An pagbubo nin banal na espiritu kan aldaw nin Pentecostes, sampulong aldaw pakasakat ni Jesus sa langit, pruweba na talagang nasa langit na siya. Asin may maabot pang dagdag na pruweba. Bago mismo gapuon si Esteban huli sa saiyang maimbod na pagpapatotoo, siya nagsabi: “Nahihiling ko an kalangitan na nabuksan asin an Aki nin tawo na nakatindog sa tuo nin Diyos.”—Gibo 7:56.

Mantang kaiba kan saiyang Ama sa langit, hahalaton ni Jesus an espesipikong pagbuot na nakahula sa Tataramon nin Diyos. Paagi sa pasabong nin Diyos, si David nagsurat: “An sabi ni Jehova sa sakong Kagurangnan [si Jesus]: ‘Tumukaw ka sa sakong tuo sagkod na ibugtak ko an saimong mga kaiwal na tungtungan kan saimong mga bitis.’” Kun matapos na an panahon na ini kan saiyang paghalat, siya ‘mandadaog sa tahaw kan saiyang mga kaiwal.’ (Salmo 110:1, 2) Pero ano an gigibuhon ni Jesus sa langit mantang naghahalat na mandaog tumang sa saiyang mga kaiwal?

Kan Pentecostes 33 C.E., naestablisar an Kristiyanong kongregasyon. Kan nasa langit na si Jesus, pinunan niyang pamahalaan an saiyang mga disipulo na linahidan nin espiritu. (Colosas 1:13) Giniyahan niya sinda sa saindang paghuhulit asin inandam sa magigin katungdan ninda pag-abot nin panahon. Anong katungdan? An mga magdadanay na maimbod sagkod sa kagadanan bubuhayon liwat pag-abot nin panahon asin magigin kairibang mga hadi ni Jesus sa Kahadian.

An sarong marahayon na halimbawa nin magigin hadi pag-abot nin panahon iyo si Saulo, na mas midbid sa saiyang Romanong pangaran na Pablo. Saro siyang Judio na haloy nang maigot sa pag-utob kan Katugunan nin Diyos, pero sala nanggad na paggiya an itinao sa saiya kan mga Judiong lider nin relihiyon kaya nag-uyon pa ngani siya na gapuon si Esteban. Dangan, “huling grabe pa man giraray an pagkaanggot sa mga disipulo kan Kagurangnan asin nagmamawot na garadanon an mga ini,” nagpasiring si Saulo sa Damasco. Inawtorisaran siya kan Halangkaw na Saserdote na si Caifas na arestaron an mga disipulo ni Jesus asin darahon pabalik sa Jerusalem. (Gibo 7:58; 9:1) Pero, kan nasa dalan si Saulo, sarong nakakasilaw na liwanag an nagsilyab sa palibot niya asin natumba siya sa daga.

“Saulo, Saulo, taano ta pinepersegir mo ako?” an apod kan sarong boses gikan sa saro na dai nahihiling. “Siisay ka Kagurangnan?” an hapot ni Saulo. “Ako si Jesus, na pinepersegir mo,” an simbag sa saiya.—Gibo 9:4, 5.

 Sinabi ni Jesus ki Saulo na lumaog sa Damasco asin na duman sasabihon kun ano an dapat niyang gibuhon, pero kaipuhan siyang kabiton pasiring sa siyudad huling nabuta siya kan milagrosong liwanag. Sa saro pang bisyon, nagpahiling si Jesus ki Ananias, na saro sa mga disipulo niya na nakaistar sa Damasco. Sinabi ni Jesus ki Ananias na magduman sa sarong harong para hanapon si Saulo. Natakot si Ananias na gibuhon iyan, pero siniyerto ni Jesus sa saiya: “An tawong ini sarong kasangkapan na pinili ko tanganing darahon an sakuyang ngaran sa mga nasyon siring man sa mga hadi saka sa mga aki nin Israel.” Nakahiling giraray si Saulo, asin duman sa Damasco “tulos siyang naghulit manungod ki Jesus, na iyo ini an Aki nin Diyos.”—Gibo 9:15, 20

Sa suporta ni Jesus, ipinadagos ni Pablo asin kan iba pang mga ebanghelisador an paghuhulit na pinunan kaidto ni Jesus. Binendisyunan sinda nin Diyos nin pambihirang kapangganahan. Mga 25 taon pakatapos kan pagpahiling ni Jesus ki Pablo sa dalan pa-Damasco, nagsurat ini na an maugmang bareta ‘ikinahulit na sa gabos na linalang sa sirong nin langit.’—Colosas 1:23.

Pakalihis nin dakul na taon, tinawan ni Jesus an saiyang namumutan na marhay na apostol na si Juan nin sunod-sunod na mga bisyon, na mababasa sa Bibliya sa libro nin Kapahayagan. Paagi sa mga bisyon na ini, garo man sana nahiling ni Juan an pagbalik ni Jesus bilang tagapamahala kan Kahadian. (Juan 21:22) “Paagi sa pasabong [si Juan] napasa aldaw kan Kagurangnan.” (Kapahayagan 1:10) Nuarin daw iyan?

Base sa maingat na pag-adal sa mga hula kan Bibliya, an “aldaw kan Kagurangnan” nagpuon sa modernong panahon. Kan 1914, nangyari an Giyera Mundiyal I. Sa nagsurunod na mga dekada, nangyari an dakul pang giyera, mga epidemya, grabeng gutom, mga linog, asin iba pang ebidensiya kan dakulang kautuban kan “tanda” na itinao ni Jesus sa mga apostol dapit sa saiyang “presensiya” asin sa panahon kan “katapusan.” (Mateo 24:3, 7, 8, 14) An paghuhulit kan maugmang bareta kan Kahadian ginigibo ngunyan bako sana sa dating nasasakupan kan Imperyo nin Roma kundi sa bilog na daga.

Pinasabngan si Juan na iladawan kun ano an kahulugan kaini: “Nagdatong na an kaligtasan asin an kapangyarihan pati an Kahadian kan satong Diyos asin an awtoridad kan saiyang Cristo.” (Kapahayagan 12:10) Iyo, an Kahadian nin Diyos sa langit na mahiwas na ipinahayag ni Jesus talagang namamahala na!

Marahayon na bareta iyan sa gabos na maimbod na mga disipulo ni Jesus. Puwede nindang isapuso an mga tataramon na ini ni Juan: “Huli kaini mag-ugma, kamo kalangitan asin kamo na nag-iirok diyan! Hirak man kan daga asin kan dagat, huli ta nagbaba na diyan sa saindo an Diyablo, na may dakulang kaanggutan, sa pakaaram na halipot na sana an saiyang panahon.”—Kapahayagan 12:12.

Kun siring, si Jesus dai na ngunyan nakatukaw na naghahalat sa tuo kan saiyang Ama. Siya namamahala na bilang Hadi, asin dai na mahahaloy hahalion na niya an gabos niyang kaiwal. (Hebreo 10:12, 13) Anong nakakaugmang mga pangyayari an naghahalat sa sato?