1. Paano kita makikinabang kun sasambahon niato an Dios sa tamang paagi?

SI Jehova Dios may hararom na pagmakolog sa sato asin gusto nia na makinabang kita sa saiyang mamomoton na paggiya. Kun sasambahon niato sia sa tamang paagi, kita magigin maogma asin makakalikay sa dakol na problema sa buhay. Makakamtan man niato an saiyang bendisyon asin an saiyang tabang. (Isaias 48:17) Minsan siring, may ginatos na relihion na naghihingako na nagtotokdo kan katotoohan manongod sa Dios. Pero, magkalaenlaen na marhay an saindang mga katokdoan manongod sa kun siisay an Dios asin kun ano an linalaoman nia sato.

2. Paano niato manonodan an tamang paagi nin pagsamba ki Jehova, asin anong ilustrasyon an makakatabang sato na masabotan ini?

² Paano nindo maaaraman an tamang paagi nin pagsamba ki Jehova? Dai nindo kaipuhan na pag-adalan asin pagkompararon an mga katokdoan kan gabos na relihion. Kaipuhan sana nindong manodan kun ano man nanggad an itinotokdo kan Biblia manongod sa tunay na pagsamba. Bilang ilustrasyon: Sa dakol na kadagaan, problema an palsipikadong kuarta. Kun itinao saindo an trabaho na aramon kun arin an palsipikadong kuarta, paano nindo iyan gigibohon? Paagi daw sa pagtuom kan gabos na klase nin palsipikadong kuarta? Dai. Mas may bentaha kun gagamiton nindo an saindong panahon sa pag-adal sa tunay na kuarta. Pakatapos nindong maaraman kun ano an itsura kan tunay na kuarta, mamimidbid nindo an palsipikadong kuarta. Kaagid kaiyan, kun manodan niato kun paano mamimidbid an tunay na relihion, mamimidbid niato kun arin an mga relihion na falso.

3. Segun ki Jesus, ano an kaipuhan niatong gibohon tanganing makamit niato an pag-aprobar nin Dios?

 ³ Mahalaga na sambahon niato si Jehova sa paagi na aprobado nia. Naniniwala an dakol na tawo na nakakapaogma sa Dios an gabos na relihion, alagad dai iyan itinotokdo kan Biblia. Bako nganing igo an paghingako sana na an saro Kristiano. Si Jesus nagsabi: “Bakong gabos na nagsasabi sa sako, ‘Kagurangnan, Kagurangnan,’ makakalaog sa kahadean kan kalangitan, kundi idtong naggigibo kan kabotan kan sakong Ama na nasa kalangitan.” Kun siring, tanganing magkaigwa kan pag-aprobar nin Dios, dapat na manodan niato kun ano an hinahagad sa sato nin Dios asin gibohon iyan. Inapod ni Jesus an mga dai naggigibo kan kabotan nin Dios na “mga paragibo nin katampalasanan.” (Mateo 7:21-23) Siring kan palsipikadong kuarta, an falsong relihion mayo nin tunay na halaga. Mas maraot pa ngani dian, an siring na relihion nakakadanyar talaga.

4. Ano an kahulogan kan mga tataramon ni Jesus may labot sa duwang dalan, asin pasaen an kada dalan?

⁴ Si Jehova nagtatao sa gabos na nasa daga kan oportunidad na magkamit nin buhay na daing katapusan. Minsan siring, tanganing magkaigwa nin buhay na daing sagkod sa Paraiso, kita dapat na sumamba sa Dios sa tamang paagi asin mamuhay ngonyan sa paagi na maaako nia. Makamomondo, an dakol habong gibohon iyan. Iyan an dahelan kun taano ta sinabi ni Jesus: “Maglaog kamo sa tatang hayakpit; huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; mantang hayakpit an tata asin piot an dalan na pasiring sa buhay, asin diit an mga nakakakua kaiyan.” (Mateo 7:13, 14) An tunay na relihion pasiring sa buhay na daing katapusan. An falsong relihion pasiring sa pagkalaglag. Habo ni Jehova na magadan an siisay man na tawo, asin iyan an dahelan kun taano ta sia nagtatao nin oportunidad sa mga tawo sa gabos na lugar na makanood manongod sa saiya. (2 Pedro 3:9) Kun siring, tunay nanggad na an satong paagi nin pagsamba sa Dios nangangahulogan magsalang nin buhay o nin kagadanan para sa sato.

