GINUNO mo sa sanga an sarong dakula asin hinog nang mansanas. Huling mahamot, pinarong mo iyan bago mo ilinaag sa basket na haros pano na. Dakul na oras ka nang nagtatrabaho, pero dai ka pa napapagal kaya gusto mo pang magpadagos. Nasa may puon nin kahoy sa harani an saimong ina, na maugmang nagtatrabaho asin nakikipag-istoryahan sa ibang kapamilya saka katuod na nagtatabang sa pagguno. Hobenon an itsura niya—arog kan nagigirumduman mo kan sadit ka pa. Masakit paniwalaan na nahiling mo siya na naggurang sa kinaban na haloy nang luminihis. Nahiling mo siya na nagparaniwang huli sa hilang, kapot mo an kamot niya kan siya naghihingagdan na, asin nagtangis ka kan ilubong siya. Alagad, uni siya, kaiba nin dakulon pang iba, buhay asin makusog giraray!

Aram tang maabot an siring na mga aldaw. Aram ta iyan huling pirming nauutob an mga panuga nin Diyos. Sa seksiyon na ini, pag-uulayan ta kun paano mauutob sa dai na mahahaloy an nagkapirang panuga kan Kahadian, bago umabot an giyera nin Armagedon. Rerepasuhon ta man an nagkapirang nakakaugmang panuga kan Kahadian na mauutob pagkatapos kaiyan. Mauugma nanggad kita na mahiling na namamahala na an Kahadian nin Diyos sa bilog na daga, asin ginigibong bago an gabos na bagay!