag-ako sinda nin nagkapirang bagong publikasyon. An mga publikasyon na iyan ilinadawan na “labi pa sa piglalauman nin siisay man.” May koneksiyon sa saro sa mga bagong luwas na publikasyon na iyan, sinabi nin sarong brother: “Ini an may pinakanakakapukaw sa buot na patanaw kan mga bagay na mangyayari sa maabot!” Anong publikasyon an pigsasabi niya? An librong “The Nations Shall Know That I Am Jehovah”—How? Pero taano ta arog na sana kaiyan an namatian ninda sa librong iyan? Huling mababasa diyan an pinakabagong mga paliwanag sa mga propesiya na mahihiling sa libro sa Bibliya na Ezekiel—mga propesiya na igwa nin epekto sa puturo kan gabos na tawo.

Puon kan iluwas an librong ‘Know Jehovah,’ marikas an nagin pagdakul kan mga lingkod nin Diyos—hali sa mga 1.5 milyon nagin nang labing 8 milyon. (Isa. 60:22) Sa kabilugan, an minilyon na mga lingkod na ini ni Jehova nagtataram nin labing 1,000 manlain-lain na lengguwahe. (Zac. 8:23) Dakul sa sainda an dai pa lamang nagkaigwa nin oportunidad na pag-adalan an sarong libro na detalyadong nagpapaliwanag kan ipinasabong na mga propesiya na irinekord ni propeta Ezekiel.

Apuwera diyan, sa mga dekada puon kan 1971, an satong pakasabot sa dakul na mga katotoohan sa Bibliya urog pang nagigin mas malinaw mantang an liwanag padagos na nagliliwanag. (Tal. 4:18) Kan 1985, nagin malinaw sa sato kun paano an “ibang mga karnero” ipinapahayag na matanos bilang mga amigo kan Diyos. (Juan 10:16; Roma 5:18; Sant. 2:23) Dangan kan 1995, nasabutan ta sa inot na pagkakataon na an pangultimong paghukom sa mga tawo bilang “karnero” o “kanding” gigibuhon sa maabot na “dakulang kasakitan.” (Mat. 24:21; 25:31, 32) An gabos na pagliliwat na ini igwa nin epekto sa satong pakasabot sa libro nin Ezekiel.

Sa nag-agi pa sanang mga taon, an liwanag urog pang mas nagliwanag. Pag-isipan an mga leksiyon na nanudan ta sa mga ilustrasyon ni Jesus. Dakul sa mga leksiyon na idto an nagin malinaw nang marhay ngunyan sa isip asin puso ta. An nagkapira sa mga ilustrasyon na idto nanunungod sa mga mangyayari sa dakulang kasakitan na madali nang umabot. Arog man kaiyan kun manungod sa mga propesiya ni Ezekiel. May mga paglilinaw sa satong pakasabot sa partikular na mga propesiyang mahihiling sa libro nin Ezekiel. Kaiba na diyan an mga propesiya may koneksiyon ki Gog nin Magog (kapitulo 38 saka 39), an gigibuhon kan lalaki na may tintero nin sekretaryo (kapitulo 9), asin an kababan nin mga alang na tulang saka an simbolikong pagdukot sa duwang pidaso nin kahoy (kapitulo 37). Dahil sa mga paglilinaw na ini, nagkaigwa nin pagbabago sa mga paliwanag na isinurat dakul na taon na an nakaagi sa librong ‘Know Jehovah.’

Kaya dakul na lingkod ni Jehova an naghahapot, “Nuarin daw kita magkakaigwa nin libro na igwa kan bagong paliwanag sa mga propesiya ni Ezekiel?” An librong Dalisay na Pagsamba ki Jehova—Ibinalik Na! an simbag sa hapot na iyan. Mantang binabasa nindo an 22 na kapitulo kan librong ini asin hinihiling an magagayon na artwork diyan, mapapangalas kamo sa ginibong maingat na pagsiyasat para ipreparar an publikasyon na ini. Ipinamibi saka pinag-isipan ming marhay para masabutan kun taano ta itinao ni Jehova an pambihirang librong ini sa Bibliya na Ezekiel. Maingat na kinonsiderar an mga hapot na arog nin: Anong mga leksiyon an mahihiling sa libro nin Ezekiel para sa mga nabuhay kaidto kan panahon ni Ezekiel saka para sa sato ngunyan? Arin na mga propesiya an mauutob sa maabot pang panahon? Dapat daw  kitang maghanap nin ano man na tipiko saka antitipikong paglaladawan sa mga propesiya ni Ezekiel? An simbag sa mga hapot na iyan magtatao sa sato kan pinakamalinaw na pakasabot sa ngunyan manungod sa magayunon na librong ini sa Bibliya.

Mantang binabasa nindo an libro nin Ezekiel puon sa kapinunan kaiyan sagkod sa katapusan, siyertong mapapahanga kamo sa langitnon na kabtang kan organisasyon ni Jehova. Siguradong mapapahanga man kamo sa halangkaw na mga pamantayan na itinao ni Jehova para sa mga nasa langit asin nasa daga na nagmamawot na magsamba sa saiya sa paaging inaako niya. An librong Dalisay na Pagsamba matabang sa saindo na mas mapararom an saindong pagpapahalaga sa mga ginibo ni Jehova kaidto para sa saiyang banwaan asin sa madali na niyang gibuhon para sa sainda sa maabot na panahon. Maririsa nindo sa librong ini na pauruutrong idinuduon an duwang tema. Inot, para mapaugma si Jehova, dapat tang maaraman saka midbidon na siya an Soberano kan Uniberso. Ikaduwa, dapat na sambahon ta si Jehova sa paaging inuuyunan niya asin mamuhay kita kauyon kan saiyang halangkaw na mga pamantayan.

Udok sa puso ming minamawot na mapakusog kan publikasyon na ini an saindong determinasyon na sambahon si Jehova sa paagi na nagtatao nin onra sa saiyang dakula asin banal na pangaran. Asin madagka man lugod kamo kaini na padagos na halaton an panahon na diyan mamimidbid nanggad kan gabos na nasyon na siya si Jehova.—Ezek. 36:23; 38:23.

Lugod na bendisyunan kan satong mamumuton na Ama, si Jehova, an mga paghihinguwa nindong masabutan an librong ini na ipinasabong niya ki propeta Ezekiel na isurat.