5. Paano niato mamimidbid an mga nag-ootob kan tunay na relihion?

⁵ Paano manonompongan an “dalan na pasiring sa buhay”?  Sinabi ni Jesus na an tunay na relihion magigin risang-risa sa buhay kan mga tawong nag-ootob kaiyan. “Paagi sa saindang mga bunga mamimidbid nindo sinda,” an sabi nia. “An lambang kahoy na marahay nagbubunga nin marahay.” (Mateo 7:16, 17) Sa ibang pagtaram, an mga nag-ootob kan tunay na relihion mamimidbid paagi sa saindang mga paniniwala asin sa saindang gawe-gawe. Minsan ngani sinda bakong sangkap asin sinda nasasala, an tunay na mga nagsasamba naghihingoang gibohon an kabotan nin Dios bilang sarong grupo. Estudyaran niato an anom na aspekto na nagpapamidbid sa mga nag-ootob kan tunay na relihion.

6, 7. Paano minamansay kan mga lingkod nin Dios an Biblia, asin paano si Jesus nagtao kan halimbawa mapadapit digdi?

⁶ Ibinabasar kan mga lingkod nin Dios an saindang mga katokdoan sa Biblia. An Biblia mismo nagsasabi: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa gabos na marahay na gibo.” (2 Timoteo 3:16, 17) Sa saiyang mga kapwa Kristiano, si apostol Pablo nagsurat: “Kan akoon nindo an tataramon nin Dios, na nadangog nindo sa samo, iyan inako nindo, bakong siring sa tataramon nin tawo, kundi, siring sa iyo man nanggad, siring sa tataramon nin Dios.” (1 Tesalonica 2:13) Huli kaini, an mga tinutubod asin kaugalean kan tunay na relihion dai nakabasar sa mga punto de vista o tradisyon nin tawo. Iyan nakabasar sa ipinasabong na Tataramon nin Dios, an Biblia.

⁷ Si Jesu-Cristo nagtao kan tamang halimbawa paagi sa pagbasar kan saiyang mga katokdoan sa Tataramon nin Dios. Sa pamibi sa saiyang langitnon na Ama, sinabi nia: “An saimong tataramon katotoohan.” (Juan 17:17) Si Jesus nagtubod sa Tataramon nin Dios, asin an gabos na itinokdo nia kaoyon kan Kasuratan. Parateng sinasabi kaidto ni Jesus: “Nasusurat.” (Mateo 4:4, 7, 10) Dangan si Jesus nagkokotar nin teksto. Kaagid kaiyan, an banwaan nin Dios ngonyan dai nagtotokdo kan sadiri nindang mga ideya. Nagtutubod sinda na an Biblia Tataramon nin Dios, asin marigon nindang ibinabasar an saindang mga katokdoan sa sinasabi kaiyan.

8. Ano an kalabot sa pagsamba ki Jehova?

 ⁸ An mga nag-ootob kan tunay na relihion si Jehova sana an sinasamba asin ipinapamidbid an saiyang ngaran. Ipinahayag ni Jesus: “Si Jehova na saimong Dios an dapat mong sambahon, asin sa saiya ka sana dapat na magtao nin sagradong paglilingkod.” (Mateo 4:10) Sa siring, an mga lingkod nin Dios daing ibang sinasamba kundi si Jehova. Kaiba sa pagsambang ini an pagpamidbid sa mga tawo kan ngaran kan tunay na Dios asin kun anong klase siang Dios. An Salmo 83:18 nagsasabi: “Ika, na an ngaran Jehova, ika sana an Kaharohalangkawe sa bilog na daga.” Itinao ni Jesus an arogan sa pagtabang sa iba na mamidbid an Dios, siring kan sinabi nia sa pamibi: “Ipinahayag ko an saimong ngaran sa mga tawo na itinao mo sa sako hale sa kinaban.” (Juan 17:6) Kaagid kaiyan, an tunay na mga parasamba ngonyan itinotokdo sa iba an manongod sa ngaran nin Dios, sa saiyang mga katuyohan, asin sa saiyang mga kualidad.

