1, 2. (a) Taano ta kun beses dipisil magtubod na totoo an Paraiso? (b) Ano an makakatabang sa sato na pakusugon an pagtubod sa mga panuga nin Diyos?

 NAG-ABOT sa pagtiripon an sarong maimbod na brother, na pagal sa nakakatensiyon na maghapon. Bakong marahay an nagin pagtratar sa saiya kan istriktong amo niya, tensiyonado siya huli sa kadipisilan sa pag-asikaso sa pamilya, asin nahahadit huling may hilang an agom niya. Kan magpuon an musika kan pambukas na kanta, nakahangos siya nin maginhawa huling maugma siyang nasa Kingdom Hall siya kaiba kan mga tugang. An kanta dapit sa paglaom na buhay sa Paraiso, asin ipinapaimahinar iyan sa saiya kan mga liriko para mahiling an sadiri niya sa kamugtakan na iyan. Gustong-gusto niya an kantang ini, asin mantang nag-aawit kaiba kan saiyang pamilya, nararanga siya kan paglaom sa maabot na panahon.

² Namatian mo na man daw iyan? An kadaklan sa sato iyo na. Pero an totoo, huli sa pamumuhay ta sa lumang sistemang ini, puwedeng dipisilon para sa sato na magtubod na totoo an maabot na Paraiso. Ini an ‘mga panahon na makahahandal,’ asin bako nanggad siring sa paraiso an kinaban na kinabubuhayan ta. (2 Tim. 3:1) Ano an makakatabang sa sato na magtubod na totoo an paglaom ta? Buweno, paano ta talaga maaaraman na dai mahahaloy mamamahala na sa bilog na katawuhan an Kahadian nin Diyos? Pag-ulayan ta an pirang hula hali ki Jehova na nahiling kan banwaan niya na nautob kan suanoy na panahon. Dangan rerepasuhon ta kun paano iyan asin an kaagid na mga hula nagkakaigwa nin maugmang kautuban ngunyan mismo. Pagkatapos na mapakusog kaiyan an pagtubod ta, tatawan niyato nin atensiyon an kahulugan kaiyan para sa puturo niyato.

3. Anong panuga an nakaranga sa mga Judiong nadistiyero sa Babilonya?

³ Imahinara an buhay kan mga Judio na nadistiyero sa Babilonya kan ikaanom na siglo B.C.E. Dakul an nagdakula sa pagkadistiyero, arog kan mga magurang ninda, asin masakit an buhay. Tinuya-tuya sinda kan mga taga duman huli sa pagtubod ninda ki Jehova. (Sal. 137:1-3) Sa laog nin mga dekada, padagos na pinapangaptan kan maimbod na mga Judio an sarong maugmang paglaom na ini: Nanuga si Jehova na ibabalik niya an saiyang banwaan sa sadiri  nindang daga. Sinabi niya na magigin marahayon an kamugtakan duman. Iinagid pa ngani niya an daga nin Juda, na ibabalik sa dating kamugtakan, sa hardin nin Eden—sarong paraiso! (Basahon an Isaias 51:3.) a Malinaw na an katuyuhan kan siring na mga panuga pakusugon liwat an buot kan banwaan nin Diyos para mahali an mga pagduda na tibaad nakakapurisaw sa sainda. Taano man? Isip-isipa an nagkapirang espesipikong hula.

