Magkakaiba an reaksiyon nin mga tawo sa sinasabi asin ginigibo ni Jesus depende sa kamugtakan kan puso ninda. Nagin malinaw iyan sa sarong harong sa Galilea. Inimbitaran si Jesus kan Fariseong si Simon na magkakan, tibaad para mas mamidbid kaini an saro na naggigibo nin mga milagro. Posibleng marhay na inisip ni Jesus na pagkakataon ini para makapagtukdo sa mga yaon duman, kaya inako niya an imbitasyon, kun paanong sa ibang mga pagkakataon inako man niya an imbitasyon na magkakan kaiba kan mga parasingil nin buhis asin mga parakasala.

Pero, dai si Jesus tinawan nin mainit na pag-asikaso na sa parati ginigibo sa mga bisita. Sa maalpog na mga tinampo sa Palestina, nagigin mainit asin maati an mga bitis na nakasandalyas, kaya sarong kostumbre nin pagkamapag-istimar na hanawan nin malipot na tubig an mga bitis kan bisita. Dai iyan ginibo ki Jesus. Dai man siya hinadukan bilang pag-ako sa saiya, siring sa napagkatudan. An saro pang kostumbre iyo an pagbubo nin lana sa buhok kan bisita bilang pagpahiling nin kabuutan asin pagkamapag-istimar. Dai man ini ginibo ki Jesus. Kaya talaga daw na mainit an pag-ako sa saiya?

Nakaturukaw na sa may lamesa an mga bisita asin nagpuon na an karakanan. Mantang nagkakarakan, sarong babaying dai imbitado an silensiyong naglaog sa kuwarto. Siya “midbid sa siyudad bilang parakasala.” (Lucas 7:37) An gabos na bakong perpektong tawo mga parakasala, pero minalataw na an babaying ini namumuhay nin imoral, na tibaad sarong hostes. Puwedeng nadangog niya an mga katukduan ni Jesus, pati na an saiyang imbitasyon para sa ‘gabos na nagagabatan na magduman sa saiya para maginhawahan.’ (Mateo 11:28, 29) Minalataw na an babaying ini napahiro kan mga sinabi asin ginibo ni Jesus, kaya hinanap siya kaini ngunyan.

Nagduman siya sa likod ni Jesus sa may lamesa asin nagluhod sa pamitisan kaini. Nagtururo an luha niya sa mga bitis ni Jesus, asin pinunasan niya iyan kan saiyang buhok. Hinadukan man niya an mga bitis ni Jesus asin binubuan iyan kan pahamot na lanang binakal niya. Dai ini nagustuhan ni Simon, na nagsabi sa sadiri: “Kun talagang propeta an lalaking ini, dapat aram niya kun siisay asin kun anong klaseng babayi an nagduduot sa saiya, na siya parakasala.”—Lucas 7:39.

Huling aram ni Jesus an iniisip ni Simon, siya nagsabi: “Simon, may sasabihon ako sa saimo.” Nagsabi ini: “Paratukdo, ano idto?” Nagpadagos si Jesus: “Duwang tawo an may utang sa sarong nagpapautang; an saro may utang na 500 na denario, pero an saro 50. Kan mayo sindang ano man na ikakabayad sa saiya, pareho niya sindang pinatawad nin lubos. Kun siring, siisay sa sainda an urog na mamumuot sa saiya?” Posibleng bako man gayong interesado si Simon kan siya magsimbag: “Sa hiling ko, idtong pinatawad niya nin mas dakula.”—Lucas 7:40-43.

Nag-uyon si Jesus. Dangan naghiling siya sa babayi asin sinabi ki Simon: “Nahihiling mo an babaying ini? Naglaog ako sa harong mo; dai mo ako tinawan nin tubig para sa mga bitis ko. Alagad binasa kan babaying ini kan saiyang luha an mga bitis ko asin pinunasan iyan kan saiyang buhok. Dai mo ako hinadukan, pero an babaying ini, puon kan oras na maglaog ako, dai nagpundo sa kahahadok sa sakuyang mga bitis. Dai ka nagbubo nin lana sa sakuyang payo, pero an babaying ini nagbubo nin pahamot na lana sa mga bitis ko.” Nahihiling ni Jesus na udok sa pusong pinagsusulsulan kan babayi an imoral niyang pamumuhay. Kaya nagsabi siya: “Sinasabi ko sa saimo, an mga kasalan niya, maski ngani kadakul, pinatawad na, huli ta nagpahiling siya nin dakulang pagkamuot. Alagad an pinatawad nin dikit, nagpapahiling nin dikit na pagkamuot.”—Lucas 7:44-47.

Dai man kinokonsinte ni Jesus an imoralidad. Imbes, nagmamalasakit siya saka nasasabutan niya an mga nakagibo nin magagabat na pagkakasala pero nagsusulsol na asin minadulok sa saiya para maginhawahan. Asin naginhawahan nanggad an babayi kan sabihon ni Jesus: “Pinatawad na an mga kasalan mo. . . . Ilinigtas ka kan pagtubod mo; magpuli ka na asin dai ka na mahadit.”—Lucas 7:48, 50.