Kun gusto mong magin katuod nin Diyos, dapat na yaon ka sa relihiyon na inuuyunan nin Diyos. Sinabi ni Jesus na “an tunay na mga parasamba” masamba sa Diyos kauyon kan “katotoohan.” ( Juan 4:​23, 24) Saro sana an tamang paagi nin pagsamba sa Diyos. (Efeso 4:​4-6) An tunay na relihiyon pasiring sa buhay na daing katapusan, asin an bakong tunay na relihiyon pasiring sa kalaglagan.​—⁠Mateo 7:​13, 14.

Mamimidbid mo an tunay na relihiyon paagi sa pag-obserbar sa mga tawong kabilang diyan. Huling marahay si Jehova, an tunay na mga parasamba sa saiya dapat na marahay na mga tawo. Kun paanong an marahay na puon nin orange nagbubunga nin marahay na mga orange, an tunay na relihiyon nagbubunga nin marahay na mga tawo.​—⁠Mateo 7:​15-20.

An mga katuod ni Jehova hararom an paggalang sa Bibliya. Aram ninda na an Bibliya hali sa Diyos. Tinutugutan nindang giyahan kaiyan an saindang buhay asin tabangan sindang masolusyunan an saindang mga problema asin makanuod manungod sa Diyos. (2 Timoteo 3:16) Pinagmamaigutan nindang gibuhon an saindang ihinuhulit.

 An mga katuod ni Jehova may pagkamuot sa lambang saro. Si Jesus nagpahiling nin pagkamuot sa mga tawo paagi sa pagtukdo sa sainda manungod sa Diyos asin paagi sa pagparahay sa mga may hilang. An mga kabilang sa tunay na relihiyon nagpapahiling man nin pagkamuot sa iba. Arog ni Jesus, bakong hababa an hiling ninda sa mga pobre o iba an lahi. Sinabi ni Jesus na mabibisto nin mga tawo an saiyang mga disipulo paagi sa pagkamuot na ipinapahiling ninda sa kada saro.​—⁠Juan 13:⁠35.

An mga katuod nin Diyos nagtatao nin onra sa pangaran nin Diyos, si Jehova. Kun an saro habong gamiton an saimong pangaran, dayupot mo daw na katuod an tawong iyan? Bako! Kun kita may katuod, ginagamit niyato an pangaran niya saka nagsasabi kita sa iba nin marahay na mga bagay manungod sa saiya. Kaya an mga gustong magin katuod nin Diyos maninigo na gamiton an saiyang pangaran asin magtaram sa iba manungod sa saiya. Gusto ni Jehova na gibuhon niyato iyan.​—⁠Mateo 6:9; Roma 10:​13, 14.

Arog ni Jesus, an mga katuod nin Diyos nagtutukdo sa mga tawo manungod sa Kahadian nin Diyos. An Kahadian nin Diyos iyo an gobyerno sa langit na magibo sa daga na magin paraiso. Ipinapaabot sa iba kan mga katuod nin Diyos an maugmang baretang ini manungod sa Kahadian nin Diyos.​—⁠Mateo 24:⁠14.

An Mga Saksi ni Jehova naghihinguwang magin katuod nin Diyos. Iginagalang ninda an Bibliya asin may pagkamuot sinda sa lambang saro. Ginagamit man ninda saka tinatawan nin onra an pangaran nin Diyos asin tinutukduan an iba manungod sa Kahadian nin Diyos. An Mga Saksi ni Jehova nag-uutob kan tunay na relihiyon digdi sa daga ngunyan.