9, 10. Sa anong mga paagi na ipinapaheling kan tunay na mga Kristiano an pagkamoot sa lambang saro?

⁹ An banwaan nin Dios nagpapaheling nin tunay, bakong maimot na pagkamoot sa lambang saro. Si Jesus nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:35) An enot na mga Kristiano may siring kaiyan na pagkamoot sa lambang saro. Dinadaog kan diosnon na pagkamoot an rasyal, sosyal, asin nasyonal na mga kaolangan asin pinagsasararo an mga tawo sa dai napapatod na bogkos nin tunay na kasararoan nin magturugang. (Colosas 3:14) An mga miembro nin falsong mga relihion mayo nin siring na mamomoton na kasararoan nin magturugang. Paano niato iyan naaraman? Sinda naggagaradanan huli sa nasyonal o etnikong mga pagkakalaen. An tunay na mga Kristiano dai nagkakapot nin mga armas tanganing gadanon an saindang Kristianong mga tugang o dawa siisay man. An Biblia nagsasabi: “An mga aki nin Dios asin an mga aki kan Diablo namimidbid sa bagay na ini: An gabos na dai naggigibo nin katanosan bakong gikan sa Dios, ni sia na dai namomoot sa saiyang tugang. . . . Kita maninigong magkaminorootmootan; bakong arog ki Cain, na naggikan sa maraot asin guminadan sa saiyang tugang.”​—1 Juan 3:10-12; 4:20, 21.

 ¹⁰ Siempre, bako sanang paglikay na gumadan nin iba an kahulogan kan tunay na pagkamoot. An tunay na mga Kristiano daing kaimotan na ginagamit an saindang panahon, kosog, asin rekurso tanganing magtinarabangan asin magparinigonan nin boot. (Hebreo 10:24, 25) Nagtitinarabangan sinda sa mga panahon nin kasakitan, asin tinatratar ninda sa onestong paagi an iba. Sa katunayan, iinaaplikar ninda sa saindang buhay an konseho sa Biblia na ‘gumibo kan marahay sa gabos.’​—Galacia 6:10.

11. Taano ta mahalaga na akoon si Jesu-Cristo bilang an paagi nin Dios sa pagliligtas?

¹¹ Inaako kan tunay na mga Kristiano si Jesu-Cristo bilang an paagi nin Dios sa pagliligtas. An Biblia nagsasabi: “Mayo nin kaligtasan sa siisay pa man na iba, huli ta mayo na nin ibang ngaran sa sirong nin langit na itinao sa mga tawo na sukat makaligtas sa sato.” (Gibo 4:12) Siring kan naheling niato sa Kapitulo 5, itinao ni Jesus an saiyang buhay bilang pantubos para sa makinuyog na mga tawo. (Mateo 20:28) Dugang pa, si Jesus an ninombrahan nin Dios na Hade sa langitnon na Kahadean na mamamahala sa bilog na daga. Asin hinahagad nin Dios na kuyogon niato si Jesus asin iaplikar an saiyang mga katokdoan kun gusto niato nin buhay na daing katapusan. Iyan an dahelan kun taano ta sinasabi kan Biblia: “An nagtutubod sa Aki igwa nin buhay na daing katapusan; an nakikisuway sa Aki dai makakaheling nin buhay.”​—Juan 3:36.

