An Paraiso dai magigin arog kan kinaban na iniistaran niyato ngunyan. Dai lamang ginusto nin Diyos na an daga mapano nin mga problema asin pagmundo, nin kulog asin pagdusa. Sa maabot na panahon, gigibuhon nin Diyos na paraiso an daga. Magigin anong klase an Paraiso? Hilingon niyato an sinasabi kan Bibliya:

Marahay na mga tawo. An Paraiso an magigin istaran kan mga katuod nin Diyos. Magibo sinda nin marahay sa kada saro. Mamumuhay sinda na sinusunod an matanos na mga pamantayan nin Diyos.​—⁠Talinhaga 2:⁠21.

Dakul na kakanon. Sa Paraiso, dai magkakaigwa nin gutom. Sinasabi kan Bibliya: “Magkakaigwa nin abundang tipasi [o, kakanon] sa ibabaw kan daga.”​—⁠Salmo 72:⁠16.

Magagayon na harong saka nakakaugmang trabaho. Sa Paraisong daga, an lambang pamilya magkakaigwa nin sadiring harong. An gabos magkakaigwa nin trabaho na magtatao nin tunay na kaugmahan.​—⁠Isaias 65:​21-23.

 Katuninungan sa bilog na kinaban. An mga tawo dai na magraralaban asin magagadan sa giyera. Sinasabi kan Tataramon nin Diyos: “Pinapapundo [nin Diyos] an mga giyera.”​—⁠Salmo 46:​8, 9.

Marahay na salud. Nanunuga an Bibliya: “Mayo nin nag-iistar [sa Paraiso] na masabi: ‘Naghihilang ako.’ ” (Isaias 33:24) Saka, dai na nin magigin pilay o buta o bungog o pula.​—⁠Isaias 35:​5, 6.

Matatapos na an kulog, pagmundo, asin kagadanan. Sinasabi kan Tataramon nin Diyos: “An kagadanan mawawara na, dai na sagkod magkakaigwa nin pagmundo ni pagtangis ni kulog. An inot na mga bagay nakalihis na.”​—⁠Kapahayagan 21:⁠4.

Mawawara na an mga tawong maraot. Nangangako si Jehova: An “mga maraot . . . pupuhuon sa mismong daga; asin kun manungod sa mga madaya, sinda hahalion diyan.”​—⁠Talinhaga 2:⁠22.

Mamumutan asin igagalang kan mga tawo an lambang saro. Dai na magkakaigwa nin inhustisya, pang-aapi, kahanaban, saka pagkaungis. An mga tawo magkakasararo asin mamumuhay kauyon kan matanos na mga pamantayan nin Diyos.​—⁠Isaias 26:⁠9.