1, 2. Magtao nin nagkapirang halimbawa nin mga tawo na ibinilang ni Jehova na saiyang mga katood.

 ANONG klaseng tawo an pipilion nindong magin katood? Posibleng marhay na gusto nindong makaiba an saro na kapareho nindo an punto de vista, intereses, asin pamantayan sa buhay. Asin madadagka kamong rumani sa saro na may marahayon na mga kualidad, arog baga nin pagkaonesto asin kabootan.

² Sa bilog na kasaysayan, may mga tawo na pinili nin Dios na magin dayupot na katood nia. Halimbawa, inapod ni Jehova si Abraham na saiyang katood. (Isaias 41:8; Santiago 2:23) Sinabi nin Dios na si David “lalaking naooyonan kan sakong puso” huli ta sia an klase nin tawo na namomotan ni Jehova. (Gibo 13:22) Asin si propeta Daniel ibinilang ni Jehova na “saro na kawiliwiling gayo.”​—Daniel 9:23.

 3. Taano ta pinipili ni Jehova an nagkapirang tawo na magin saiyang katood?

³ Taano ta ibinilang ni Jehova na mga katood nia si Abraham, David, asin Daniel? Bueno, sinabihan nia si Abraham: “Ika naghinanyog sa sakong tingog.” (Genesis 22:18) Kaya si Jehova minarani sa mga mapakumbabang ginigibo kun ano an hinahagad nia sa sainda. “Kuyoga nindo an sakong tingog,” an sinabi nia sa mga Israelita, “asin ako magigin Dios nindo, asin kamo mismo magigin sakong banwaan.” (Jeremias 7:23) Kun kuyogon nindo si Jehova, kamo man puedeng magin saiyang katood!

4, 5. Paano ipinapaheling ni Jehova an saiyang kosog para sa saiyang banwaan?

⁴ Isip-isipon kun ano an kahulogan nin pakikikatood sa Dios. An Biblia nagsasabi na si Jehova naghahanap nin mga oportunidad “tanganing ipaheling an saiyang kosog para duman sa mga an puso kompleto para sa saiya.” (2 Cronica 16:9) Paano ikakapaheling ni Jehova an saiyang kosog para sa saindo? An sarong paagi pinapalataw sa Salmo 32:​8, na dian mababasa niato: “Papangyayarihon ko [ni Jehova] na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakaturuhok sa saimo.”

⁵ Kanigoan kanakakapukaw sa boot na kapahayagan kan pagmakolog ni Jehova! Tatawan nia kamo kan kinakaipuhan na paggiya asin babantayan nia kamo mantang iinaaplikar nindo iyan. Gusto kamong tabangan nin Dios na mapangganang makatagal sa mga pagbalo sa saindo. (Salmo 55:22) Kaya kun pinaglilingkodan nindo si Jehova na may kompletong puso, magigin kompiado man kamo siring kan salmista na nagsabi: “Danay kong ibinubugtak si Jehova sa atubangan ko. Huli ta sia yaon sa sakong too, dai ako matatanyog.” (Salmo 16:8; 63:8) Iyo, matatabangan kamo ni Jehova na mamuhay sa paagi na nakakapaogma sa saiya. Alagad, siring kan aram nindo, may kaiwal an Dios na gustong olangon kamo sa paggibo kaini.

 6. Ano an sahot ni Satanas mapadapit sa mga tawo?

⁶ Ipinaliwanag kan Kapitulo 11 kan librong ini kun paano inangat ni Satanas na Diablo an soberaniya nin Dios. Sinahotan ni Satanas an Dios nin pagputik asin ipinasentido na si Jehova bakong makatanosan sa dai pagtogot ki Adan asin Eva na magdesisyon para sa saindang sadiri kun ano an tama asin kun ano an sala. Pakatapos na magkasala si Adan asin Eva asin mantang nagpopoon nang mapano kan saindang mga aki an daga, kinuestion ni Satanas an motibo kan gabos na tawo. “An mga tawo dai naglilingkod sa Dios huli ta namomotan sia ninda,” an sahot ni Satanas. “Tawe ako nin oportunidad, asin kaya kong patalikodon sa Dios an siisay man.” Ipinapaheling kan pagkasaysay manongod  sa sarong tawo na an ngaran Job na ini an paniwala ni Satanas. Siisay si Job, asin paano sia napalabot sa angat ni Satanas?

