1. Kan magtiripon an mga disipulo, anong tabang an itinao sa sainda, asin taano ta kaipuhan ninda iyan?

 DAI nahaloy pagkabuhay liwat ki Jesus, nagtiripon an mga disipulo para magparinigunan. Pero huli sa takot sa mga kaiwal, binaratan ninda an mga pinto. Siguradong nawara an takot ninda kan magpahiling si Jesus sa tahaw ninda dangan magsabi: ‘Akua nindo an banal na espiritu.’ (Basahon an Juan 20:22.) a Pakalihis nin mga aldaw, nagtiripon giraray sinda dangan ibinubo sa sainda ni Jehova an banal na espiritu. Natawan nanggad sinda nin kusog para sa paghuhulit na gigibuhon ninda!—Gui. 2:1-7.

2. (a) Paano kita tinatawan ni Jehova nin kusog, asin taano ta kaipuhan niyato iyan? (b) Taano ta mahalagang marhay an Pampamilyang Pagsamba? (Hilingon an nota sa ibaba asin an kahon na “ Pampamilyang Pagsamba,” pahina 175.)

² Napapaatubang man kita sa mga kadipisilan na kaagid kan sa mga tugang ta kan inot na siglo. (1 Ped. 5:9) Kun beses, an nagkapira sa sato nakakamati nin pagkatakot sa tawo. Asin kaipuhan ta an kusog na itinatao ni Jehova para makapagpadagos sa paghuhulit. (Efe. 6:10) Itinatao ni Jehova an kadaklan kan kusog na iyan paagi sa mga pagtiripon ta. Sa presente, may oportunidad kitang mag-atender sa duwang semanal na nakakapagtukdong pagtiripon—an Pampublikong Pagtiripon, saka Pag-adal sa Torrengbantayan, asin an pagtiripon niyato sa tahaw kan semana na inaapod na An Satong Kristiyanong Pamumuhay Asin Ministeryo. b Igwa man kita nin apat na taunan na okasyon—pangrehiyon na kumbensiyon, duwang pansirkitong asembleya, asin Memoryal kan kagadanan ni Cristo. Taano ta mahalagang marhay na kita mag-atender sa gabos na pagtiripon? Ano an kasaysayan kan mga pagtiripon ta sa presenteng panahon? Asin ano an ihinahayag dapit sa sato kan atitud ta sa mga pagtiripon?

3, 4. Ano an kahagadan ni Jehova sa mga lingkod niya? Magtao nin mga halimbawa.

³ Haloy nang kahagadan ni Jehova sa mga lingkod niya na magtiripon para sambahon siya. Halimbawa, kan 1513 B.C.E., itinao niya an saiyang Ley sa nasyon nin Israel, asin kaiba diyan an semanal na Sabbath tanganing an kada pamilya magsamba sa saiya saka matukduan dapit sa Ley. (Deut. 5:12; 6:4-9) Pag sinusunod kan mga Israelita an pagbuot na iyan, napapakusog an mga pamilya asin an nasyon sa kabilugan nagdadanay na malinig saka makusog sa espirituwal. Pag dai isinasagibo kan nasyon an Ley asin pinapabayaan an mga kahagadan siring kan regular na pagtiripon para sambahon  si Jehova, nawawara ninda an pag-uyon nin Diyos.—Lev. 10:11; 26:31-35; 2 Cron. 36:20, 21.

⁴ Isip-isipa man an halimbawa na ipinahiling ni Jesus. Surusemana siyang nagpapasinagoga sa aldaw nin Sabbath. (Luc. 4:16) Pagkagadan asin pagkabuhay liwat ki Jesus, padagos na nagtiripon nin regular an mga disipulo dawa ngani bako na sindang sakop kan ley nin Sabbath. (Gui. 1:6, 12-14; 2:1-4; Roma 14:5; Col. 2:13, 14) Sa mga pagtiripon na iyan, dai sana tinutukduan asin pinaparigon an inot na siglong mga Kristiyano kundi nagdudulot man sinda nin mga atang nin pag-umaw sa Diyos paagi sa pamimibi, pagkomento, saka pag-awit.—Col. 3:16; Heb. 13:15.

