An milagrosong kakayahan ni Jesus na magpakakan nin rinibo nagkaigwa nin dakulang epekto sa mga tawo. Sinabi ninda na “iyo na talaga ini an Propeta na ihinulang madatong sa kinaban,” an Mesiyas, asin na siguradong magigin mahusay siyang tagapamahala. (Juan 6:14; Deuteronomio 18:18) Kaya nagplano an mga tawo na piriton si Jesus na magin hadi ninda.

Pero, aram ni Jesus kun ano an pinaplano kan mga tawo. Isinubol niya an mga tawo asin sinabihan an mga disipulo na maglunad na sa sakayan ninda. Masain sinda? Sa Betsaida dangan sa Capernaum. Pero si Jesus nagtukad sa bukid na siya sana tanganing mamibi kan bangging iyan.

Bago mismo an maagahon, mantang maliwanag pa an bulan, nahiling ni Jesus sa harayo an sakayan. Hinuhuyop kan makusog na duros an mga alon sa dagat, asin an mga apostol “nasasakitan sa pagsagwan, huli ta pasabat sa sainda an duros.” (Marcos 6:48) Nagbaba siya hali sa bukid asin naglakaw sa ibabaw kan mga alon parani sa sainda. Sa ngunyan ‘nakaabante na sinda nin mga lima o anom na kilometro.’ (Juan 6:19) Nahiling kan mga disipulo na garo baga lilihisan sana sinda ni Jesus, asin nagkururahaw sinda sa takot: “Totoo daw ining nahihiling mi?”—Marcos 6:49.

Tanganing mahali an takot ninda, nagsimbag si Jesus: “Kusugi an buot nindo! Ako ini; dai kamo matakot.” Pero nagsabi si Pedro: “Kagurangnan, kun ika iyan, sabihi ako na magdiyan sa saimo sa ibabaw kan tubig.” Nagsimbag si Jesus: “Madya!” Kaya nagbaba si Pedro sa sakayan saka naglakaw talaga sa ibabaw kan tubig pasiring ki Jesus. Alagad kan mahiling ni Pedro an alipuros, natakot siya asin nagpuon na maglubog. Nagkurahaw siya: “Kagurangnan, iligtas mo ako!” Inunat ni Jesus an saiyang kamot saka kinaputan si Pedro asin nagsabi: “Kakadikit kan saimong pagtubod. Taano ta nagduwa-duwa ka?”—Mateo 14:27-31.

Naglunad si Pedro saka si Jesus sa sakayan, asin nagpundo an alipuros. Napangalas an mga disipulo, pero dapat daw sindang magngalas? Kun sinda nakanuod sa “milagro sa mga tinapay,” na ginibo ni Jesus mga pirang oras pa sana an nakaagi kan pakakanon niya an rinibo, dai na kutana sinda nagngalas na kaya niyang maglakaw sa ibabaw kan tubig asin mapakalma an duros. Ngunyan nagruluhod sinda sa saiya, na nagsasabi: “Aki ka man nanggad nin Diyos.”—Marcos 6:52; Mateo 14:33.

Dai nahaloy nakaabot sinda sa magayon asin mabungang kapatagan kan Genesaret, sa timog kan Capernaum. Idinuong ninda an sakayan asin nagbaba sa baybayon. Namidbidan si Jesus kan mga tawo, dangan dinarara ninda sa saiya an mga may hilang, asin siring man an ginibo kan iba na hali sa mga lugar sa palibot. Kan madutan sana kan mga ini an gayad kan pang-ibabaw na bado ni Jesus, talagang narahay sinda.

Miyentras tanto, narealisar kan mga tawong nakahiling saka nagkabarasog sa milagrosong pagpakakan ni Jesus sa rinibo na naghali na siya. Kaya kan may mag-abot na saradit na sakayan hali sa Tiberias, nagrulunad sinda asin naglayag pasiring sa Capernaum para hanapon si Jesus. Kan manumpungan ninda siya, naghapot sinda: “Rabbi, kasuarin ka nag-abot digdi?” (Juan 6:25) May marahay na dahilan kun taano ta sinadol sinda ni Jesus, arog kan mahihiling ta.