4. Paano siniyerto ni Jehova sa mga Judio na magigin tiwasay sinda sa sadiri nindang daga?

⁴ Katiwasayan. An mga nadistiyerong idto mabalik, bako sa literal na paraiso, kundi sa harayong daga na 70 taon nang dai iniistaran, asin dikit sana sa sainda an nakahiling kaiyan kasuarin man. Ordinaryo na sana kaidto an mga leon sa kadagaan na sinambit sa Bibliya, siring man an mga lobo, leopardo, asin iba pang naninibang hayop. Tibaad ihapot nin sarong de-pamilyang lalaki, ‘Paano ko maiingatan na ligtas an sakong agom asin mga aki? Kumusta man an mga karnero asin baka—paano ko iyan mapoprotektaran?’ Natural sana an siring na kahaditan. Kun siring, isip-isipa an panuga nin Diyos sa Isaias 11:6-9 asin kun paano iyan siyertong nakaranga. (Basahon.) Paagi sa magayon na poetikong mga tataramon na iyan, siniyerto ni Jehova sa mga nadistiyero na magigin ligtas sinda asin an ataman nindang mga hayop. An leon makakan nin dagami na an buot sabihon dai kaiyan sisibaon an mga baka kan mga Judio. Dai matatakot sa mga naninibang iyan an mga maimbod. Nanuga si Jehova na magigin ligtas an banwaan niya sa daga nin Juda na ibabalik sa dating kamugtakan, dawa sa kaawagan asin kadlagan.—Ezeq. 34:25.

5. Anong mga hula an nakatabang sa mapuling mga nadistiyero para magtiwala na abundang itatao ni Jehova an pangangaipo ninda?

⁵ Abundansiya. Tibaad may iba pang kahaditan. ‘Mapapakakan ko daw an pamilya ko sa sadiri ming daga na ibabalik sa dating kamugtakan? Sain kami maistar? May makukua daw na trabaho, asin mas marahay daw iyan kisa sa mapawot na pamumuhay mantang nasa pagkadistiyero saka kontrolado kan mga nanakop samo?’ Paagi sa ipinasabong na mga hula, makonsiderasyon man na tinawan ni Jehova nin atensiyon an mga hapot na iyan. Nanuga siya sa makinuyog niyang banwaan na siyertong matao siya nin uran; huli kaiyan, an daga mabunga nin ‘abunda pati masustansiyang’ tinapay. (Isa. 30:23, NW) Kun dapit sa istaran asin nakakakontentong trabaho, nanuga si Jehova dapit sa banwaan niya: ‘Mapatindog sinda nin mga harong, asin mag-uuntok sinda diyan; magibo sinda nin mga ubasan, asin kakakanon ninda an mga bunga kaiyan. Dai sinda matugdok asin iba an mag-uuntok; dai sinda matanom, asin iba an makakan.’ (Isa. 65:21, 22) Iyo, sa dakul na paagi magigin marahayon an buhay ninda kun ikukumparar sa saindang pagkadistiyero sa paganong Babilonya. Pero kumusta man an pinakamagabat na mga problema ninda—an mismong dahilan kan saindang pagkadistiyero?

6. Anong klaseng mga problema sa salud an haloy nang pigmamati kan banwaan nin Diyos, asin ano an panuga ni Jehova sa mga mapuli hali sa pagkadistiyero?

⁶ Marahay na espirituwal na salud. Haloy pa bago madistiyero an banwaan nin Diyos, nagkahilang na sinda sa espirituwal. Paagi ki propeta Isaias, sinabi ni Jehova dapit sa banwaan Niya: ‘An bilog na payo naghihilang, asin an bilog na puso nakukulgan.’ (Isa. 1:5) Sinda buta asin bungog sa espirituwal, huling nagbubungog-bungugan  sinda sa konseho ni Jehova saka garo man sana pinipirong ninda an saindang mga mata sa kaliwanagan na itinatao niya. (Isa. 6:10; Jer. 5:21; Ezeq. 12:2) Kun magkaigwa giraray nin kaparehong problema an mga mapuli hali sa pagkadistiyero, magigin tiwasay daw sinda? Bako daw na mawawara man giraray ninda an pag-uyon ni Jehova? Nakakaparigon nanggad sa buot an panuga niya: ‘Sa panahon na idto an mga bungog makakadangog kan mga tataramon sa surat [o libro], asin an mga mata kan mga buta [makakahiling] sa tahaw kan kadikluman.’ (Isa. 29:18) Iyo, papaumayan ni Jehova sa espirituwal an dinisiplina asin nagsusulsol na banwaan niya. Sagkod na sinda danay na naghihimati asin nagkukuyog, tatawan niya sinda nin nagtataong-buhay na paggiya saka kaliwanagan.

