1, 2. (a) Ano an simbag ni Brother Russell sa sarong ministro na naghapot kun paano pinapadalagan an mga aktibidad kan Mga Estudyante sa Bibliya? (b) Ano an pag-uulayan ta sa kapitulong ini?

 SARONG aldaw, may ministro nin Reformed Church na nagdulok ki Brother Charles T. Russell huling gusto niyang maaraman kun paano pinapadalagan an mga aktibidad kan Mga Estudyante sa Bibliya.

 “Dai kami nuarin man nangungulekta,” an paliwanag ni Brother Russell.

 “Sain kamo nagkukua nin kuwarta?” an hapot kan ministro.

 “Kun sasabihon ko saimo an pinakasimpleng katotoohan, dai ka nanggad makakapaniwala,” an simbag ni Russell. “Pag nag-aatender an mga tawo sa mga pagtiripon mi, dai sinda nin nahihiling na ilinilibot na supot. Pero aram ninda na may mga dapat gastusan. Sa buot-buot ninda, ‘Ginagastusan an pasilidad na ini . . . Paano ako makakadonar dawa dikit para digdi?’ ”

 Dai makapaniwala an ministro mantang nakahiling ki Brother Russell.

 “Sinasabi ko saimo an simpleng katotoohan,” an sabi pa ni Russell. “Ini mismo an hinahapot ninda sako, ‘Paano ako makakadonar dawa dikit para digdi?’ Kun natatawan nin bendisyon an saro asin may kakayahan siya sa pinansiyal, gusto niyang gamiton iyan para sa Kagurangnan. Pero kun mayo siyang kakayahan, taano ta pipiriton ta siya?” a

² Iyo nanggad, sinasabi ni Brother Russell “an simpleng katotoohan.” Suno sa kasaysayan, haluyon nang nagtatao an banwaan nin Diyos nin boluntad na kontribusyon para suportaran an tunay na pagsamba. Sa kapitulong ini, sisiyasaton ta an nagkapirang halimbawa sa Kasuratan pati na sa satong kasaysayan sa presenteng panahon. Mantang pinag-uulayan ta kun paano ngunyan sinusuportaran sa pinansiyal an gibuhon na pang-Kahadian, marahay na ihapot nin kada saro sa sato, ‘Paano ko maipapahiling an sakong suporta para sa Kahadian?’

3, 4. (a) May anong pagtitiwala si Jehova sa saiyang mga parasamba? (b) Paano ipinahiling kan mga Israelita an suporta ninda sa pagtugdok kan tabernakulo?

³ Nagtitiwala si Jehova sa saiyang tunay na mga parasamba. Aram niya na kun tatawan sinda nin oportunidad, maugma nindang  ipapahiling an debosyon paagi sa boluntad na pagtao. Pag-isipan an duwang halimbawa sa kasaysayan nin Israel.

⁴ Pagkatapos na iluwas ni Jehova sa Ehipto an mga Israelita, pinagbutan niya sindang gumibo nin naililipat-lipat na tolda, o tabernakulo, para sa pagsamba. An estruktura asin mga kasangkapan kaiyan nangangaipo nin dakul-dakul na materyales. Ininstruksiyunan niya si Moises na tawan nin oportunidad an banwaan na suportaran an proyekto: ‘[An] siisay man na may dusay na puso magdara [nin kontribusyon] ki Jehova.’ (Ex. 35:5) Ano an reaksiyon ninda, na kasuarin pa sana nakaeksperyensiya nin grabeng ‘kauripnan asin karingisan’? (Ex. 1:14) Ipinahiling ninda an bilog na suporta, saka gikan sa buot na nagtao nin bulawan, plata, asin iba pang mamahalon na bagay—na kadaklan posibleng nakua ninda sa mga Ehipsiyo na dating nag-uripon sa sainda. (Ex. 12:35, 36) Nagtao sinda nin labi pa sa kinakaipuhan kaya kinaipuhan na sindang ‘ulangon’ sa pagdara nin ano pa man.—Ex. 36:4-7.

5. Ano an ginibo kan mga Israelita kan tawan sinda ni David nin oportunidad na magkontribwir sa pagtugdok kan templo?

⁵ Pakalihis nin mga 475 taon, nagkontribwir si David hali sa ‘sadiri niyang kayamanan’ para suportaran an pagtugdok kan templo, an kainot-inuti na permanenteng sentro kaidto kan tunay na pagsamba digdi sa daga. (An Marahay na Bareta Biblia) Dangan, naghapot siya para tawan nin oportunidad an mga kapwa Israelita na magtao: ‘Siisay ngunyan an buot na magdulot ki Jehova?’ Bilang simbag, ‘bilog na puso an banwaan na nagdulot ki Jehova sa sadiri nindang buot.’ (1 Cron. 29:3-9) Bilang pagmidbid ni David sa tunay na gikanan kan mga kontribusyon, namibi siya ki Jehova: ‘Saimo an gabos, asin itinatao niyamo sa saimo an inako sa saimong kamot.’—1 Cron. 29:14.