5. Taano ta nag-aatender kita sa semanal na mga pagtiripon saka taunan na asembleya asin kumbensiyon? (Hilingon man an kahon na “ Mga Pagtiripon na Nakakapagpasararo sa mga Lingkod nin Diyos.”)

⁵ Kaagid kaiyan, kun nag-aatender kita sa semanal na mga pagtiripon saka taunan na asembleya asin kumbensiyon, ipinapahiling ta an suporta sa Kahadian nin Diyos, nag-aako kita nin kusog hali sa banal na espiritu, pati napaparigon niyato an iba paagi sa satong mga kapahayagan nin pagtubod. An mas mahalaga pa, may oportunidad kitang sambahon si Jehova paagi sa pamimibi, pagkomento, asin pag-awit. An areglo kan satong mga pagtiripon tibaad lain man sa mga pagtiripon kaidto kan mga Israelita asin kan inot na siglong mga Kristiyano, pero mahalaga iyan arog kaidto. Ano an kasaysayan kan mga pagtiripon ta sa presenteng panahon?

6, 7. (a) Ano an katuyuhan kan satong mga pagtiripon? (b) Paano nagin magkalain-lain an mga pagtiripon kan kada grupo?

⁶ Kan punan ni Brother Charles Taze Russell na siyasaton an katotoohan sa Tataramon nin Diyos, nahiling niya an pangangaipo na makipagtipon sa iba na may kaparehong katuyuhan. Kan 1879, nagsurat siya: “Ako, pati an mga kairiba ko sa  Pittsburgh, nag-organisar nin regular na klase sa pag-adal sa Bibliya para siyasaton an Kasuratan, asin nagtitiripon kami kada Domingo.” Dinagka an mga nagbabasa kan Zion’s Watch Tower na magtiripon, kaya kan 1881, may mga pagtiripon na sa Pittsburgh, Pennsylvania, kada Domingo saka Miyerkules. Sinabi kan Watch Tower na Nobyembre 1895 na an katuyuhan kan mga pagtiripon iyo na pakusugon an “Kristiyanong pag-iribanan, pagkamuot asin asosasyon” saka tanganing matawan nin oportunidad na magparinigunan an mga nag-aatender.—Basahon an Hebreo 10:24, 25.

⁷ Sa dakul na taon, magkalain-lain an areglo saka kun gurano kaparati ginigibo an mga pagtiripon kan kada grupo nin Mga Estudyante sa Bibliya. Halimbawa, nagsabi an sarong surat hali sa sarong grupo sa Estados Unidos na ipinublikar kan 1911: “Kisiyera lima an pagtiripon mi kada semana.” Nagtitiripon sinda kada Lunes, Miyerkules, Biyernes, asin duwang beses pag Domingo. Nagsabi an saro pang surat, hali sa sarong grupo sa Aprika, na ipinublikar kan 1914: “Duwang beses an pagtiripon mi kada bulan, puon Biyernes sagkod Domingo.” Pero pag-abot nin panahon, nagkaigwa kita nin bagong format nin mga pagtiripon. Aramon ta nin halipot sana an kasaysayan kan kada saro kaiyan.

8. Ano an nagkapirang tema kan pampublikong mga diskurso kaidto?

⁸ Pampublikong Pagtiripon. Kan 1880, an kasunod na taon kan punan ni Brother Russell an pagpublikar kan Zion’s Watch Tower, sinunod niya an halimbawa ni Jesus asin nagbiyahe para maghulit. (Luc. 4:43) Sa paggibo kaiyan, itinao niya an arugan para sa Pampublikong Pagtiripon ta sa presente. Ipinaisi sa Watch Tower an pagbiyahe, asin sinabi kaiyan na “mauugma [si Russell] na ipahayag sa mga pampublikong pagtiripon an dapit sa ‘Mga bagay manungod sa kahadian nin Diyos.’” Kan 1911, pagkatapos magkaigwa nin mga klase, o kongregasyon, sa nagkapirang nasyon, dinagka an kada klase na magpadara nin mahuhusay na ispiker sa karaning mga lugar para magtao nin sarong serye nin anom na diskurso dapit sa mga topiko na arog nin paghukom asin pantubos. Pagkatapos kan kada pahayag, ipinapaisi kun siisay an ispiker asin kun ano an tema kan pahayag sa sunod na semana.

