NAHILING mo na garo baga nagliliwanag an mata kan tinutukduan mo sa Bibliya kan masabutan niya an kahulugan kan teksto na binasa pa sana nindo. Dangan, luway-luway siyang nagsabi, “An buot mong sabihon, itinutukdo kan Bibliya na puwede kitang mabuhay sa Paraiso sagkod lamang—digdi mismo sa daga?” Nagngirit an kapartner mo sa ministeryo asin nagsabi, “Ano an nasabutan mo sa Bibliya?” Huling napangalas nanggad an tinutukduan sa Bibliya, nagpiling-piling siya asin nagsabi, “Dai talaga ako makapaniwala na dai pa lamang ini itinukdo sako!” Nagirumduman mo na pirang semana pa sana an nakaagi, arog man kaiyan an sinabi niya kan manudan niya sa kainot-inuti na Jehova an pangaran nin Diyos.

Naeksperyensiyahan mo na daw iyan? An dakul na lingkod nin Diyos iyo man. Malinaw nanggad na ipinapagirumdom kaiyan sa sato an mahalagang marhay na regalo na itinao sa sato—an kaaraman dapit sa katotoohan! Isip-isipa nguna: Paano nakaabot sa saimo an regalong iyan? Sisiyasaton ta iyan sa seksiyon na ini. An paagi na an mga lingkod nin Diyos progresibong tinatawan nin espirituwal na kaliwanagan sarong malinaw na pruweba na totoo an Kahadian nin Diyos. Sa laog nin sarong siglo, aktibong sinisigurado kan Hadi kaiyan, si Jesu-Cristo, na itinutukdo sa mga lingkod nin Diyos an katotoohan.