7. Paano nautob an mga panuga nin Diyos sa nadistiyero niyang banwaan, asin taano ta nakakapakusog iyan sa pagtubod niyato?

⁷ Inutob daw ni Jehova an mga panuga niya? Sinisimbag ini kan kasaysayan. Binendisyunan nin katiwasayan, abundansiya, asin marahay na espirituwal na salud an mga Judio na nagpuli sa sadiri nindang daga. Halimbawa, prinotektaran sinda ni Jehova sa kaharaning mga banwaan na mas makusog asin mas dakul kisa sainda. Dai siniba nin mababangis na hayop an ataman na mga hayop kan mga Judio. Totoo, limitado sanang kautuban an nahiling kan mga Judio dapit sa mga hula manungod sa paraiso na isinurat ni Isaias, Jeremias, asin Ezequiel—pero nakakaugma iyan huling iyan mismo an kaipuhan kan banwaan nin Diyos kaidto. Paagi sa paghurop-hurop ta sa ginibo ni Jehova para sa banwaan niya, magigin mas makusog an pagtubod niyato. Kun nakakaugma an inot asin limitadong kautuban kan mga hulang iyan, ano pa daw an mas dakulang kautuban kaiyan? Isip-isipa an ginigibo ni Jehova para sa sato ngunyan.

8. Nasa anong klaseng “daga” an mga lingkod nin Diyos ngunyan?

⁸ An mga lingkod ni Jehova ngunyan bako sarong literal na nasyon, ni nakaistar man sinda sa saro sanang literal na daga. Imbes, an linahidan na mga Kristiyano sarong espirituwal na nasyon, an ‘Israel nin Diyos.’ (Gal. 6:16) An kairiba nindang ‘ibang mga karnero’ kaiba ninda sa espirituwal na “daga,” sarong lugar nin aktibidad na diyan sinasamba ninda nin may pagkasararo si Jehova Diyos. An pagsambang iyan an paagi nin pamumuhay ninda. (Juan 10:16; Isa. 66:8) Asin anong klaseng “daga” an itinao sa sato ni Jehova? Sarong espirituwal na paraiso. Diyan nagkakaigwa nin makangangalas na espirituwal na kautuban an mga panuga nin Diyos dapit sa arog-Eden na kamugtakan. Isip-isipa an nagkapirang halimbawa.

9, 10. (a) Paano nauutob ngunyan an hula sa Isaias 11:6-9? (b) Ano an ebidensiya ta na may katuninungan an mga lingkod nin Diyos?

⁹ Katiwasayan. Sa hula sa Isaias 11:6-9, may mahihiling kita na nakakaugmang marhay na paglaladawan nin pagkauruyon asin katuninungan—sa pag-ultanan nin mabangis na mga hayop asin mga tawo saka ataman nindang mga hayop. Nauutob daw iyan ngunyan sa espirituwal na paagi? Iyo! Sa bersikulo 9, naaraman niyato kun taano ta dai naggigibo nin maraot ni nangraraot an mga linalang na ini: ‘Huli ta an daga mapapano kan pakamidbid ki Jehova siring kan pakatahob sa dagat kan katubigan.’ Binabago daw kan “pakamidbid  ki Jehova” an ugali nin mga hayop? Dai, mga tawo an nagbabago huli sa pakamidbid sa Kahuruhalangkawing Diyos asin pakanuod na arugon an matuninong na mga dalan niya. Iyan an dahilan kun taano ta nahihiling niyato an nakakaugmang kautuban kaiyan sa satong espirituwal na paraiso ngunyan. Sa pamamahala kan Kahadian, nanunudan kan mga parasunod ni Cristo na halion an maringis asin arog-hayop na mga kuwalidad saka mamuhay nin matuninong pati may pagkauruyon kaiba kan mga tugang ninda sa espirituwal.