9. Paano nagbago an Pampublikong Pagtiripon sa paglihis nin mga taon, asin paano mo masusuportaran an pagtiripon na ini?

⁹ Kan 1945, ipinaisi kan The Watchtower an pagpuon nin kampanya sa bilog na kinaban na diyan ipapahayag sa Pampublikong Pagtiripon an sarong serye nin walong diskurso sa Bibliya dapit sa “mga problema sa presenteng panahon na kaipuhan na tawan tulos nin atensiyon.” Sa dakul na dekada, an ipinapahayag kan asignadong mga ispiker bako sana an mga topikong hali sa maimbod na uripon kundi pati an mga pahayag na sinda mismo an naggibo. Pero kan 1981, ininstruksiyunan an gabos na ispiker na ibasar an pahayag ninda sa mga outline na ipinapadara sa mga kongregasyon. c Bago 1990, an nagkapirang outline sa pampublikong diskurso may mga demonstrasyon o partisipasyon nin mga nagdadangog; pero nagkaigwa nin pagliliwat kan taon na iyan, kaya puon kaidto  an mga pampublikong diskurso nagin nang diretsong pahayag. May pagliliwat pa kan Enero 2008 kan gibuhon na 30 minutos an 45 minutos na pampublikong pahayag. Dawa ngani may mga pagbabago sa format, an inandam na marhay na mga pampublikong pahayag padagos na nagpapakusog sa pagtubod ta sa Tataramon nin Diyos asin nag-eedukar sa sato dapit sa lain-lain na aspekto kan Kahadian nin Diyos. (1 Tim. 4:13, 16) Gustong-gusto mo daw na imbitaran an saimong mga dinadalaw liwat asin an iba pang bakong Saksi para magdangog sa mahahalagang pahayag na basado sa Bibliya?

10-12. (a) Ano an nagin mga pagliliwat sa Pag-adal sa Torrengbantayan? (b) Ano an marahay na ihapot mo sa sadiri?

¹⁰ Pag-adal sa Torrengbantayan. Kan 1922, an mga brother na inaapod na pilgrim—mga ministro na ipinapadara kan Watch Tower Society para magpahayag sa mga kongregasyon asin manginot sa paghuhulit—nagrekomendar na magkaigwa nin regular na pagtiripon para sa pag-adal kan The Watch Tower. Sinunod an suhestiyon na ini, asin kan primero, ginigibo an pag-adal sa tahaw kan semana o kun Domingo.

¹¹ Kan Hunyo 15, 1932, nagtao an Watchtower nin dugang pang instruksiyon kun paano ini gigibuhon. An ginamit na halimbawa sa artikulo iyo an pag-adal na ginigibo sa Bethel, asin sinabi kaiyan na sarong brother an manginginot diyan. Tulong brother an matukaw sa inutan asin masurusalida sa pagbasa kan mga parapo. Mayong imprentadong hapot sa mga artikulo kaidto, kaya ininstruksiyunan an namamayo na hagadon sa mga nagdadangog na magpalataw nin mga hapot dapit sa pinag-aadalan. Pagkatapos, aapudon niya an gustong magsimbag. Kun kaipuhan nin dugang pang paglilinaw, ininstruksiyunan an namamayo na magtao nin “halipot asin malinaw” na paliwanag.

¹² Kan primero, tinutugutan an kada kongregasyon na iyo an magpili kan isyu kan magasin na gustong pag-adalan kan  kadaklan. Pero, isinuherir kan Watchtower na Abril 15, 1933 na an pinakabagong isyu an gamiton kan gabos na kongregasyon. Kan 1937, nagkaigwa nin instruksiyon na Domingo na gigibuhon an pag-adal. Ipinublikar sa Watchtower na Oktubre 1, 1942 an dugang pang pagliliwat sa pagtiripon, na iyo na an ginigibo ta sagkod ngunyan. Inot, ipinaisi kaiyan na magkakaigwa nin imprentadong mga hapot sa ibabang parte kan kada pahina kan artikulong pag-aadalan, na iyo an gagamiton. Dangan, sinabi kaiyan na maninigo na sarong oras an pagtiripon. Dinagka man kaiyan an mga masimbag na magkomento “sa sadiri nindang tataramon” imbes na basahon sa parapo an simbag. An Pag-adal sa Torrengbantayan iyo pa man giraray an panginot na pagtiripon na ginagamit kan maimbod na uripon sa pagtao nin espirituwal na kakanon sa tamang panahon. (Mat. 24:45) Marahay na ihapot kan lambang saro sa sato: ‘Nagpepreparar daw ako para sa pag-adal sa Torrengbantayan kada semana? Asin naghihinguwa daw akong magkomento kun nasa kamugtakan ako?’