6. Taano ta kaipuhan nin kuwarta para sa gibuhon na pang-Kahadian ngunyan, asin anong mga hapot an minalataw?

⁶ Dai kaipuhan ni Moises o ni David na piriton an banwaan nin Diyos na magtao. Imbes, gikan sa puso sindang nagtao. Kumusta man ngunyan? Aram tang marhay na kaipuhan an kuwarta para sa gibuhon na pang-Kahadian. Durudakulang kuwarta an kaipuhan sa pagpublikar asin pagdistribwir nin mga Bibliya saka literatura na basado sa Bibliya, pagtugdok pati pagmentenar nin mga edipisyo para sa pagtiripon asin mga pasilidad nin sangay, saka pagtao nin tulos-tulos na ayuda sa mga kapagtubod pag may kalamidad. Kun siring, may importanteng mga hapot na minalataw: Paano nakukua an kinakaipuhan na pondo? Kaipuhan daw na piriton an mga parasunod kan Hadi na magtao?

7, 8. Taano ta dai nakikimahirak ni naghahagad nin kuwarta sa mga tawo an mga lingkod ni Jehova?

⁷ Dai inarog ni Brother Russell asin kan kairiba niya an mga pamamaagi sa paghanap nin pondo na nakatudan na kan mga relihiyon nin Kakristiyanuhan. Sa ikaduwang isyu kan Watch Tower, sa irarom kan titulong “Do You Want ‘Zion’s Watch Tower’?” sinabi ni Russell: “Kami nagtutubod na an nagsusuportar sa ‘Zion’s Watch Tower’ iyo si JEHOVA, kaya nungka iyan na makikimahirak o  mahagad nin suporta sa mga tawo. Kun Siya na nagsasabi: ‘Sakuya an gabos na bulawan asin plata sa kabukidan,’ dai na makatao kan kinakaipuhan na pondo, sasabuton mi na panahon nang ipundo an pagpublikar.” (Hag. 2:7-9) Pakalihis nin labing 130 taon, padagos na nagkukusog an The Watchtower asin an organisasyon na nagpupublikar kaiyan!

⁸ Dai naghahagad nin kuwarta an mga lingkod ni Jehova. Dai sinda naglilibot nin supot na pangkulekta o nagpapadara nin surat para maghagad nin kuwarta. Dai man sinda nin mga tiyangge, binggo, o raffle para magkaigwa nin kuwarta. Naninindugan sinda suno sa haloy nang sinabi kan Watch Tower: “Nungka ming ibinilang na tama an paghagad nin kuwarta para sa gibuhon kan Kagurangnan, arog kan nakatudan nang gibuhon nin ibang relihiyon . . . Sa hiling mi, an kuwartang nakua sa lain-lain na pamamaagi nin paghagad sa ngaran kan satong Kagurangnan makasusupog, bakong akseptable sa saiya, asin dai niya bebendisyunan an nagtao o an nagibo kaiyan.” b

9, 10. Ano an sarong dahilan na kita nagtatao nin boluntad na mga kontribusyon?

⁹ Bilang mga sakop kan Kahadian ngunyan, dai kita kaipuhan piriton na magtao. Kabaliktaran nanggad, ikinakaugma tang gamiton an satong kuwarta asin iba pang pagsadiri para suportaran an mga gibuhon na pang-Kahadian. Taano ta gustong-gusto tang magtao? Siyasaton ta an tulong dahilan.

¹⁰ Inot, nagtatao kita nin boluntad na mga kontribusyon huling namumutan ta si Jehova asin gusto tang gibuhon ‘an nakakauyon sa saiyang paghiling.’ (1 Juan 3:22) Nauugma nanggad siya sa nagsasamba sa saiya na lubos na nagtatao nin gikan sa puso. Siyasaton ta an sinabi ni apostol Pablo dapit sa Kristiyanong pagtao. (Basahon an 2 Corinto 9:7.) Pag nagtatao an sarong tunay na Kristiyano, dai siya nagduduwa-duwa ni napipiritan man. Imbes, nagtatao siya huling iyan ‘minawot niya sa saiyang puso.’ c An buot sabihon, nagtatao siya pagkatapos na pag-isipan kun ano an pangangaipo asin kun paano niya iyan ikakatao. Padaba ni Jehova an arog kaiyan na paratao, huling ‘an Diyos namumuot sa maugmang paratao.’ Sinasabi nin saro pang traduksiyon nin Bibliya: “Namumutan nin Diyos an mga gustong-gustong magtao.”