7, 8. (a) Ano an nagpangyaring magin lataw na marhay si Job sa tahaw nin mga tawo kan panahon na idto? (b) Paano kinuestion ni Satanas an motibo ni Job?

⁷ Si Job nabuhay kaidtong mga 3,600 na taon na an nakaagi. Sia sarong marahay na tawo, huling sinabi ni Jehova: “Mayo nin siisay man na nakakaagid sa saiya sa daga, lalaking daing katuyawan asin tanos, na natatakot sa Dios asin naglilikay sa maraot.” (Job 1:8) Si Job nakapaogma sa Dios.

⁸ Kinuestion ni Satanas an motibo ni Job sa paglilingkod sa Dios. Sinabi kan Diablo ki Jehova: “Bako daw na ika mismo nagbugtak nin proteksion sa palibot [ni Job] asin sa palibot kan saiyang harong asin sa palibot kan gabos niang sadiri? Binendisyonan mo an gibo kan saiyang mga kamot, asin an saiya mismong kahayopan nakalakop sa daga. Alagad ngonyan tabi unata an saimong kamot asin dotdota an gabos niang sadiri asin helinga kun baga dai ka nia sumpaon nin atubangan.”​—Job 1:​10, 11.

 9. Ano an nagin reaksion ni Jehova sa angat ni Satanas, asin taano?

⁹ Sa siring na paagi si Satanas nangatanosan na si Job naglilingkod sa Dios huli sana sa nakukua niang balos. Nagsahot man an Diablo na kun babaloon si Job, sia matalikod sa Dios. Ano an nagin reaksion ni Jehova sa angat ni Satanas? Huling kalabot sa isyu an motibo ni Job, tinogotan ni Jehova si Satanas na baloon si Job. Sa paaging ini, an pagkamoot ni Job sa Dios​—o an kadaihan kaiyan—​maheheling nin malinaw.

10. Anong mga pagbalo an sinapar ni Job, asin ano an nagin reaksion nia?

¹⁰ Dai nahaloy binalo ni Satanas si Job sa manlaenlaen na paagi. An iba sa mga hayopan ni Job hinabon, asin an iba pa ginadan. An kadaklan sa saiyang mga surugoon ginadan. Nagbunga ini nin kasakitan sa pagbuhay. Nadagdagan pa an trahedya kan magadan sa bagyo an sampulong aki ni Job. Minsan siring, sa ibong kan teribleng mga pangyayaring ini, “si Job dai nagkasala o nagsahot nin ano man na sala sa Dios.”​—Job 1:22.

11. (a) Anong ikaduwang akusasyon an ginibo ni Satanas may labot ki Job, asin ano an nagin reaksion ni Jehova? (b) Ano an nagin reaksion ni Job sa saiyang makolog na helang?

 ¹¹ Si Satanas dai suminuko. Siertong inisip nia na minsan ngani natagalan ni Job an pagkawara kan saiyang mga rogaring, surugoon, asin aki, tatalikdan nia an Dios kun sia magkahelang. Tinogotan ni Jehova si Satanas na tawan si Job nin sarong makababalde, makolog na helang. Alagad dawa ini dai nagin dahelan na si Job mawaran nin pagtubod sa Dios. Imbes, sia marigon na nagsabi: “Sagkod na ako magadan dai ko hahaleon sa sakuyang sadiri an sakuyang integridad!”​—Job 27:5.

12. Paano sinimbag ni Job an angat kan Diablo?

¹² Dai aram ni Job na si Satanas an dahelan kan saiyang mga problema. Huling dai aram an mga detalye manongod sa angat kan Diablo sa soberaniya ni Jehova, natakot si Job na an Dios an ginikanan kan saiyang mga problema. (Job 6:4; 16:11-14) Pero pinapagdanay pa man giraray nia an saiyang integridad ki Jehova. Asin an paghingako ni Satanas na si Job naglilingkod sa Dios huli sa maimot na mga dahelan napatunayan na bakong totoo paagi sa maimbod na pamumuhay ni Job!

13. Ano an nangyari huling si Job maimbod sa Dios?

¹³ An kaimbodan ni Job nagtao ki Jehova nin epektibong simbag sa mapan-insultong angat ni Satanas. Si Job tunay nanggad na katood ni Jehova, asin binalosan sia nin Dios huli sa saiyang maimbod na pamumuhay.​—Job 42:12-17.