13, 14. Ano an kasaysayan kan Pag-adal sa Bibliya kan Kongregasyon, asin ano an gustong-gusto mo sa pagtiripon na ini?

¹³ Pag-adal sa Bibliya kan Kongregasyon. Kan kabangaan kan dekada nin 1890, pagkatapos na iluwas an nagkapirang volume kan Millennial Dawn, isinuherir ni Brother H. N. Rahn, sarong Estudyante sa Bibliya na nakaistar sa siyudad nin Baltimore, Maryland, E.U.A., na magkaigwa nin “Dawn Circles” para sa pag-adal sa Bibliya. Kan primero, eksperimento sana an mga pagtiripon na ini, na sa parati ginigibo sa pribadong mga harong. Pero kan Setyembre 1895, nagin nang mapanggana an Dawn Circles sa dakul na siyudad sa Estados Unidos. Kaya, isinuherir kan Watch Tower kan bulan na iyan na magkaigwa man nin siring na pagtiripon an gabos na nag-aadal kan katotoohan. Sinabi kaiyan na an namamayo maninigong matibay magbasa. Babasahon niya an sarong pangungusap dangan mahalat siya na magkomento an mga presente. Pagkatapos basahon asin pag-ulayan an kada pangungusap sa sarong parapo, hahanapon niya dangan babasahon an sitadong mga teksto. Sa katapusan kan sarong kapitulo, matao an kada saro nin halipot na repaso kan pinag-adalan.

¹⁴ Nagkapirang beses na liniwat an apod sa pagtiripon na ini. Inapod iyan na Berean Circles for Bible Study, na konektado sa inot na siglong mga taga Berea na maingat na nagsiyasat kan Kasuratan. (Gui. 17:11) Pag-abot nin panahon, inapod iyan na Pag-adal sa Libro kan Kongregasyon. Ngunyan, inaapod iyan na Pag-adal sa Bibliya kan Kongregasyon, asin iribang nagtitiripon sa Kingdom Hall an bilog na kongregasyon imbes na grupo-grupo sa pribadong mga harong. Sa paglihis nin mga dekada, lain-lain na libro, brosyur, pati artikulo sa Watch Tower an ginamit sa pag-adal. Puon pa kaidto, dinadagka an gabos na magpartisipar diyan. Dakula an nagibo kan pagtiripon na ini para mapararom an kaaraman ta sa Bibliya. Regular ka daw na nagpepreparar asin nagpapartisipar sa pinakamakakaya mo?

15. Ano an katuyuhan kan Teokratikong Paadalan sa Pagmiministro?

 ¹⁵ Teokratikong Paadalan sa Pagmiministro. “Kan Lunes na banggi, Pebrero 16, 1942,” an nagirumduman ni Carey Barber, na naglilingkod kaidto sa headquarters kan Mga Saksi ni Jehova sa Brooklyn, New York, “inimbitaran an gabos na brother sa pamilyang Bethel sa Brooklyn na magpaenrol sa aapudon pag-abot nin panahon na Teokratikong Paadalan sa Pagmiministro.” An paadalan na iyan ilinadawan ni Brother Barber, na nagin miyembro kan Namamahalang Grupo pakalihis nin dakul na taon, bilang “saro sa pinakapambihirang ginibo ni Jehova para sa banwaan niya sa presenteng panahon.” Mapanggana nanggad an kursong iyan sa pagtabang sa mga brother na mapauswag an abilidad ninda sa pagtutukdo asin paghuhulit, kaya puon 1943, gradwal na ilinuwas para sa mga kongregasyon sa bilog na kinaban an buklet na Course in Theocratic Ministry. Sinabi kan Watchtower na Hunyo 1, 1943 na an katuyuhan kan Teokratikong Paadalan sa Pagmiministro iyo na tabangan an mga lingkod nin Diyos na “sanayon an saindang sadiri  tanganing magin mas epektibong saksi sa pagbalangibog kan Kahadian.”—2 Tim. 2:15.

