Mga duwang taon nang maigot na naghuhulit si Jesus. Mapundo na daw siya asin mapahingalo? Dai, sa kabaliktaran, pinahiwas niya an saiyang paghuhulit paagi sa paglibot “sa gabos na siyudad asin baryo [kan Galilea], na nagtutukdo sa saindang mga sinagoga asin naghuhulit kan maugmang bareta kan Kahadian saka nagpapaumay nin gabos na klase nin hilang asin gabos na klase nin kamatian.” (Mateo 9:35) Nakumbinsir siya kan mga nahiling niya na kaipuhan na pahiwason an paghuhulit. Pero paano?

Sa paglibot ni Jesus, nahiling niya an mga tawong nangangaipo nin espirituwal na pagpaumay asin pagranga. Sinda arog nin mga karnero na daing pastor, na naanitan asin napabayaan. Nahirak siya sa sainda asin sinabi sa mga disipulo: “Tunay nanggad na kadakul kan aanihon, pero kakadikit kan paraani. Kun siring, makimahirak kamo sa Kagurangnan kan pag-ani na magsugo nin mga trabahador sa saiyang pagpaani.”—Mateo 9:37, 38.

Aram ni Jesus kun ano an makakatabang. Inapod niya an 12 apostol asin pinagpadis-padis para magin anom na padis nin mga parahulit. Dangan tinawan niya sinda nin malinaw na instruksiyon: “Dai kamo magduman sa mga tawo kan mga nasyon, asin dai kamo maglaog sa arin man na siyudad nin mga Samaritano; kundi padagos kamong magduman sa nawawarang mga karnero kan nasyon nin Israel. Sa pagduman nindo, maghulit kamo, na nagsasabi: ‘An Kahadian kan kalangitan harani na.’”—Mateo 10:5-7.

An Kahadian na ihuhulit ninda iyo idtong sinambit ni Jesus sa modelong pamibi. ‘An Kahadian harani na,’ buot sabihon, an itinalaga nin Diyos na magin Hadi, si Jesu-Cristo, yaon na. Pero ano an magpapatunay na an mga disipulo talagang mga representante kan Kahadian na ini? Tinawan sinda ni Jesus  nin kapangyarihan na magpaumay nin mga may hilang asin bumuhay pa ngani nin mga gadan, gabos ini daing bayad. Pero, paano man an personal na pangangaipo kan mga apostol, siring kan kakanon sa aroaldaw?

Sinabi ni Jesus sa mga disipulo na dai sinda magdara nin materyal na mga kakaipuhanon sa paglibot para maghulit. Dai ninda kaipuhan na magdara nin bulawan, pirak, o tanso para sa saindang mga lalagan nin kuwarta. Dai man ninda kaipuhan nin lalagan nin kakanon para sa pagbaklay o nin duwang bado o sandalyas. Taano ta dai? Sinigurado sa sainda ni Jesus: “An trabahador maninigong tawan nin kakanon.” (Mateo 10:10) An mga tawong manunumpungan ninda na maako kan mensahe an matao kan panginot na mga pangangaipo ninda. Sinabi ni Jesus: “Sain man na lugar na padaguson kamo sa harong, magdanay kamo diyan sagkod na maghali kamo sa lugar na iyan.”—Marcos 6:10.

Nagtao man si Jesus nin instruksiyon kun paano madulok sa mga kagharong dara an mensahe kan Kahadian: “Sa paglaog nindo sa harong, magtaong galang kamo sa mga nakaistar diyan. Kun an harong na iyan maninigo, pabayai na mapasa-harong na iyan an katuninungan na minamawot nindo; pero kun iyan bakong maninigo, pabayai na bumalik sa saindo an katuninungan na iyan. Sain man na lugar, kun may siisay man na dai mag-ako sa saindo o dai magdangog sa mga tataramon nindo, paghali nindo sa harong na iyan o sa siyudad na iyan, pagpagon nindo an alpog sa saindong mga bitis.”—Mateo 10:12-14.

Tibaad sarong bilog na siyudad pa ngani o baryo an dai mag-ako sa mensahe ninda. Ano an magigin kahulugan kaini para sa arog kaiyan na lugar? Ihinayag ni Jesus na maresulta iyan sa kapahapa-hamak na paghukom. Nagpaliwanag siya: “Sinisigurado ko sa saindo, sa Aldaw nin Paghukom, mas kahihirakan pa an Sodoma asin Gomora kisa sa siyudad na iyan.”—Mateo 10:15.