KAPITULO 1
“Padumán Kamo Asin Gumibo Kamo nin mga Disipulo”
Sumaryo kan Mga Gibo kan mga Apostol asin kun paano iyan konektado sa panahon ta
1-6. Magsambit nin sarong eksperyensiya nin mga Saksi na naghuhulit sa manlain-lain na kamugtakan.
PARA ki Rebecca, sarong hoben na Saksi ni Jehova sa Ghana, an teritoryo niya sa paghuhulit iyo an saindang eskuwelahan. Pirmi siyang may dara sa bag niya na mga literatura na basado sa Bibliya. Pag break time, naghahanap siya nin mga oportunidad na makapagpatotoo sa mga kapwa niya estudyante. Nakapuon si Rebecca nin mga pag-adal sa Bibliya sa nagkapira niyang kaklase.
2 Sa isla nin Madagascar na harani sa sirangan na baybayon kan Aprika, duwang payunir an regular na naglalakaw nin mga 25 kilometros sa irarom nin grabeng init kan aldaw para makaabot sa sarong puwerang baryo. Nagkokondukta sinda diyan nin nagkapirang pag-adal sa Bibliya sa mga interesado.
3 Para maabot an mga tawong nakaistar sa may pangpang kan salog nin Paraguay saka nin Paraná, tarabang na naggibo nin lantsa an mga Saksi sa Paraguay kaiba an mga boluntaryo hali sa 15 iba pang nasyon. An 45 toneladang lantsang ini kayang magsakay nin sagkod sa 12 katawo. Diyan na man nagtuturog an mahihigos na mga parahulit kan Kahadian tanganing maipalakop an maugmang bareta sa mga lugar na masakit madumanan.
4 Sa norteng parte kan kontinente nin North America, inaaprobetsaran kan mga Saksi sa Alaska an sarong kakaibang oportunidad na maghulit pag tig-init, na diyan dakul an turista. Sa panahon na iyan na minaarabot an mga cruise ship sakay an dakul na turista hali sa manlain-lain na nasyon, an mga Saksi duman minapuwesto sa may duungan asin nagdidispley nin mga literatura na basado sa Bibliya sa manlain-lain na lengguwahe. Nagin dakulang tabang man sa lugar na iyan an eroplano para maabot an hararayong baryo. Huli kaiyan, naipapalakop an maugmang bareta sa mga komunidad nin Aleut, Athabascan, Tsimshian, asin Tlingit.
5 Si Larry na taga Texas, Estados Unidos, igwa nin espesyal na teritoryo—an nursing home kun sain siya nakaistar. Dawa naka-wheelchair siya huli sa aksidente, pirming sibot si Larry. Ihinihiras niya sa iba an mensahe kan Kahadian, kaiba na an saiyang paglaom na basado sa Bibliya na sa irarom kan pamamahala kan Kahadian makakalakaw giraray siya.—Isa. 35:5, 6.
6 Para makaatender sa sarong asembleya sa norteng parte kan Myanmar, tulong aldaw na nagbiyahe an sarong grupo nin mga Saksi sakay nin pampasaherong barko haling Mandalay. Gustong-gusto nindang ihulit an maugmang bareta kaya nagdara sinda nin mga literatura sa Bibliya asin iinalok iyan sa mga kapwa ninda pasahero. Sa kada pagpundo kan barko sa sarong banwaan o baryo, nagbababa an mahihigos na mga parahulit na ini asin tulos na nag-aalok nin mga literatura sa mga harong. Kasabay kaiyan, may bagong mga pasahero na minasakay sa barko, asin sinda an nagigin “bagong teritoryo” kan mga parahayag kan Kahadian pagbalik ninda sa barko.
7. Sa anong mga pamamaagi nagpapatotoo mapadapit sa Kahadian nin Diyos an mga parasamba ni Jehova, asin ano an pasuhan ninda?