11. Ano an nagpapahiro sa sato na itao ki Jehova an pinakamarahay na regalo ta?

¹¹ Ikaduwa, nagtatao kita nin materyal na mga kontribusyon bilang pasasalamat ki Jehova sa dakul na bendisyon sa sato. Isip-isipa an sarong prinsipyo sa Ley ni Moises na nakakapahiro sa saro na siyasaton an puso niya. (Basahon an Deuteronomio 16:16, 17.) Pag nag-aatender an mga lalaking Israelita sa tulong taunan na kapiyestahan, kaipuhan na magtao an lambang saro nin regalo na katumbas o ‘kabagay kan biyaya ni Jehova’ sa sainda. Huli kaini, bago mag-atender nin kapiyestahan, kaipuhan na bilangon kan lambang saro an nakamtan niyang mga bendisyon asin siyasaton an saiyang  puso para makapagdesisyon kun ano an posibleng pinakamarahay na regalo na maitatao niya. Kaagid kaiyan, kun hinuhurop-hurop ta an dakul na bendisyon ni Jehova sa sato, napapahiro kitang itao sa saiya an pinakamarahay na regalo na maitatao niyato. An satong bilog na pusong regalo, na kaiba an satong materyal na mga kontribusyon, nagpapahiling kun gurano kadakula an pagpapahalaga ta sa mga bendisyon sa sato ni Jehova.—2 Cor. 8:12-15.

12, 13. Paano ipinapahiling kan satong boluntad na mga kontribusyon an pagkamuot ta sa Hadi, asin gurano kadakula an itinatao kan lambang saro?

¹² Ikatulo, paagi sa satong boluntad na mga kontribusyon, ipinapahiling niyato an pagkamuot sa Hading si Jesu-Cristo. Paano man? Mangnuhon an sinabi niya sa mga disipulo kan huring banggi niya bilang tawo digdi sa daga. (Basahon an Juan 14:23.) ‘Kun an tawo namumuot sako,’ an sabi niya, ‘siya mautob kan sakong tataramon.’ Kaiba sa “tataramon” niya an saiyang pagbuot na ihulit an maugmang bareta kan Kahadian sa bilog na daga. (Mat. 24:14; 28:19, 20) Sinusunod ta an “tataramon” na iyan paagi sa paggibo kan satong bilog na makakaya—na ginagamit an satong panahon, kusog, asin materyal na mga pagsadiri—tanganing suportaran an  paghuhulit kan Kahadian. Paagi kaiyan, ipinapahiling niyato an pagkamuot sa Mesiyanikong Hadi.

¹³ Iyo, bilang maimbod na mga sakop kan Kahadian, gusto tang ipahiling nin bilog na puso an satong suporta sa Kahadian paagi sa pagtao nin pinansiyal na mga kontribusyon. Paano ta iyan magigibo? Personal na desisyon iyan. Itinatao kan kada saro an pinakamakakaya niya. Minsan siring, dakul sa mga kapagtubod ta an dikit sana an materyal na mga bagay. (Mat. 19:23, 24; Sant. 2:5) Pero, nararanga sinda dahil aram nindang pinapahalagahan ni Jehova asin kan Aki niya dawa an saradit na kontribusyon na itinatao nin gikan sa puso.—Mar. 12:41-44.

14. Sa dakul na taon, paano iinaalok kan Mga Saksi ni Jehova an mga literatura ninda?

¹⁴ Sa dakul na taon, may kontribusyon an literatura na iinaalok kan Mga Saksi ni Jehova. Pinagdanay na hababa sagkod sa mapupuwede an isinuherir na kontribusyon tanganing makakua kaiyan dawa an mga nagtitios. Siyempre, kun interesado an kagharong pero dai kayang magkontribwir, andam nanggad an mga parahayag kan Kahadian na iwalat an literatura. An udok sa pusong pagmawot ninda iyo na ikapasakamot iyan sa mga sinsero na mabasa kaiyan asin makikinabang diyan.

