Nahiling ni Jairo na pinaumayan ni Jesus an babaying pigdudugo. Kaya siguradong matatabangan man ni Jesus an aki niyang babayi, dawa ngani iniisip niya na ‘sa oras na ini posibleng gadan na an saiyang aki.’ (Mateo 9:18) Talaga daw na may magigibo pa sa aki niya?

Kan kaulay pa ni Jesus an babaying pinaumayan niya, may mga lalaking nag-arabot hali sa harong ni Jairo asin nagsabi sa saiya: “Gadan na po an aki mo! Taano ta aabalahon mo pa an Paratukdo?”—Marcos 5:35.

Mamunduon nanggad na bareta! An lalaking ini, na iginagalang na marhay asin maimpluwensiya sa komunidad, ngunyan biyong dai na nin maginibo. Gadan na an kasaro-sarui niyang aki. Pero, nadangog ni Jesus an bareta, kaya pinakusog niya an buot ni Jairo: “Dai ka matakot, magtubod ka sana.”—Marcos 5:36.

Dangan uminiba si Jesus ki Jairo papuli sa harong kaini. Pag-abot ninda, nahiling ninda an grabeng pagkariribok. An mga nagkatiripon duman naghihiribi saka nagtatarangis, asin pigtuturubtob an daghan ninda sa kamunduan. Naglaog si Jesus asin may sinabing nakakabigla: “An aki dai man nagadan kundi nagtuturog.” (Marcos 5:39) Kan madangog ini kan mga tawo, pigngirisihan ninda si Jesus. Aram nindang gadan na talaga an aki. Alagad, gamit an itinaong kapangyarihan nin Diyos, ipapahiling ni Jesus na posibleng mabuhay liwat an mga tawo hali sa mga gadan kun paanong puwede sindang pukawon sa nanok na pagturog.

Pinaluwas ni Jesus an gabos apuwera ki Pedro, Santiago, Juan, asin sa mga magurang kan gadan na aki. Iiniba ni Jesus an limang ini paduman sa namumugtakan kan aki. Dangan kinaputan niya an kamot kaini asin nagsabi: “‘Talitha cumi,’ na nangangahulugan: ‘Daragita, sinasabi ko sa saimo, “Magbangon ka!”’” (Marcos 5:41) Tulos ining nagbuhat asin naglakaw. Imahinara an labi-labing kaugmahan ni Jairo asin kan agom niya kan mahiling ini! Para urog pang patunayan na talagang buhay an aking babayi, sinabi ni Jesus na tawan ini nin makakakan.

Sa nainot na mga pangyayari, pinagbutan ni Jesus an mga pinaumayan niya na dai ipamareta kun ano an ginibo niya para sa sainda, asin iyan giraray an sinabi niya sa mga magurang na ini. Pero, ipinamareta iyan kan ugmahon na mga magurang saka kan iba pa “sa bilog na rehiyon na iyan.” (Mateo 9:26) Bako daw na maugma mo man na sasabihon sa iba kun mahiling mong binuhay liwat an saro sa mga mahal mo sa buhay? Ini an ikaduwang naisurat na pagbuhay liwat na ginibo ni Jesus.