7 Arog kan mga tugang na sinambit sa pira sanang halimbawang ini, an maigot na mga parasamba ni Jehova sa bilog na kinaban ‘lubos na nagpapatotoo mapadapit sa Kahadian nin Diyos.’ (Gibo 28:23) Nagpapatotoo sinda sa harong-harong, sa mga tawo sa tinampo, paagi sa surat, asin paagi sa telepono. Nakasakay man sinda sa bus, namamasyar sa parke, o pag break time sa trabaho, gustong-gusto nindang humanap nin mga pagkakataon na makapagpatotoo mapadapit sa Kahadian nin Diyos. Puwedeng magkakaiba an mga pamamaagi, pero saro lang an pasuhan—ihulit an maugmang bareta sain man igwang tawo.—Mat. 10:11.
8, 9. (a) Taano ta masasabing sarong milagro an paglakop kan gibuhon na paghuhulit kan Kahadian? (b) Anong nakakapaisip na hapot an minabangon, asin ano an kaipuhan tang gibuhon tanganing masimbag iyan?
8 Ika, namumutan ming parabasa, kabilang ka daw sa kadakul na parabalangibog kan Kahadian na aktibo ngunyan sa labing 235 kadagaan? Kun iyo, may kabtang ka sa nakakaugmang paglakop kan gibuhon na paghuhulit kan Kahadian! Masasabi nanggad na sarong milagro an naisasagibo sa bilog na kinaban kan mga lingkod ni Jehova. Sa ibong nin dakulang mga ulang asin kadipisilan—maski an mga pagbabawal kan gobyerno saka direktang persekusyon—an mga Saksi ni Jehova lubos na nagpapatotoo mapadapit sa Kahadian nin Diyos sa mga tawo sa gabos na nasyon.
9 An sarong nakakapaisip na hapot iyo ini: Taano ta mayo nin ulang, maski pa mga pagkontra ni Satanas, an makakapugol sa pag-abante kan gibuhon na paghuhulit kan Kahadian? Tanganing masimbag iyan, kaipuhan tang balikan an mga nangyari kaidtong inot na siglo C.E. Tutal, ipinagpapadagos niyatong Mga Saksi ni Jehova sa presenteng panahon an gibuhon na pinunan kan panahon na idto.
Sarong Asignasyon na Mahiwason an Sakop
10. Sa anong gibuhon nagin dedikado si Jesus, asin ano an aram niya manungod sa gibuhon na ini?
10 An Kag-establisar kan Kristiyanong kongregasyon, si Jesu-Cristo, nagin dedikado sa paghuhulit kan maugmang bareta kan Kahadian nin Diyos; iyan an nagin buhay niya. Sarong beses, sinabi niya: “Dapat ko man na ipahayag sa ibang mga siyudad an maugmang bareta kan Kahadian nin Diyos, huli ta ini an dahilan kaya ako isinugo.” (Luc. 4:43) Aram ni Jesus na dai niya matatapos an pinunan niyang gibuhon na siya sana. Bago siya magadan, ihinula niya na an mensahe kan Kahadian ihuhulit “sa gabos na nasyon.” (Mar. 13:10) Alagad paano ini maisasagibo, asin siisay an masagibo kaini?
“Padumán kamo asin gumibo kamo nin mga disipulo sa mga tawo kan gabos na nasyon.”—Mateo 28:19
11. Anong mahalagang marhay na asignasyon an itinao ni Jesus sa mga disipulo niya, asin anong suporta an aakuon ninda tanganing maisagibo iyan?
11 Pagkatapos na siya magadan asin buhayon liwat, nagpahiling si Jesus sa saiyang mga disipulo asin tinawan sinda nin mahalagang marhay na asignasyon: “Kaya, padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda sa ngaran kan Ama asin kan Aki asin kan banal na espiritu, na tinutukduan sinda na utubon an gabos na bagay na ipinagbuot ko sa saindo. Asin uya! kaibanan nindo ako sa gabos na aldaw sagkod sa pagtatapos kan sistema nin mga bagay.” (Mat. 28:19, 20) An mga tataramon na “kaibanan nindo ako” nagpaparisa na an mga disipulo susuportaran niya sa gibuhon na paghuhulit asin paggibo nin disipulo. Kakaipuhanon ninda an suportang iyan, huling ihinula ni Jesus na “ikakaungis [sinda] kan gabos na nasyon.” (Mat. 24:9) Mag-aako man nin saro pang tabang an mga disipulo. Bago magsakat sa langit, sinabi sa sainda ni Jesus na tatawan sinda kan banal na espiritu nin kapangyarihan o puwersa tanganing magin mga saksi niya “sagkod sa pinakaharayong parte kan daga.”—Gibo 1:8.
