Sa dakul na paagi, hininguwa ni Jesus na pukawon an buot kan mga tawo na pag-isipan an relasyon ninda sa Diyos. Nagibo niya liwat iyan pakatapos makipag-ulay sa mga tawong nasa luwas kan harong nin sarong Fariseo.

May mga nagsambit nin makangingirhat na pangyayari. Sinambit ninda an “mga taga Galilea na ipinagadan [ni Poncio] Pilato miyentras na nagdudulot kan saindang mga atang.” (Lucas 13:1) Ano an buot nindang sabihon?

Posibleng sinda an mga ginadan kan nagprotesta ki Pilato an rinibong Judio huli sa paggamit niya kan kontribusyon hali sa templo para magpatugdok nin pasulugan na madara nin tubig sa Jerusalem. Posibleng nakua ni Pilato an kuwarta huli sa pakikikooperar kan mga awtoridad sa templo. Tibaad iniisip kan mga nag-istorya kan trahedyang ini na nagkagaradan an mga taga Galileang idto huli sa maraot nindang mga gibo. Dai nag-uyon si Jesus.

Naghapot siya: “Iniisip daw nindo na an mga taga Galileang idto mas makasalan kisa sa gabos na iba pang taga Galilea dahil nangyari ini sa sainda?” An simbag niya bako. Pero ginamit niya an pangyayaring ini para patanidan an mga Judio: “Kun dai kamo magsulsol, magkakagaradan man kamo gabos.” (Lucas 13:2, 3) Dangan sinambit ni Jesus an saro pang trahedya na posibleng nangyari dai pa sana nahahaloy asin tibaad konektado man sa pagpatugdok kan pasulugan nin tubig na iyan. Naghapot siya:

“O idtong 18 na narumpagan kan tore sa Siloam asin nagkagaradan—iniisip daw nindo na mas grabe an kasalan ninda kisa sa gabos na iba pang tawo na nakaistar sa Jerusalem?” (Lucas 13:4) Puwedeng iniisip kan mga tawo na nagadan an mga indibidwal na idto huling may ginibo sindang kasalan. Sa giraray, dai nag-uyon si Jesus. Aram niyang nagkakaigwa nin “kapaha-pahamak na panahon asin dai inaasahan na mga pangyayari” asin posibleng marhay na iyan man an dahilan kan trahedyang ini. (Eclesiastes 9:11) Pero, dapat na makanuod an mga tawo sa pangyayaring ini. “Kun dai kamo magsulsol, gabos kamo magkakagaradan, arog ninda,” an sabi ni Jesus. (Lucas 13:5) Pero taano ta idinuduon niya ngunyan an leksiyon na ini?

May koneksiyon iyan sa halipot na sanang panahon na natatada sa ministeryo niya, asin para ipaliwanag ini, naggamit siya nin ilustrasyon: “May sarong tawo na igwa nin puon nin higera sa saiyang ubasan, asin hiniling niya kun may bunga iyan alagad dai siyang nakua. Dangan sinabi niya sa nag-aataman kan ubasan, ‘Tulong taon na akong nagpaparadigdi tanganing hilingon kun may bunga an higerang ini, pero dai akong nakukua. Paluda na ini! Ano ta papabayaan na masayang ining dagang natatanuman kaini?’ Bilang simbag sinabi kaini sa saiya, ‘Kagurangnan, pabayai nguna iyan nin saro pang taon, sagkod na makalutan ko iyan sa palibot asin malagan nin pataba. Pagkatapos, kun magbunga iyan, di marahay; pero kun dai, paludon na iyan.’”—Lucas 13:6-9.

Labi nang tulong taon na hinihinguwa ni Jesus na patalubuon an pagtubod kan mga Judio. Pero, medyo dikit sana an nagin mga disipulo na masasabing bunga kan pagpapagal niya. Ngunyan, sa ikaapat na taon kan saiyang ministeryo, mas dinadagdagan pa niya an paghihinguwa. Garo man sana siya nagkakalot asin naglalaag nin abono sa palibot kan arog-puon nin higerang banwaan nin mga Judio paagi sa paghuhulit asin pagtutukdo sa Judea asin Perea. Ano an nagin resulta? Dikit sanang mga Judio an naghimati. Sa kabilugan, nagsayumang magsulsol an nasyon asin nakatagama na ngunyan sa kalaglagan.

 An dai paghimati kan kadaklan malinaw na nahiling giraray kan aldaw nin Sabbath dai nahaloy pakalihis kaini. Si Jesus nagtutukdo sa sarong sinagoga. May nahiling siyang babayi na 18 taon nang buktot huling pinapasakitan nin demonyo. Nahirak si Jesus, kaya sinabi niya sa saiya: “Babayi, pinaumayan ka na sa saimong pangluluya.” (Lucas 13:12) Kinaputan niya ini, asin tulos ining nagtindog nin tanos asin nagpuon na magpamuraway sa Diyos.

Nakapaanggot iyan sa namamayo sa sinagoga, na nagsabi: “May anom na aldaw na puwedeng magtrabaho; sa mga aldaw na iyan kamo magdigdi tanganing paumayan kamo, bakong sa aldaw nin Sabbath.” (Lucas 13:14) Dai pigninigaran kan namamayo na may kapangyarihan si Jesus na magpaumay; imbes, kinokondenar niya an mga tawo huli sa pagduman ninda tanganing paumayan sa aldaw nin Sabbath! Nagsimbag si Jesus gamit an malinaw na pangangatanusan: “Mga parasagin-sagin, bakong pag Sabbath an lambang saro sa saindo hinuhubadan sa pagkakagakod an saiyang toro o asno hali sa kuwadra asin ginuguyod iyan tanganing parârâon? Bako daw na an babaying ini, na sarong aki ni Abraham asin 18 taon nang ginapos ni Satanas, dapat man na patalingkason sa gapos na ini sa aldaw nin Sabbath?”—Lucas 13:15, 16.

Nagkasurupog an mga nagkokontra, pero an mga tawo nag-urugma sa gabos na makangangalas na bagay na nahiling nindang ginibo ni Jesus. Dangan inutro ni Jesus digdi sa Judea an duwang makahulang ilustrasyon mapadapit sa Kahadian, na sinambit na niya kaidtong nakalunad siya sa sakayan sa Dagat kan Galilea.—Mateo 13:31-33; Lucas 13:18-21.