Namumutan na Kapwa Parahayag kan Kahadian:

IMAHINARA na miyembro ka kan pamilyang Bethel sa Brooklyn; Biyernes na aga kaidto, Oktubre 2, 1914. Nakatukaw ka sa asignadong lamesang kakanan asin naghahalat sa pag-abot ni Brother C. T. Russell. Biglang buminukas an pinto dangan naglaog siya. Nagpundo nguna siya, arog kan nakatudan na niya, asin maugmang binati an pamilyang Bethel, “Marahay na aga saindo gabos.” Pero pagkatapos kaiyan, imbes na magpasiring sa puwesto niya sa pamayuhan kan lamesa, nagpalakpak siya saka nagsabi nin nakakaugmang paisi: “Tapos na an Mga Panahon kan mga Hentil; tapos na an panahon kan mga hadi ninda!” Dai mo makontrol an saimong kaugmahan—haloy-haloy mo nang hinahalat an panahon na ini! Kaiba kan pamilyang Bethel, inako mo an nakakaugmang paising ini paagi sa halawig asin entusiyastikong pagpalakpak.

 Dakul na dekada na an nakaagi puon kan sabihon iyan ni Brother Russell. Ano na an nagibo kan Kahadian puon kaidto? Dakul na nanggad! Paagi sa Kahadian, progresibong dinadalisay asin sinasanay ni Jehova an saiyang mga lingkod—na pirang ribo sana kan 1914 pero ngunyan labi nang pito may kabangang milyon. Paano ka personal na nakikinabang sa siring na pagsasanay?

Ngunyan, parati tang nadadangog na sinasabi nin mga tugang, “Naghihiro na an langitnon na karwahe ni Jehova!” asin totoo man iyan. Minsan siring, an totoo iyo na puon 1914 pirming naghihiro an langitnon na karwahe, na naglaladawan sa dai nahihiling na kabtang kan organisasyon ni Jehova, siring sa masasabutan paagi sa maingat na pagbasa kan publikasyon na ini. Sa katuyuhan na ikahulit an maugmang bareta sa bilog na kinaban, naggagamit an mga parahayag kan Kahadian nin lain-lain asin bagong pamamaagi, kaiba na an mga peryodiko, pagmartsa para magtao nin impormasyon, pasali, kard sa pagpatotoo, ponograpo, radyo, pati Internet.

Huli sa bendisyon ni Jehova sa gibuhon, nakakapagpublikar na kita nin magagayon na basado sa Bibliya na babasahon sa labing 670 lengguwahe asin inaalok iyan sa gabos na daing bayad. Nagtatabang an mapagsakripisyong mga boluntaryo sa pagtugdok nin mga Kingdom Hall, Assembly Hall, asin pasilidad kan sangang opisina, sa kadagaan na mayaman o limitado an kakayahan sa pinansiyal. Asin kun may kalamidad, tulos-tulos na minahiro an mamumuton na mga tugang para magtaong ayuda sa mga apektadong lugar, na nagpapatunay nanggad na sinda ‘namundag para sa mga panahon nin kasakitan.’—Tal. 17:17, NW.

Kun beses, nagmumukna nin “kariribukan paagi sa ley” an klero asin iba pang nagkokontra, pero napapakusog an pagtubod ta huling pauruutro tang nahihiling na an salang paghihinguwa ninda nagigin dahilan na ‘urog pang mapalakop’ an maugmang bareta.—Sal. 94:20, NW; Fil. 1:12.

Sarong onra para sa samo na magin kairiba kamo, na kapwa mi ‘mga lingkod sa harong.’ Girumdumon nindo na kamo gabos namumutan ming marhay. Ipinapamibi mi na lugod makatabang sa saindo an mga laog kan publikasyon na ini na urog pang pahalagahan kisa kasuarin man an espirituwal na pamana sa saindo.—Mat. 24:45, NW.

Nagmamawot kan pinakamarahay para sa saimo, kami

An saimong mga tugang,

Namamahalang Grupo kan Mga Saksi ni Jehova