14, 15. Taano ta masasabi niato na an angat ni Satanas may labot ki Job aplikado sa gabos na tawo?

¹⁴ An isyu manongod sa integridad sa Dios na pinalataw ni Satanas bako sanang tumang ki Job. Kalabot man kamo. Ini malinaw na ipinapaheling sa Talinhaga 27:11, na dian an Tataramon ni Jehova nagsasabi: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” An mga tataramon na ini, na isinurat ginatos na taon pagkagadan ni Job, nagpapaheling na dinuduhagi pa man giraray ni Satanas an Dios asin inaakusar an Saiyang mga lingkod. Kun kita namumuhay sa paagi na nakakapaogma  ki Jehova, sa katunayan kita nagtatabang sa pagtao nin simbag sa mga sahot ni Satanas na bakong totoo, asin sa paaging iyan pinapagayagaya niato an puso nin Dios. Ano an saboot nindo manongod dian? Bako daw na marahayon na magkaigwa nin kabtang sa pagsimbag sa putik na mga sahot kan Diablo, dawa pa iyan nangangahulogan nin paggibo nin nagkapirang pagbabago sa saindong buhay?

¹⁵ Mangnohon na sinabi ni Satanas: “An gabos na sadiri nin tawo itatao nia para sa saiyang kalag.” (Job 2:4) Sa pagsabing “nin tawo,” lininaw ni Satanas na an sahot nia aplikado bako sanang ki Job kundi sa gabos na tawo. Iyan mahalagang marhay na punto. Kinuestion ni Satanas an saindong integridad sa Dios. Gustong maheling kan Diablo na makisuway kamo sa Dios asin bayaan nindo an matanos na pamumuhay kun lumataw an mga problema. Paano tibaad hingoahon ni Satanas na gibohon ini?

16. (a) Anong mga paagi an ginagamit ni Satanas sa paghihingoang patalikodon sa Dios an mga tawo? (b) Paano tibaad gamiton kan Diablo an mga paaging ini tumang sa saindo?

¹⁶ Siring kan tinokar sa Kapitulo 10, si Satanas naggagamit nin manlaenlaen na paagi sa paghihingoang patalikodon sa Dios an mga tawo. Sa sarong lado, sia minasalakay na “siring sa nagngangarob na leon, na naghahanap nin masisiba.” (1 Pedro 5:8) Sa siring puedeng maheling an impluwensia ni Satanas kun an mga katood, paryente, o iba pa kumontra sa saindong mga paghihingoa na pag-adalan an Biblia asin iaplikar an saindong nanonodan. a (Juan 15:​19, 20) Sa ibong na lado, si Satanas “pirmeng nagmamalemale na anghel nin liwanag.” (2 Corinto 11:14) An Diablo puedeng gumamit nin tusong mga paagi tanganing ilagalag kamo asin akiton kamo parayo sa diosnon na pamumuhay. Puede man niang gamiton an pagkadesganar, na tibaad papangyayarihon niang magsaboot kamo na dai nindo mahihimong mapaogma an Dios. (Talinhaga 24:10) Baga man si Satanas naghihiro na siring sa “nagngangarob na leon” o nagsasagin na  “anghel nin liwanag,” an saiyang angat pareho pa man giraray: Sinasabi nia na kun kamo mapaatubang sa mga pagbalo o sugot, mapondo na kamo sa paglilingkod sa Dios. Paano nindo masisimbag an saiyang angat asin mapapatunayan an saindong integridad sa Dios, siring kan ginibo ni Job?

17. Ano an pangenot na dahelan na kuyogon an mga togon ni Jehova?

¹⁷ Puede nindong simbagon an angat ni Satanas paagi sa pamumuhay na nakakapaogma sa Dios. Ano an kalabot digdi? An Biblia minasimbag: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong kosog.” (Deuteronomio 6:5) Mantang nagtatalubo an saindong pagkamoot sa Dios, mapapano kamo nin pagmawot na gibohon an saiyang kahagadan sa saindo. “Ini iyo an boot sabihon kan pagkamoot sa Dios,” an isinurat ni apostol Juan, “na kuyogon niato an saiyang mga togon.” Kun namomotan nindo si Jehova sa bilog nindong puso, manonompongan nindo na “an saiyang mga togon dai nakakapagabat.”​—1 Juan 5:3.