¹⁰ Halimbawa, pinag-ulayan ta sa publikasyon na ini an dapit sa Kristiyanong neutralidad—an basehan sa Kasuratan kan pakasabot niyato asin an resultang persekusyon sa mga lingkod nin Diyos huli sa neutral na paninindugan. Bako daw pambihira na sa madahas na kinaban na ini, igwa nin durudakulang “nasyon” nin mga tawo na habong makikabtang sa ano man na klaseng kadahasan dawa pa patakuton sinda na gagadanon? Pambihira nanggad na pruweba ini na an mga sakop kan Mesiyanikong Hadi may katuninungan na siring kan ilinadawan ni Isaias! Sinabi ni Jesus na mamimidbid an mga parasunod niya paagi sa pagkaminuruot-muutan ninda. (Juan 13:34, 35) Sa kongregasyon, mapasensiyang ginagamit ni Cristo an “maimbod asin mapagmansay na uripon” para tukduan an gabos na tunay na Kristiyano na magin mapagpatuninong, mamumuton, asin mabuot.—Mat. 24:45-47, NW.

11, 12. May anong klaseng tiggutom ngunyan sa kinaban, pero anong abundansiya an itinatao ni Jehova sa mga lingkod niya?

 ¹¹ Abundansiya. May espirituwal na tiggutom sa kinaban. Nagpatanid an Bibliya: ‘Uya digdi na may madatong na mga aldaw, sabi ni Jehova na Kagurangnan, na diyan sa mga aldaw na iyan papadarahan ko nin gutom an daga, bakong gutom sa tinapay, maski paha sa tubig, kundi sa paghinanyog sa tataramon ni Jehova.’ (Amos 8:11) Apektado man daw kaiyan an mga siyudadano kan Kahadian nin Diyos? Ihinula ni Jehova an pagkakalain kan mga lingkod niya asin kan mga kaiwal niya: ‘An sakuyang mga uripon makarakan, asin kamo magkakagurutom; uya, an sakong mga uripon mag-iirinom, asin kamo magkakaparaha; uya, an sakuyang mga uripon mag-uurugma, asin kamo susurupugon.’ (Isa. 65:13) Nahihiling mo daw an kautuban kaiyan?

¹² Nagbubulos sa sato an espirituwal na mga probisyon siring sa sarong salog na padagos na nagdadakula asin nagrararom. An satong mga publikasyon na basado sa Bibliya—siring man an mga rekording asin video, an mga pagtiripon saka kumbensiyon niyato, pati an mga impormasyon na ipinupublikar sa satong Web site—gabos iyan garo dagos-dagos na pagbaha nin espirituwal na kakanon na kabaliktaran kan sa kinaban na grabe an gutom sa espirituwal. (Ezeq. 47:1-12; Joel 3:18) Dai ka daw nauugma na mahiling an kautuban kan mga panuga ni Jehova na magigin abunda an buhay mo sa aroaldaw? Sinisiyerto mo daw na regular kang nagkakakan sa lamesa ni Jehova?

13. Paano mo nahihiling an kautuban kan panuga ni Jehova dapit sa mga buta na nakakahiling na asin mga bungog na nakakadangog na?

¹³ Marahay na espirituwal na salud. Kadakul ngunyan an buta asin bungog sa espirituwal. (2 Cor. 4:4) Pero, pinapaumayan ni Cristo an mga may kamatian asin hilang sa bilog na kinaban. Nakahiling ka na daw nin mga buta na nakakahiling na asin mga bungog na nakakadangog na? Pag nakakahiling ka nin mga nagkakamit nin tamang kaaraman dapit sa katotoohan na nasa Tataramon nin Diyos asin tinatalikdan an mga kaputikan sa relihiyon na dahilan kan saindang pagigin buta saka bungog kaidto kun dapit sa katotoohan, nahihiling mo na an kautuban kan panugang ini: ‘Sa panahon na idto an mga bungog makakadangog kan mga tataramon sa surat [o libro], asin an mga mata kan mga buta [makakahiling] sa tahaw kan kadikluman.’ (Isa. 29:18) Sa bilog na kinaban, ginatos na ribo kada taon an nauumayan sa espirituwal. An kada saro na minahali sa Dakulang Babilonya asin minaiba sa sato sa pagsamba sa espirituwal na paraiso niyato buhay na pruweba na nagkakatotoo na an mga panuga ni Jehova!

