Kan nasa Jerusalem pa si Jesus para sa Kapiyestahan nin mga Tabernakulo (o, Payag-payag), nagpadagos siya sa pagtukdo nin mahahalagang marhay na katotoohan. May mga Judio duman na nagsabi sa saiya: “Mga aki kami ni Abraham asin dai kami kasuarin man nagin uripon.” Nagsimbag siya: “Aram kong mga aki kamo ni Abraham. Alagad pighihinguwa nindo akong gadanon, huli ta an sakuyang tataramon dai nagkakaigwa nin lugar diyan sa saindo. Itinataram ko an mga bagay na nahiling ko kan kaibanan ako kan Ama, alagad ginigibo nindo an mga bagay na nadadangog nindo sa saindong ama.”—Juan 8:33, 37, 38.

Malinaw an punto ni Jesus: Iba man an Ama niya sa ama ninda. Huling dai aram an buot sabihon ni Jesus, inutro kan mga Judio an paghihingako ninda: “Si Abraham an samuyang ama.” (Juan 8:39; Isaias 41:8) Sinda literal na naggikan sa saiya. Kaya iniisip ninda na an saindang sinasamba iyo man an Diyos ni Abraham, an amigo nin Diyos.

Pero, nagtao si Jesus nin nakakabiglang simbag: “Kun mga aki kamo ni Abraham, ginigibo dapat nindo an mga gibo ni Abraham.” Iyo, an tunay na aki inaarog an saiyang ama. “Pero ngunyan pighihinguwa nindo akong gadanon,” an sabi pa ni Jesus, “ako na nagsasabi sa saindo kan katotoohan na nadangog ko sa Diyos. Dai ini ginibo ni Abraham.” Dangan napaisip an mga Judio kan sabihon niya: “Ginigibo nindo an mga gibo kan saindong ama.”—Juan 8:39-41.

Dai pa man giraray masabutan kan mga Judio kun siisay an pinapanungdan ni Jesus. Naghingako sinda na lehitimo sindang mga aki: “Dai kami ipinangaki bunga nin imoralidad; may saro kaming Ama, an Diyos.” Pero an Diyos daw talaga an Ama ninda? “Kun an Diyos an saindong Ama,” an sabi ni Jesus, “mamumutan nindo ako, huli ta naggikan ako sa Diyos asin yaon ako digdi. Dai ako nagdatong sa sadiri kong kabutan, kundi isinugo Niya ako.” Naghapot si Jesus asin siya mismo an nagsimbag: “Ano ta dai nindo nasasabutan an sinasabi ko? Dahil habo nindong dangugon an tataramon ko.”—Juan 8:41-43.

Hinihinguwa ni Jesus na ipahiling an kaaabtan ninda sa pagsikwal sa saiya. Pero prangkahan niyang sinabi: “Gikan kamo sa saindong amang Diyablo, asin gusto nindong gibuhon an mga mawot kan saindong ama.” Anong klase an ama ninda? Malinaw siyang ipinamidbid ni Jesus: “An sarong iyan paragadan puon sa kapinunan, asin dai siya nanindugan sa katotoohan.” Sinabi pa ni Jesus: “An saro na gikan sa Diyos naghihimati sa mga tataramon nin Diyos. Ini an dahilan kaya dai kamo naghihimati, huli ta bako kamong gikan sa Diyos.”—Juan 8:44, 47.

An pagkondenar na iyan nakapaanggot sa mga Judio, na nagsimbag: “Bakong tama an sabi mi, ‘Samaritano ka asin igwa ka nin demonyo’?” An pag-apod ninda ki Jesus na sarong “Samaritano” sarong pang-iinsulto. Pero binaliwala ini ni Jesus, asin nagsimbag: “Mayo akong demonyo, kundi tinatawan ko nin onra an sakuyang Ama, asin rinaraot nindo an sakong reputasyon.” Seryosong bagay ini huling pambihira an ipinanuga ni Jesus: “Kun an siisay man nag-uutob kan sakuyang tataramon, dai siya nuarin man magagadan.” Dai niya buot sabihon na an mga apostol asin iba pa na nagsusunod sa saiya literal na dai nuarin man magagadan. Imbes, dai ninda nuarin man kaaabtan an daing sagkod na kalaglagan, an “ikaduwang kagadanan,” na daing paglaom nin pagkabuhay liwat.—Juan 8:48-51; Kapahayagan 21:8.

Pero literal an pakaintindi kan mga Judio sa sinabi ni Jesus, na nagsarabi: “Ngunyan aram mi nang igwa ka talaga nin demonyo. Nagadan si Abraham, pati na an mga propeta, pero sinasabi mo, ‘Kun an siisay man nag-uutob kan sakuyang tataramon, dai siya nuarin man magagadan.’ Ano mas urog ka pa sa samuyang amang si Abraham? Nagadan siya . . . Siisay ka man sa paghuna mo?”—Juan 8:52, 53.

Risang-risa na idinuduon ni Jesus an punto na siya an Mesiyas. Pero imbes na direktang simbagon an hapot ninda dapit sa kun siisay siya, sinabi niya: “Kun ako an nagpapamuraway sa sadiri ko, daing saysay an sakong kamurawayan. An sakuyang Ama an nagpapamuraway sa sako, an saro na sinasabi nindo na saindong Diyos. Pero dai nindo siya midbid,  alagad midbid ko siya. Asin pag ako nagsabing dai ko siya midbid, ako magigin putikon arog nindo.”—Juan 8:54, 55.

Binalikan giraray ngunyan ni Jesus an halimbawa kan maimbod nindang apuon: “An saindong amang si Abraham naugmang marhay sa paglaom na mahiling an sakuyang aldaw, asin nahiling niya iyan asin nag-ugma siya.” Iyo, huling nagtitiwala sa panuga nin Diyos, naglaom si Abraham na maabot an Mesiyas. “Dai ka pa ngani 50 anyos, tapos nahiling mo na si Abraham?” an simbag kan mga Judio na dai makapaniwala. Si Jesus nagsimbag: “Sinisigurado ko sa saindo, bago pa nabuhay si Abraham, buhay na ako.” Pinapanungdan niya an saiyang buhay bago nagin tawo bilang makapangyarihan na espiritu sa langit.—Juan 8:56-58.

Naanggot an mga Judio sa sinabi ni Jesus na nabuhay na siya bago pa si Abraham, kaya nagpururot sinda nin gapo para gapuon siya. Pero nakahali siya na dai nakulgan.