15, 16. (a) Anong pagliliwat sa pag-alok kan satong literatura an pinunan kan Namamahalang Grupo kan 1990? (b) Paano ginigibo an boluntad na mga donasyon? (Hilingon man an kahon na “ Sain Napapaduman an Satong mga Donasyon?”)

¹⁵ Kan 1990, pinunan kan Namamahalang Grupo na liwaton an paagi nin pag-alok kan satong literatura. Puon kan taon na iyan sa Estados Unidos, iaalok an gabos na literatura, magdonar man an saro o dai. Ipinaliwanag nin sarong surat sa gabos na kongregasyon sa nasyon na iyan: “An mga magasin asin literatura itatao sa mga parahayag saka interesado na dai mahagad o masuherir nin espesipikong kontribusyon para magkaigwa nin babasahon. . . . Puwedeng magdonar an siisay man na gusto para mataparan an gastos sa satong gibuhon na pagtutukdo, pero puwede sindang magkaigwa nin literatura, magdonar man o dai.” Lininaw kan areglong iyan an pagigin boluntaryo saka relihiyoso kan satong gibuhon asin na “bako kitang mga paratinda kan tataramon nin Diyos.” (2 Cor. 2:17, NW) Pag-abot nin panahon, inimplementar na man an areglong iyan sa mga sangay sa bilog na kinaban.

¹⁶ Paano ginigibo an boluntad na mga donasyon? Sa Kingdom Hall kan Mga Saksi ni Jehova, may kahon para sa kontribusyon na dai gayo risa. An mga indibidwal puwedeng maghulog diyan nin donasyon o direktang magpadara sa legal na mga ahensiya na ginagamit kan Mga Saksi ni Jehova. Kada taon, ipinapahiling sa sarong artikulo kan An Torrengbantayan kun paano itatao an siring na gikan sa buot na mga donasyon.

17-19. Ipaliwanag kun paano ginagamit an idinonar na pondo sa (a) pambilog na kinaban na gibuhon, (b) pagtugdok nin Kingdom Hall sa bilog na kinaban, asin (c) mga gastos kan lokal na kongregasyon.

¹⁷ Pambilog na kinaban na gibuhon. Ginagamit an pondong ini para mataparan an gastos sa paghuhulit sa bilog na kinaban. Kaiba digdi an gastos sa paggibo nin literatura na idinidistribwir  sa bilog na kinaban, pagtugdok asin pagmentenar nin mga sangang opisina, pati pagpunsiyonar nin lain-lain na teokratikong paadalan. Apuwera kaiyan, ginagamit ini para suportaran an mga misyonero, nagbibiyaheng paraataman, asin espesyal payunir. Ginagamit man ini sa pagtao nin tulos-tulos na ayuda sa mga kapagtubod ta pag may kalamidad. d

¹⁸ Pagtugdok nin Kingdom Hall sa bilog na kinaban. Ginagamit an pondo sa pagtabang sa mga kongregasyon para magtugdok o mag-remodel nin Kingdom Hall. Paagi kaini, dakul pang kongregasyon an puwedeng matabangan. e

¹⁹ Mga gastos kan lokal na kongregasyon. Ginagamit an pondo para sa mga gastos asin pagmentenar kan Kingdom Hall. Puwedeng isuherir kan mga elder na ipadara sa lokal na sangang opisina an ibang pondo para magamit sa pagpalakop kan pambilog na kinaban na gibuhon. Sa siring na kamugtakan, iaatubang ninda an sarong resolusyon sa kongregasyon. Kun maaprubaran, ipapadara an isinuherir na pondo. Kada bulan, an accounts servant kan kongregasyon naggigibo nin financial report, na babasahon sa kongregasyon.

20. Paano mo matatawan nin onra si Jehova paagi sa saimong “mahahalagang bagay”?

²⁰ Kun iniisip-isip ta an gabos na bagay na kalabot sa paghuhulit kan Kahadian asin paggibo nin disipulo sa bilog na daga, napapahiro kitang ‘tawan nin onra si Jehova paagi sa satong mahahalagang bagay.’ (Tal. 3:9, 10, NW) Kaiba sa mahahalagang bagay an satong pisikal na kusog, kakayahan nin isip, asin espirituwal na kayamanan. Gusto ta nanggad na gamiton ini nin lubos para sa gibuhon na pang-Kahadian. Pero, tandaan na kaiba man sa satong mahahalagang bagay an materyal na mga pagsadiri ta. Magin determinado kitang itao an kaya ta, kun kaya ta man sana. An satong boluntad na mga donasyon nagtataong onra ki Jehova asin nagpapahiling kan satong suporta para sa Mesiyanikong Kahadian.