14. Anong ebidensiya an mapakusog kan pagtubod ta pag hinurop-hurop niyato iyan?

¹⁴ May makusog na ebidensiya sa kada kapitulo kan librong ini na dinara ni Cristo sa tunay na espirituwal na paraiso an mga parasunod niya sa panahon na ini kan katapusan. Padagos tang hurop-hurupon an dakul na paagi na binebendisyunan kita ngunyan sa paraisong iyan. Mantang ginigibo ta iyan, padagos na magigin mas makusog an pagtubod niyato sa mga panuga ni Jehova para sa maabot na panahon.

15. Taano ta makakasiyerto kita na magigin paraiso an daga?

¹⁵ Haloy nang katuyuhan ni Jehova na gibuhon na paraiso an bilog na daga. Ibinugtak niya si Adan saka Eva sa paraisong hardin, asin pinagbutan sindang panuon nin mga aki an daga pati atamanon an gabos na linalang diyan. (Gen. 1:28) Pero, nagsunod si Adan  asin Eva sa pagrebelde ni Satanas kaya an gabos nindang aki nagin bakong perpekto, nagkakasala, saka nagagadan. Alagad, nungkang nagbago an katuyuhan nin Diyos. Oras na sabihon niya an sarong bagay, pirmi iyan na lubos na mauutob. (Basahon an Isaias 55:10, 11.) Kun siring, makakasiyerto kita na an dagang ini mapapano kan mga naggikan ki Adan saka Eva asin sasakupon ninda iyan, na mamumuton na inaataman an mga linalang ni Jehova sa pangglobong paraiso. Sa panahon na iyan, lubos nang mauutob an mga hula dapit sa buhay sa paraisong mga kamugtakan, na inot na itinao sa nadistiyerong mga Judio! Isip-isipa an minasunod na mga halimbawa.

16. Paano ilinaladawan kan Bibliya an katiwasayan na maeeksperyensiyahan ta sa Paraiso?

¹⁶ Katiwasayan. Sa katapos-tapusi, lubos na mauutob pati sa literal na paagi an nakakaugmang paglaladawan sa Isaias 11:6-9. Magigin ligtas asin tiwasay an mga lalaki, babayi, saka mga aki sain man sinda magduman sa daga. Dai sinda mamemeligro sa kapwa tawo o hayop. Imahinara an panahon na an bilog na planetang ini magigin istaran mo na, na diyan puwede kang maglangoy sa mga salog, danaw, asin dagat; magtukad sa kabukidan; saka maglibot-libot sa maduot o maawot na mga lugar na dai nanggad nin ano man na peligro. Asin pag banggi na, dai ka mahahadit. Magkakatotoo an sinabi sa Ezequiel 34:25, kaya posible pa ngani na an mga lingkod nin Diyos “makaistar nin tiwasay sa kaawagan pati makaturog sa mga kadlagan.” (NW)

17. Taano ta makakasiyerto kita na abundang itatao ni Jehova an pangangaipo niyato pag namamahala na sa bilog na daga an Kahadian?

¹⁷ Abundansiya. Imahinara an panahon na dai na nin kadukhaan, malnutrisyon, tiggutom, o sistema asistensiya nin gobyerno. An pagigin abunda sa espirituwal kan mga lingkod nin Diyos ngunyan garantiya na papakakanon kan Mesiyanikong Hadi sa gabos na paagi an mga sakop niya. Kan nasa daga si Jesus, ipinahiling niya sa sadit na paagi na kaya niyang utubon an siring na mga panuga, huling pinakakan niya an rinibong nagugutom paagi sa pira sanang tinapay asin sira. (Mat. 14:17, 18; 15:34-36; Mar. 8:19, 20) Pag namamahala na sa bilog na daga an Kahadian nin Diyos, literal na mauutob an mga hulang arog kaini: “Itatao niya an uran para sa banhi na isinasabwag mo sa daga, saka magigin abunda pati masustansiya an tinapay na ibinubunga kan daga. Sa panahon na iyan masabsab sa mahiwas na mga sabsaban an saimong ataman na mga hayop.”—Isa. 30:23, NW.