16, 17. Teknikal na mga abilidad daw sana an itinutukdo kan Teokratikong Paadalan sa Pagmiministro? Ipaliwanag.

¹⁶ Kan primero, dakul an ninenerbiyos nin grabe pag nagpapahayag sa atubangan nin dakul na tawo. Nagirumduman ni Clayton Woodworth, Jr., na an ama prineso na daing makatanusan na basehan kaiba ni Brother Rutherford asin kan iba pa kan 1918, kun ano an namatian niya kan inot siyang magpaenrol sa paadalan kan 1943. “Nadidipisilan nanggad ako na magpahayag,” an sabi ni Brother Woodworth. “Garo minalaba an dila ko, biyong nagmamara an ngimot d ko, tapos kun minsan minalagong saka minapiyuk an boses ko.” Pero kan nagin mahusay na si Clayton, tinawan siya nin dakul na pribilehiyo na magpahayag sa publiko. Bako sanang teknikal na mga abilidad sa pagtaram an itinukdo sa saiya kan paadalan. Itinukdo kaiyan sa saiya an kahalagahan nin kapakumbabaan asin pagsarig ki Jehova. “Narealisar ko,” an sabi niya, “na bako an mismong ispiker an mahalaga. Pero kun nagpepreparar siyang marhay  asin lubos na nagsasarig ki Jehova, magigin kawili-wili sa mga nagdadangog an pahayag niya asin may manunudan sinda.”

¹⁷ Kan 1959, inimbitaran na man an mga sister na magpaenrol diyan. May nagirumduman si Sister Edna Bauer kan madangog niya an paisi sa asembleya na inatenderan niya. “Nagirumduman ko na ugmahon su mga sister,” an sabi niya. “Mas dakul na an oportunidad ninda.” Sa nag-aging mga taon, dakul na mga brother asin sister an nag-aprobetsar sa oportunidad na magpaenrol sa Teokratikong Paadalan sa Pagmiministro para matukduan ni Jehova. Ngunyan, padagos kitang tinatawan nin arog kaiyan na pagsasanay sa satong pagtiripon sa tahaw kan semana.—Basahon an Isaias 54:13.

18, 19. (a) Paano kita tinatawan ngunyan nin praktikal na giya para magibo an satong ministeryo? (b) Taano ta nagkakanta kita sa mga pagtiripon? (Hilingon an kahon na “ An Pag-awit Dapit sa Katotoohan.”)

¹⁸ Pagtiripon sa Paglilingkod. Kaidto pang 1919, igwa nang mga pagtiripon para magin organisado an paglilingkod sa langtad. Kan panahon na iyan, bako gabos sa kongregasyon nag-aatender sa mga pagtiripon na iyan; imbes idto sanang direktang nagdidistribwir nin mga literatura. Sa kadaklan na kabtang kan 1923, may sarong Pagtiripon sa Paglilingkod kada bulan, asin kaipuhan na mag-atender an gabos sa klase, o kongregasyon. Kan 1928, dinagka an mga kongregasyon na magkaigwa nin Pagtiripon sa Paglilingkod kada semana, asin kan 1935, inengganyar kan The Watchtower an gabos na kongregasyon na ibasar an Pagtiripon sa Paglilingkod sa impormasyon na nasa Director (na pag-abot nin panahon inapod na Informant asin paghaloy-haloy, An Satong Ministeryo sa Kahadian). Dai nahaloy, an pagtiripon na ini regular nang kabtang kan iskedyul kan kada kongregasyon.

¹⁹ Ngunyan, paagi sa satong pagtiripon sa tahaw kan semana, tinatawan kita nin praktikal na giya kun paano isasagibo an satong ministeryo. (Mat. 10:5-13) Kun kuwalipikado ka nang tawan nin personal na kopya kan workbook sa pagtiripon pinag-aadalan mo daw iyan asin inaaplikar sa saimong ministeryo an mga suhestiyon diyan?

