Si Jesus asin an mga disipulo nag-abot sa Betsaida. Dangan dinara sa saiya an sarong lalaking buta asin nakimahirak sinda na dutan ini para paumayan.

Kinabit ni Jesus an lalaki asin dinara sa luwas kan baryo. Pagkalutab ni Jesus sa mata kan lalaki, hinapot niya ini: “May nahihiling ka?” Nagsimbag an lalaki: “May nahihiling akong mga tawo, pero garo sinda mga puon nin kahoy na nagraralakaw.” (Marcos 8:23, 24) Dinutan ni Jesus kan saiyang mga kamot an mga mata kan lalaki asin ibinalik an paghiling kaini. Dangan pinapuli niya an lalaking nakakahiling na nin malinaw, asin sinabihan na dai maglaog sa baryo.

Dangan, si Jesus asin an mga disipulo nagpanorte sa rehiyon nin Cesarea Filipos. Patukad ini nin mga 40 kilometros. An banwang iyan mas halangkaw nin 350 metros sa kapantayan kan dagat, asin sa norteng-sirangan kaiyan mahihiling an mas halangkaw pang Bukid nin Hermon, na natatakupan nin niyebe an alituktok. Aabuton nin mga duwang aldaw o labi pa an pagbaklay pasiring diyan.

May panahon kaidto na si Jesus nagrayo nguna sa mga disipulo para solong mamibi. Mga siyam o sampulong bulan na sana bago an saiyang kagadanan, kaya nahahadit siya sa mga disipulo. Dai pa sana nahahaloy, dakul an nagpundo sa pagsunod sa saiya, asin minalataw na an iba dai nakakasabot o kaya nadidisganar. Tibaad dai ninda maintindihan kun taano ta sinayumahan niya an pagmamaigot kan mga tawo na gibuhon siyang hadi o kun taano ta dai siya nagtao nin tanda para ipahiling nin daing kaduda-duda kun siisay talaga siya.

Kan magduman an mga disipulo sa lugar kun sain siya namimibi, si Jesus naghapot: “Ano an sinasabi nin mga tawo? Siisay daa an Aki nin tawo?” Nagsimbag sinda: “May mga nagsasabing si Juan Bautista, an iba man, si Elias, tapos an iba pa, si Jeremias daa o saro sa mga propeta.” Iyo, iniisip nin mga tawo na puwedeng saro talaga sa mga lalaking idto an binuhay liwat bilang si Jesus. Para masabi kan mga disipulo an iniisip ninda, hinapot sinda ni Jesus: “Pero para sa saindo, siisay ako?” Nagsimbag tulos si Pedro: “Ika an Cristo, an Aki kan buhay na Diyos.”—Mateo 16:13-16.

Sinabi ni Jesus na mag-ugma si Pedro huling ihinayag ini nin Diyos sa saiya, asin nagsabi pa: “Sinasabi ko man sa saimo: Ika si Pedro, asin sa gapong ini ititindog ko an sakong kongregasyon, asin dai iyan madadaog kan mga pintuan kan Lulubngan.” Sinasabi ni Jesus na siya mismo matindog nin sarong kongregasyon asin na dawa an Lulubngan dai makakabihag kan mga miyembro kaiyan kun magdadanay sindang maimbod digdi sa daga. Nangako siya ki Pedro: “Itatao ko sa saimo an mga liyabe kan Kahadian kan kalangitan.”—Mateo 16:18, 19.

Dai man tinawan ni Jesus si Pedro nin panginot na puwesto sa mga apostol, ni ginibo man niya siya bilang an pundasyon kan kongregasyon. Si Jesus mismo an Gapo kun sain ititindog an kongregasyon. (1 Corinto 3:11; Efeso 2:20) Pero, tatawan si Pedro nin tulong liyabe. Magkakapribilehiyo siyang buksan an oportunidad para sa mga grupo nin mga tawo na makalaog sa Kahadian kan kalangitan.

 An inot na liyabe gagamiton ni Pedro sa Pentecostes 33 C.E. para sa nagsusulsol na mga Judio asin mga proselito. An ikaduwang liyabe gagamiton niya para magkaoportunidad an nagtutubod na mga Samaritano na makalaog sa Kahadian. Dangan sa 36 C.E., gagamiton niya an ikatulong liyabe para magkaoportunidad man na makalaog sa Kahadian an bakong turing mga Hentil, na an inot kaiyan iyo si Cornelio saka an mga paryente niya pati haraning mga amigo.—Gibo 2:37, 38; 8:14-17; 10:44-48.

Napurisaw an mga apostol kan ihula ni Jesus an mga pagsakit asin kagadanan na sa dai mahahaloy aagihan niya sa Jerusalem. Huling dai nasabutan na bubuhayon liwat si Jesus pasiring sa langit, irinayo siya nin dikit ni Pedro asin sinaway, na sinasabi: “Mahirak ka sa sadiri mo, Kagurangnan; dai lamang ini mangyayari sa saimo.” Alagad nagtalikod si Jesus asin nagsimbag: “Pumundo ka, Satanas! Nakakaulang ka sa sako, ta an mga pig-iisip mo bakong sa Diyos, kundi sa tawo.”—Mateo 16:22, 23.

Apuwera sa mga apostol, inapod ngunyan ni Jesus an iba pa asin ipinaliwanag niya na dai magigin pasil na magin parasunod niya. Sinabi niya: “Kun an siisay man gustong magsunod sa sako, talikdan niya an saiyang sadiri saka pasanon an saiyang hariging pasakitan asin padagos siyang sumunod sa sako. Huli ta an siisay man na gustong magligtas kan saiyang buhay mawawaran kaiyan, alagad an siisay man na mawaran kan saiyang buhay nin dahil sa sako asin sa maugmang bareta makakapagligtas kaiyan.”—Marcos 8:34, 35.

Iyo, para uyunan ni Jesus, kaipuhan kan mga parasunod niya na magin makusog an buot asin mapagsakripisyo. Sinabi niya: “Kun may siisay man na ikinakasupog ako asin an sakuyang mga tataramon sa atubangan kan henerasyon na ini na makasalan asin bakong maimbod sa Diyos, ikakasupog man siya kan Aki nin tawo pag nag-abot na ini sa kamurawayan kan saiyang Ama kaiba an banal na mga anghel.” (Marcos 8:38) Iyo, pag nag-abot na si Jesus, “babalusan niya an lambang saro sigun sa saiyang paggawi.”—Mateo 16:27.