18, 19. (a) Ano an kahulugan sa saimo kan hula sa Isaias 65:20-22? (b) Ano an buot sabihon kan magigin siring sa ‘mga aldaw nin kahoy’ an mga aldaw ta?

¹⁸ Para sa dakul ngunyan, imposible nanggad na magkaigwa sinda nin komportableng harong o nakakakontentong trabaho. Sa maraot na sistemang ini, an pagmati nin dakul dikit sana talagang pakinabang an nakukua ninda o kan pamilya ninda dawa mahigos sindang nagtatrabaho nin dakul na oras, mantang napapaduman sa mga mayaman asin mahanab an gabos na pakinabang. Imahinara an magigin kamugtakan pag nagkatotoo na sa bilog na kinaban an hulang ini: ‘Mapatindog sinda nin mga harong, asin [maistar] sinda diyan; magibo sinda nin mga ubasan, asin kakakanon ninda an mga bunga kaiyan. Dai sinda matugdok asin iba an [maistar]; dai sinda matanom, asin iba an makakan; huli ta kun ano an mga aldaw nin  kahoy magigin siring man an mga aldaw kan sakuyang banwaan, asin [lubos na gagamiton kan] sakuyang mga pinili an mga gibo nin saindang mga kamot.’—Isa. 65:20-22.

¹⁹ Ano an buot sabihon kan magigin siring sa ‘mga aldaw nin kahoy’ an mga aldaw ta? Pag nakatindog ka sa may puon nin dakulaon na kahoy, bako daw na minahanga ka mantang iniisip-isip mo kun gurano na iyan kahaloy diyan—tibaad haloy pa bago mamundag an mga apuon mo? Kun magdadanay ka na bakong perpekto, posibleng marhay na mas malawig pa an buhay kan kahoy na iyan kisa saimo, asin padagos pang matuninong na maeksister nin halawig na panahon dawa gadan ka na. Mabuot nanggad si Jehova huling sinisiyerto niya sa sato na sa maabot na Paraiso, magigin halawig asin matuninong an mga aldaw ta! (Sal. 37:11, 29) Maabot an panahon na sa paghiling ta, dawa an mga kahoy na halawig an buhay magigin garo na sana duot o awot kahalipot an buhay, na madaling nawawara mantang kita padagos na nabubuhay sagkod lamang!

20. Paano magkakaigwa nin perpektong salud an maimbod na mga sakop kan Kahadian?

²⁰ Perpektong salud. An gabos ngunyan sa kinaban na ini apektado nin hilang asin kagadanan. Masasabi ta na kita gabos may nakakagadan na hilang na inaapod na kasalan. An solamenteng bulong iyo an atang na pantubos ni Cristo. (Roma 3:23; 6:23) Sa Milenyal na Paghadi, lubos na iaaplikar ni Jesus asin kan kairiba niyang tagapamahala an mga pakinabang kan atang na iyan, na luway-luway na hahalion an gabos na gira nin kasalan sa maimbod na mga tawo. Lubos nang magkakatotoo an hula ni Isaias: ‘Dai magsasabi an nag-iirok, Naghihilang ako; an banwaan na [nag-iistar diyan] papatawadon an kasalan.’ (Isa. 33:24) Imahinara an panahon na dai na nin buta, bungog, o pilay. (Basahon an Isaias 35:5, 6.) Kayang paumayan ni Jesus an gabos na hilang—baga man sa pisikal, mental, o emosyonal. Magkakaigwa nanggad nin perpektong salud an maimbod na mga sakop kan Kahadian!

