Pakatao ni Jesus kan Sermon sa Bukid, nagpasiring siya sa Capernaum. Digdi nagdulok sa saiya an nagkapirang kamagurangan kan mga Judio. Isinubol sinda nin sarong Romanong opisyal nin hukbo, na sarong senturyon.

An namumutan na uripon kan opisyal na ini grabe an hilang saka magagadan na. Dawa ngani Hentil siya, hinahagad niya an tabang ni Jesus. Sinabi kan mga Judio ki Jesus na an suruguon kan lalaki “nakahigda na lang sa harong huling paralisado, asin grabe an pagsakit niya,” na posibleng nakakamati nin grabeng kulog. (Mateo 8:6) Sinigurado kan kamagurangan na Judio ki Jesus na an opisyal angay na gibuhan kan siring na pabor, dahil an paliwanag ninda: “Namumutan niya an satuyang nasyon asin siya an nagpatugdok kan samong sinagoga.”—Lucas 7:4, 5.

Nag-iba tulos si Jesus sa kamagurangan pasiring sa harong kan opisyal. Kan harani na sinda, an opisyal nagsubol nin mga amigo para magsabi: “Ginoo, dawa dai ka na tabi magdiretso. Bako kaya akong angay na padaguson ka sa sakuyang harong. Iyan an dahilan kaya inisip kong bako man akong angay na magdiyan sa saimo.” (Lucas 7:6, 7) Mapakumbaba nanggad dawa tuod nang magmando! Asin ipinapahiling kaini na ibang-iba an lalaking ini sa mga Romano na nagmamaltrato sa mga uripon.—Mateo 8:9.

Daing duda na aram kan senturyon na an mga Judio dai nakikiiba-iba sa bakong mga Judio. (Gibo 10:28) Posibleng ini an nasa isip niya kaya nagsubol siya nin mga amigo para pakiulayan si Jesus: “Sabihon mo an tataramon, asin paumayan mo man lugod an suruguon ko.”—Lucas 7:7.

Napangalas si Jesus digdi kaya nagsabi siya: “Sasabihon ko sa saindo, maski sa Israel dai pa akong nahiling na arog kaiyan kadakulang pagtubod.” (Lucas 7:9) Pagbalik sa harong kan senturyon, naaraman kan mga amigo niya na rahay na an uripon.

Pakatapos tulos kaini, ginamit ni Jesus an pagkakataon para siguraduhon na an may pagtubod na bakong mga Judio magkakamit nin mga bendisyon, na sinasabi: “Dakul hali sa sirangan asin sa sulnupan an maarabot saka maturukaw tanganing magkakan sa lamesa kaiba ni Abraham asin Isaac saka Jacob sa Kahadian kan kalangitan.” Kumusta man an daing pagtubod na mga Judio? Sinda “iaapon sa kadikluman sa luwas. Duman mangyayari an saindang pagtangis asin an pagragot kan saindang mga ngipon.”—Mateo 8:11, 12.

Huli kaini, isisikwal an mga Judio sa laman na nagsayuma sa pagkakataon na magin kabtang kan Kahadian kaiba ni Cristo na inot na iinalok sa sainda. Pero an mga Hentil aakuon tanganing magturukaw para magkakan sa saiyang lamesa, sabi ngani, “sa Kahadian kan kalangitan.”