18, 19. (a) Ano an nagkapira sa mga togon ni Jehova? (Helingon an kahon na “ Rayoan an mga Ikinakaongis ni Jehova.”) (b) Paano niato naaaraman na an Dios dai naghahagad nin labi sa kaya niato?

¹⁸ Ano an mga togon ni Jehova? An nagkapira kaiyan may labot sa gawe-gawe na dapat niatong likayan. Halimbawa, helingon an kahon na may titulong “ Rayoan an mga Ikinakaongis ni Jehova.” Nakalista duman an gawe-gawe na malinaw na kinokondenar kan Biblia. Sa primerong heling, an nagkapira sa mga gibong nakalista tibaad garo baga bako man na gayong maraot. Alagad pakatapos na horophoropon an sitadong mga teksto, posibleng marhay na maheling nindo an kadonongan sa mga ley ni Jehova. An paggibo nin mga pagbabago sa saindong gawe-gawe tibaad magin an pinakadakulang kadepisilan na napaatubang saindo kasuarin man. Pero an pamumuhay sa paagi na nakakapaogma sa Dios nagbubunga nin dakulang satispaksion asin kaogmahan. (Isaias 48:17, 18) Asin kaya nindong gibohon iyan. Paano niato iyan naaaraman?

¹⁹ Si Jehova dai noarin man naghahagad sa sato nin labi sa kaya niatong gibohon. (Deuteronomio 30:11-14) Mas aram nia  an satong potensial asin an satong mga limitasyon kisa sato. (Salmo 103:14) Dugang pa, puede kitang tawan ni Jehova kan kosog na makuyog sia. Si apostol Pablo nagsurat: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” (1 Corinto 10:13) Tanganing tabangan kamong makatagal, puede ngani kamong tawan ni Jehova nin “puersa na labi sa ordinaryo.” (2 Corinto 4:7) Pakatapos na tagalan an dakol na pagbalo, nasabi ni Pablo: “Igwa ako kan kosog para sa gabos na bagay huli sa saiya na nagtatao nin puersa sa sako.”​—Filipos 4:13.

20. Anong diosnon na mga kualidad an maninigo nindong pataluboon, asin taano ta mahalaga an mga ini?

²⁰ Siempre, labi pa an kalabot sa pagpaogma ki Jehova kisa paglikay sana sa mga bagay na ikinakaongis nia. Kaipuhan man nindong kamotan an mga namomotan nia. (Roma 12:9) Dai daw kamo nadadagkang rumani sa mga kapareho nindo an punto de vista, intereses, asin pamantayan sa buhay? Iyo man si Jehova. Kaya pag-adalan na kamotan an mga bagay na mahal ni Jehova. Ilinaladawan an nagkapira sa mga ini sa Salmo 15:1-5, na dian mababasa niato an manongod sa mga ibinibilang nin Dios na katood nia.  An mga katood ni Jehova nagpapaheling kan inaapod sa Biblia na “mga bunga kan espiritu.” Kaiba dian an mga kualidad na arog baga kan “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”​—Galacia 5:22, 23.

21. Ano an makakatabang sa saindo na pataluboon an diosnon na mga kualidad?

²¹ An regular na pagbasa asin pag-adal kan Biblia matabang sa saindo na pataluboon an diosnon na mga kualidad. Asin an pakanood kan kahagadan nin Dios matabang sa saindo na ioyon an saindong kaisipan sa kaisipan nin Dios. (Isaias 30:​20, 21) Mientras na orog nindong pinapakosog an saindong pagkamoot ki Jehova, orog man na madakula an saindong pagmawot na mamuhay sa paagi na nakakapaogma sa Dios.

22. Ano an magigibo nindo kun kamo mamuhay sa paagi na nakakapaogma sa Dios?

²² Kaipuhan an paghihingoa tanganing makapamuhay sa paagi na nakakapaogma ki Jehova. Iinaagid kan Biblia an pagbabago kan saindong pamumuhay sa paghuba kan saindong daan na personalidad asin pagsolog nindo nin bagong personalidad. (Colosas 3:​9, 10) Alagad mapadapit sa mga togon ni Jehova, an salmista nagsurat: “Sa pag-otob kaiyan may dakulang balos.” (Salmo 19:11) Madidiskobre man nindo na an pamumuhay sa paagi na nakakapaogma sa Dios kapakipakinabang nanggad. Sa paggibo kaiyan, kamo makakatao nin simbag sa angat ni Satanas asin makakapagayagaya sa puso ni Jehova!