12. Ano an kalabot sa pagigin bakong kabtang kan kinaban?

¹² An tunay na mga parasamba bakong kabtang kan kinaban. Kan binibista sa atubangan kan Romanong namamahala na si Pilato, si Jesus nagsabi: “An sakong kahadean bakong kabtang kan kinaban na ini.” (Juan 18:36) Saen man na nasyon sinda nag-iistar, an tunay na mga parasunod ni Jesus sakop kan saiyang langitnon na Kahadean asin sa siring nagpapadanay nin lubos na neutralidad sa mga bagay-bagay sa politika kan kinaban. Dai sinda nakikikabtang sa mga iriwal kaiyan. Minsan siring, an mga nagsasamba ki Jehova dai nakikiaram sa gustong gibohon nin iba manongod sa pag-ayon sa partido politika, pagkandidato, o pagboto. Asin minsan ngani an tunay na mga nagsasamba sa Dios neutral mapadapit sa politika, sinda makinuyog sa ley. Taano? Huli ta an Tataramon nin Dios nagboboot sa sainda na “magpasakop sa superyor na mga autoridad” nin gobyerno. (Roma 13:1)  Kun magkakontra an kahagadan nin Dios asin an kahagadan nin sarong politikal na sistema, sinusunod kan tunay na mga parasamba an halimbawa kan mga apostol, na nagsabi: “Dapat na kuyogon niamo an Dios bilang namamahala imbes na mga tawo.”​—Gibo 5:29; Marcos 12:17.

13. Paano minamansay kan tunay na mga parasunod ni Jesus an Kahadean nin Dios, asin kun siring, ano an ginigibo ninda?

¹³ Ihinuhulit kan tunay na mga parasunod ni Jesus na an Kahadean nin Dios an solamenteng paglaom kan katawohan. Ihinula ni  Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Imbes na enkaminaron an mga tawo na umasa sa mga namamahalang tawo na resolberan an saindang mga problema, ibinabalangibog kan tunay na mga parasunod ni Jesu-Cristo an langitnon na Kahadean nin Dios bilang an solamenteng paglaom para sa katawohan. (Salmo 146:3) Tinokdoan kita ni Jesus na ipamibi an sangkap na gobyernong iyan kan sabihon nia: “Dumatong logod an kahadean mo. Gibohon logod an kabotan mo, kun paano sa langit, siring man sa daga.” (Mateo 6:10) Ihinula kan Tataramon nin Dios na an langitnon na Kahadean na ini “an maronot asin matapos kan gabos na ining kahadean [na nag-eeksister ngonyan], asin iyan mismo magdadanay sagkod sa mga panahon na daing talaan.”​—Daniel 2:44.

14. Anong relihiosong grupo an sa pagtubod nindo nakakaabot sa mga kahagadan para sa tunay na pagsamba?

¹⁴ Basado sa natokar pa sana niato, hapoton an saindong sadiri: ‘Anong relihiosong grupo an ibinabasar an gabos na katokdoan kaiyan sa Biblia asin ipinapamidbid an ngaran ni Jehova? Anong grupo an nagsasagibo nin diosnon na pagkamoot, nagtutubod ki Jesus, bakong kabtang kan kinaban, asin nagbabalangibog na an Kahadean nin Dios an solamenteng tunay na paglaom para sa katawohan? Sa gabos na relihiosong grupo sa daga, arin an nakakaabot sa mga kahagadan na ini?’ Ipinapaheling kan mga katunayan na sinda an Mga Saksi ni Jehova.​—Isaias 43:10-12.

15. Ano an hinahagad nin Dios apuera sa pagtubod na sia nag-eeksister?

¹⁵ An basta pagtubod sana sa Dios bakong igo tanganing paogmahon sia. Sa katunayan, sinasabi kan Biblia na dawa an mga demonyo nagtutubod na nag-eeksister an Dios. (Santiago 2:19) Pero, malinaw na dai ninda ginigibo an kabotan nin Dios asin sinda dai nia aprobado. Tanganing aprobaran nin Dios, bako sana na kita dapat magtubod sa saiyang pag-eksister kundi dapat man niatong gibohon an saiyang kabotan. Dapat man na kita sumuway sa falsong relihion asin maogma niatong akoon an tunay na pagsamba.

16. Ano an maninigong gibohon manongod sa pakikikabtang sa falsong relihion?

 ¹⁶ Ipinaheling ni apostol Pablo na dai kita dapat na makikabtang sa falsong pagsamba. Sia nagsurat: “ ‘Humale kamo sa tanga ninda, asin sumuhay kamo,’ an sabi ni Jehova, ‘asin dai na kamo dumotdot sa maating bagay’; ‘asin aakoon ko kamo.’ ” (2 Corinto 6:17; Isaias 52:11) Kun siring, linilikayan kan tunay na mga Kristiano an ano man na bagay na konektado sa falsong pagsamba.