21. Ano an mangyayari sa kagadanan, asin taano ta nararanga ka kaiyan?

²¹ Pero, kumusta man an parating nagigin epekto nin hilang, an dai malilikayan na resulta nin kasalan—an kagadanan? Iyan an satong “huring kaiwal,” na pag-abot nin panahon daing kalaban-laban diyan an gabos na bakong perpekto. (1 Cor. 15:26) Pero, para ki Jehova masakiton daw na kaiwal an kagadanan? Mangnuha an ihinula ni Isaias: ‘Hahalunon niya an kagadanan sa kapangganahan; asin papahidon kan Kagurangnan an gabos na luha sa gabos na lalawgon.’ (Isa. 25:8) Naiimahinar mo daw an panahon na iyan? Dai na nin mga paglubong, sementeryo, asin luha huli sa kamunduan! Kabaliktaran nanggad—magkakaigwa nin mga luha nin kagaya-gayahan mantang inuutob ni Jehova an nakakaugma niyang panuga na buhayon liwat an mga gadan! (Basahon an Isaias 26:19.) Sa katapos-tapusi, mapipila na an arog-lugad na kamunduan nin dakul huli sa pagkagadan nin namumutan.

22. Ano an mangyayari pag nautob na kan Mesiyanikong Kahadian an kabutan nin Diyos digdi sa daga?

²² Sa katapusan kan Milenyo, nautob na kan Kahadian an kabutan nin Diyos digdi sa daga, asin itatao na ni Cristo sa saiyang Ama an pamamahala. (1 Cor. 15:25-28) Andam na an katawuhan—na perpekto na sa panahon na iyan—na atubangon an pangultimong  pagbalo pag binutasan na si Satanas hali sa bûngaw nin pagigin daing maginibo. Dangan, lalaglagon na ni Cristo an labi-labi karaot na halas na ini asin an gabos na parasuportar kaini. (Gen. 3:15; Kap. 20:3, 7-10) Pero magkakaigwa nin maugmang paglaom an gabos na maimbod na namumuot ki Jehova. Dai gayod nin mga tataramon na makakatao nin mas magayon na paglaladawan kaiyan kisa sa ipinasabong na pananaram na nasa Bibliya. Iyan an panuga na an mga maimbod magkakaigwa kan ‘mamurawayon na katalingkasan kan mga aki nin Diyos.’—Roma 8:21, An Marahay na Bareta Biblia.

23, 24. (a) Taano ta siyerto an kautuban kan mga panuga nin Diyos? (b) Ano an determinado mong gibuhon?

²³ An mga panugang iyan dai nakabasar sa mga linalauman, kamawutan, o pangarap sana. Siyerto nanggad an kautuban kan mga panuga ni Jehova! Taano? Girumduma an mga tataramon ni Jesus na pinag-ulayan ta sa inot na kapitulo kan librong ini. Tinukduan niya an saiyang mga parasunod na mamibi ki Jehova: ‘Dumatong lugod an Kahadian mo. Gibuhon an buot mo, digdi sa daga nin siring sa langit.’ (Mat. 6:9, 10) Bakong imahinasyon sana an Kahadian nin Diyos. Totoo nanggad iyan! Namamahala na iyan sa langit. Sarong siglo nang inuutob kaiyan an mga panuga ni Jehova sa mga paagi na malinaw tang nahihiling sa Kristiyanong kongregasyon. Kun siring, makakasiyerto kita na mauutob an gabos na panuga ni Jehova pag lubos nang mamahala sa daga an Kahadian nin Diyos!

²⁴ Aram tang maabot an Kahadian nin Diyos. Aram tang magkakatotoo an lambang panuga ni Jehova. Taano? Huling NAMAMAHALA NA AN KAHADIAN NIN DIYOS! Kaya dapat tang ihapot sa sadiri, ‘Namamahala daw sa sako an Kahadian?’ Gibuhon ta an bilog tang makakaya na mamuhay bilang maimbod na mga sakop kan Kahadian ngunyan, tanganing makinabang kita sa perpekto asin matanos na pamamahala kaiyan sagkod lamang!