Gusto ni Satanas na ika magmahika. Dakul an nag-aatang sa mga apuon o espiritu tangani na protektaran an saindang sadiri sa kapahamakan. Ginigibo ninda ini ta natatakot sinda sa kapangyarihan kan kinaban nin mga espiritu. Nagsusulot sinda nin mga singsing o pulseras na may mahika. Iniinom ninda o ihinahaplas sa saindang hawak, o lawas, an mga “bulong” na may kapangyarihan daa sa mahika. Sa saindang harong o sa daga, may mga tawong nagtatago nin mga bagay na pinapaniwalaan na may kapangyarihan na magprotektar. An iba naggagamit nin may mahikang “bulong” para daa umasenso an saindang negosyo, o makapasar sa eksam, o mapasimbag an iniilusyunan.

An pinakamarahay na proteksiyon mo tumang ki Satanas iyo an magin katuod mo si Jehova. Si Jehova Diyos asin an saiyang mga anghel mas makapangyarihan na marhay kisa ki Satanas asin sa saiyang mga demonyo. (Santiago 2:19; Kapaha­yagan 12:⁠9) Gustong-gusto ni Jehova na ipahiling an saiyang kusog para sa saiyang mga katuod​—⁠an mga talagang maimbod sa ­saiya.​—⁠2 Cronica 16:⁠9.

An Tataramon nin Diyos nagsasabi: “Dai ka magmahika.” Sinabi ni Jehova na maraot an mahika asin pangkukulam huli ta an naggigibo kaiyan mamumugtak sa kapangyarihan ni Satanas na Diyablo.​—⁠Levitico 19:⁠26.