12. Anong mahalagang mga hapot an minabangon, asin taano ta importante nanggad na aram ta an simbag sa mga iyan?
12 Uni ngunyan an nagkapirang mahalagang hapot: Isinapuso daw kan mga apostol ni Jesus asin kan iba pang mga disipulo kan inot na siglo an saindang asignasyon? An sadit na grupo daw na ini nin mga Kristiyanong lalaki asin babayi lubos na nagpatotoo mapadapit sa Kahadian nin Diyos dawa napapaatubang sa grabeng persekusyon? Talaga daw na nag-ako sinda nin suporta hali sa langit asin sa banal na espiritu ni Jehova sa saindang gibuhon na paggibo nin mga disipulo? An mga ini saka an iba pang konektadong mga hapot sinisimbag sa libro kan Bibliya na Mga Gibo. Importante nanggad na aram ta an mga simbag sa mga iyan. Taano? Huling sinabi ni Jesus na an gibuhon na iinasignar niya magpapadagos “sagkod sa pagtatapos kan sistema nin mga bagay.” Kaya an asignasyon na ini aplikado sa gabos na tunay na Kristiyano, kaiba na kita na nabubuhay sa panahon na ini kan katapusan. Huli kaiyan, interesado nanggad kita sa mga rekord nin kasaysayan na nasa libro nin Mga Gibo.
Sumaryo kan Libro nin Mga Gibo
13, 14. (a) Siisay an nagsurat kan libro nin Mga Gibo, asin paano nakua kan kagsurat kaiyan an mga impormasyon? (b) Ano an laog kan libro nin Mga Gibo?
13 Siisay an nagsurat kan libro nin Mga Gibo? Mayong sinambit sa mismong libro na pangaran kan kagsurat kaiyan, pero ipinaparisa kan pambukas na mga tataramon na an kagsurat kan Mga Gibo iyo man an kagsurat kan Ebanghelyo ni Lucas. (Luc. 1:1-4; Gibo 1:1, 2) Kaya, kaidto pa, si Lucas, sarong “namumutan na doktor” asin maingat na historyador, an minimidbid na kagsurat kan Mga Gibo. (Col. 4:14) Mga 28 taon na peryodo nin panahon an sakop kan pagkasaysay sa libro, puon kan magsakat si Jesus sa langit kan 33 C.E. sagkod sa pagkapreso ni apostol Pablo sa Roma kan mga 61 C.E. An paggamit ni Lucas nin “sinda” tapos rinibayan niya nin “kami,” nagpaparisa na presente siya sa dakul na mga pangyayaring isinasaysay niya. (Gibo 16:8-10; 20:5; 27:1) Huling sarong maingat na parasiyasat si Lucas, daing duda na nakua niya an mga impormasyon hali mismo ki Pablo, Bernabe, Felipe, asin sa iba pa.