17, 18. Ano an “Dakulang Babilonya,” asin taano ta kaipuhan na marhay na ‘lumuwas sa saiya’?

¹⁷ Ipinapaheling kan Biblia na an gabos na klase nin falsong relihion kabtang kan “Dakulang Babilonya.” * (Kapahayagan 17:5) Ipinapagirumdom kan ngaran na iyan an suanoy na siudad nin Babilonya, na duman nagpoon an falsong relihion pakatapos kan Baha kan kaaldawan ni Noe. An dakol na katokdoan asin kaugalean na ngonyan lakop sa falsong relihion naggikan kaidtong haloy na an nakaagi sa Babilonya. Halimbawa, sinamba kan mga Babilonyo an mga trinidad nin mga dios. Ngonyan, an pangenot na doktrina nin dakol na relihion iyo an Trinidad. Alagad malinaw na itinotokdo kan Biblia na may saro sanang tunay na Dios, si Jehova, asin na si Jesu-Cristo saiyang Aki. (Juan 17:3) Naniniwala man kaidto an mga Babilonyo na an mga tawo igwa nin inmortal na kalag na nagdadanay na buhay pagkagadan kan hawak asin na puedeng magdusa sa lugar nin pasakit. Ngonyan, an paniniwala sa inmortal na kalag o espiritu na puedeng magdusa sa kalayo sa impierno itinotokdo kan kadaklan na relihion.

¹⁸ Huling an suanoy na pagsamba sa Babilonya luminakop sa bilog na daga, an Dakulang Babilonya sa presenteng panahon tamang sabihon na iyo an pambilog na kinaban na imperyo nin falsong relihion. Asin ihinula nin Dios na an imperyong ini nin falsong relihion malalaglag nin bigla. (Kapahayagan 18:8) Naheheling daw nindo kun taano ta mahalagang marhay na isuway nindo an saindong sadiri sa gabos na kabtang kan Dakulang Babilonya? Gusto ni Jehova Dios na “lumuwas kamo sa saiya” tolos-tolos mientras na may panahon pa.​—Kapahayagan 18:4.

19. Ano an makakamtan nindo huli sa paglilingkod ki Jehova?

 ¹⁹ Bilang resulta kan saindong desisyon na pumondo sa pag-otob kan falsong relihion, an iba tibaad pilion na umontok sa pakikiasosyar sa saindo. Minsan siring, paagi sa paglilingkod ki Jehova kaiba kan saiyang banwaan, labi nanggad an makakamtan nindo kisa sa ano man na mawawara saindo. Siring kan enot na mga disipulo ni Jesus na binayaan an ibang mga bagay tanganing sumunod sa saiya, magkakaigwa kamo nin dakol na espirituwal na tugang na lalaki asin babae. Kamo magigin kabtang nin sarong dakula, pambilog na kinaban na pamilya nin minilyon na tunay na Kristiano, na nagpapaheling sa saindo nin tunay na pagkamoot. Asin magkakaigwa kamo kan makangangalas na paglaom na buhay na daing katapusan “sa madatong na sistema nin mga bagay.” (Marcos 10:28-30) Tibaad pag-abot nin panahon, an mga nagbaya sa saindo huli sa saindong mga tinutubod magsiyasat sa itinotokdo kan Biblia asin magin mga parasamba ki Jehova.

20. Ano an nakatagama sa ngapit para sa mga nag-ootob kan tunay na relihion?

²⁰ Itinotokdo kan Biblia na sa dai na mahahaloy tataposon nin Dios an maraot na sistemang ini nin mga bagay asin sasalidahan iyan nin matanos na bagong kinaban na sakop kan pamamahala kan saiyang Kahadean. (2 Pedro 3:9, 13) Kanigoan kamakangangalas kan maabot na kinaban na iyan! Asin sa matanos na bagong sistemang iyan, magkakaigwa nin saro na sanang relihion, sarong tunay na klase nin pagsamba. Bako daw na madonong para sa saindo na gibohon an kaipuhan na mga aksion tanganing makaasosyar sa tunay na mga parasamba ngonyan mismo?