20-22. (a) Taano ta ginigirumdom niyato an kagadanan ni Jesus? (b) Paano ka nakikinabang sa pag-atender sa Memoryal kada taon?

²⁰ Pinagbutan ni Jesus an saiyang mga parasunod na girumdumon an kagadanan niya sagkod na mag-abot siya. Arog kan Paskuwa, taunan na selebrasyon an Memoryal kan kagadanan ni Cristo. (1 Cor. 11:23-26) Minilyon an nag-aatender diyan kada taon. Ipinapagirumdom kaiyan sa mga linahidan an pribilehiyo ninda bilang kairibang tagapagmana kan Kahadian. (Roma 8:17) Asin para sa ibang mga karnero, pinapakusog kaiyan an hararom na paggalang asin kaimbudan sa Hadi kan Kahadian nin Diyos.—Juan 10:16.

²¹ Nasabutan ni Brother Russell asin kan kairiba niya an kahalagahan nin pagselebrar kan Pamanggihan kan Kagurangnan asin naaraman ninda na maninigong selebraron iyan sarong beses sana kada taon. Sinabi kan Watch Tower na Abril 1880: “Nagkapirang taon nang kaugalian kan dakul sato digdi sa Pittsburgh na . . . selebraron an Paskuwa [Memoryal] asin kakanon pati inumon an mga emblema kan hawak saka dugo kan satong Kagurangnan.” Dai  nahaloy, nagkaigwa nin mga kumbensiyon kasabay kan Memoryal. Kan 1889 inot na nagkaigwa nin rekord sa siring na okasyon, na diyan 225 an nag-atender asin 22 an nabawtismuhan.

²² Ngunyan, dai ta na sineselebrar an Memoryal bilang kabtang kan programa sa kumbensiyon, pero iniimbitaran niyato an gabos sa satong komunidad na umatender sa Kingdom Hall o arkiladong pasilidad. Kan 2013, labing 19 milyones an naggirumdom kan kagadanan ni Jesus. Pribilehiyo nanggad niyato bako sana na mag-atender sa Memoryal kundi na dagkahon man an iba na umatender kaiba ta sa pinakasagradong bangging ini! Gustong-gusto mo daw na imbitaran sa Memoryal kada taon an pinakadakul sagkod sa mapupuwede?

23. Ano an pagmansay mo sa satong pagtiripon?

²³ Para sa maimbod na mga lingkod ni Jehova, bakong pagabat an instruksiyon na magtiripon. (Heb. 10:24, 25; 1 Juan 5:3) Halimbawa, gustong-gusto ni Hading David na magduman sa harong ni Jehova para sumamba. (Sal. 27:4) Nangurugnang ikinakaugma niya iyan kaiba nin iba pang namumuot sa Diyos. (Sal. 35:18) Asin isip-isipa an halimbawa ni Jesus. Dawa kan aki pa, makusugon an pagmawot niyang magduman sa harong nin pagsamba para sa saiyang Ama.—Luc. 2:41-49.

24. Pag nag-aatender kita sa mga pagtiripon, ano an mga oportunidad ta?

²⁴ Pag nag-aatender kita sa mga pagtiripon, ipinapahiling ta an pagkamuot ki Jehova asin an pagmawot na parigunon an mga kapagtubod. Ipinapahiling ta man na gustong-gusto tang manudan kun paano mamumuhay bilang mga sakop kan Kahadian nin Diyos, huling an siring na pagsasanay sa panginot itinatao sa sato paagi sa mga pagtiripon, asembleya, asin kumbensiyon. Dugang pa, an mga pagtiripon nagtatao sa sato nin abilidad asin kusog na kaipuhan niyato tanganing makapagpadagos sa saro sa pinakaimportanteng gibuhon kan Kahadian nin Diyos ngunyan—an paggibo nin mga disipulo kan Hading si Jesu-Cristo saka pagsasanay sa sainda. (Basahon an Mateo 28:19, 20.) Daing duda na an kusog kan pagmawot ta na magtiripon naghahayag kun gurano man nanggad katotoo sa sato bilang mga indibidwal an Kahadian nin Diyos. Lugod na pirmi tang pahalagahan an satong mga pagtiripon!