Sa paghona mo daw may katuyohan an buhay? An ebolusyonistang si William B. Provine nagsabi: “An naaraman niato manongod sa proseso nin ebolusyon igwa nin dakulaon na epekto sa sato, na nakakaapektar sa satong pakamate na may kahulogan an buhay.” An saiyang kongklusyon? “Mayo akong naheheling na katuyohan kan uniberso o tunay na kahulogan kan buhay nin tawo.”³²

Isip-isipa an kahulogan kan mga tataramon na iyan. Kun mayo nin tunay na kahulogan an buhay, kun siring mayo ka nin ibang katuyohan sa buhay kundi an maghingoa na minsan paano makagibo nin marahay asin tibaad ipasa an saimong henetikong mga karakteristiko sa sunod na henerasyon. Kun ika magadan, mayo ka na sagkod lamang. An saimong hotok, kaiba an kakayahan kaiyan na mag-isip, mangatanosan, asin maghorophorop sa kahulogan nin buhay, resulta lang nin pagkanorongod sana sa naturalesa.

Bako sana iyan. An dakol na naniniwala sa ebolusyon marigon na nagsasabi na mayo nin Dios o na dai sia makikiaram sa mga gibo-gibo nin tawo. Arin man dian, an satong futuro madepende sa mga lider sa politika, akademya, asin relihion. Kun pagbabasaran an nakaaging rekord nin siring na mga tawo, magpapadagos an karibarawan, iriwal, asin karatan na nagpapasakit sa sosyedad nin tawo. Kun talagang totoo an ebolusyon, garo baga dakol an dahelan na mamuhay sono sa sarabihon na impluwensiado nin paniniwala sa kapaladan: “Magkarakan asin mag-irinom kita, huli ta sa aga magagadan kita.”—1 Corinto 15:32.

Sa kabaliktaran, itinotokdo kan Biblia: “Yaon sa [Dios] an burabod nin buhay.” (Salmo 36:9) An mga tataramon na iyan igwa nin hararom na kahulogan.

Kun totoo an sinasabi kan Biblia, an buhay talagang may kahulogan. An satong Kaglalang igwa nin mamomoton na katuyohan para sa gabos na gustong mamuhay kaoyon kan saiyang kabotan. (Eclesiastes 12:13) Kaiba sa katuyohan na iyan an panugang buhay sa sarong kinaban na mayo nin karibarawan, iriwal, asin karatan—asin mayo na ngani nin kagadanan.—Salmo 37:10, 11; Isaias 25:6-8.

May marahay na dahelan na minilyon sa bilog na kinaban an naniniwala na mayo nang ibang makakatao nin kahulogan sa buhay kundi an pakanood manongod sa Dios asin pagkuyog sa saiya! (Juan 17:3) An siring na paniniwala bakong basado sa basta sana paniniwala. Malinaw an ebidensia—linalang an buhay.