14 Ano an laog kan libro nin Mga Gibo? Bago kaini, sa saiyang Ebanghelyo, isinurat ni Lucas an manungod sa mga sinabi asin ginibo ni Jesus. Pero sa libro nin Mga Gibo, isinurat ni Lucas an manungod sa mga sinabi asin ginibo kan mga parasunod ni Jesus. Kaya, an libro nin Mga Gibo nagsasaysay manungod sa mga tawong naisagibo an sarong pambihirang gibuhon, dawa ngani an dakul sa sainda minansay kan mga taga luwas na “daing inadalan asin mga ordinaryong tawo.” (Gibo 4:13) Sa halipot, isinasaysay sa sato kan ipinasabong na rekord na iyan kun paano inestablisar an Kristiyanong kongregasyon asin kun paano ini nag-uswag. Ipinapahiling kan Mga Gibo kun paano an mga Kristiyano kan inot na siglo naghulit—su mga pamamaagi ninda saka sabuot. (Gibo 4:31; 5:42) Itinatampok kaiyan an papel kan banal na espiritu sa pagpalakop kan maugmang bareta. (Gibo 8:29, 39, 40; 13:1-3; 16:6; 18:24, 25) Idinuduon kan libro nin Mga Gibo an tema kan Bibliya, na manungod sa pagpakangbanal kan pangaran nin Diyos paagi kan saiyang Kahadian sa irarom kan pamamahala ni Cristo, asin ipinapahiling kan libro an mapangganang paglakop kan mensahe kan Kahadian sa ibong nin grabeng pagkontra.—Gibo 8:12; 19:8; 28:30, 31.
15. Sa anong mga paagi kita makikinabang sa pagsiyasat sa libro nin Mga Gibo?
15 Tunay nanggad na nakakapukaw sa buot asin nakakapakusog sa pagtubod an pagsiyasat sa libro kan Bibliya na Mga Gibo! Kun huhurop-hurupon ta an mga halimbawa nin kusog nin buot asin kaigutan kan inot na mga parasunod ni Cristo, mapapahiro nanggad an satong puso. Mapapahiro kitang arugon an pagtubod kan satong mga tugang kan inot na siglo. Kaya, magigin kitang mas andam na isagibo an itinaong asignasyon sa sato na “padumán kamo asin gumibo kamo nin mga disipulo.” An publikasyon na binabasa mo ngunyan dinisenyo para tabangan ka na pag-adalan na marhay an libro nin Mga Gibo.
Sarong Pantabang sa Bibliya na Dinisenyo Para Tabangan Kita
16. Ano an tulong katuyuhan kan publikasyon na ini?
16 Sa kabilugan, ano an katuyuhan kan publikasyon na ini? An tulong katuyuhan kan librong ini iyo na (1) pakusugon an satong kumbiksiyon na sinusuportaran ni Jehova, paagi kan saiyang banal na espiritu, an gibuhon na paghuhulit kan Kahadian asin paggibo nin disipulo, (2) pukawon an satong kaigutan sa ministeryo paagi sa pagsiyasat sa halimbawa kan mga parasunod ni Cristo kan inot na siglo, asin (3) pararumon an satong paggalang sa organisasyon ni Jehova asin sa mga nanginginot sa gibuhon na paghuhulit asin sa mga nangangataman sa mga kongregasyon.
17, 18. Paano ipinepresentar an mga impormasyon sa publikasyon na ini, asin anong mga feature kaini an talagang makakatabang sa personal na pag-adal sa Bibliya?
17 Paano ipinepresentar an mga impormasyon sa publikasyon na ini? Mahihiling mo na binanga ini sa walong seksiyon, na an kada seksiyon kinokobrehan an sarong porsiyon kan libro nin Mga Gibo. An katuyuhan kan masunod na mga kapitulo, bako para magtao nin bersikulo por bersikulo na pagtukar kan Mga Gibo, kundi para makakua nin mga leksiyon sa mga pangyayaring isinasaysay sa librong ini kan Bibliya asin para tabangan kita na mahiling kun paano niyato maiaaplikar sa satong sadiri an mga puntong nanunudan ta. Sa kapinunan kan kada kapitulo, nakasurat an pinakatema kan kapitulong iyan asin an sitadong teksto sa Kasuratan na nagpapahiling kan porsiyon sa Mga Gibo na pag-uulayan.
18 May iba pang mga feature an publikasyon na ini na talagang makakatabang sa personal na pag-adal sa Bibliya. An magagayon na artwork na nagpapahiling kan nakakapukaw sa buot na mga pangyayari sa libro nin Mga Gibo makakatabang sa saimo na maimahinar an nangyayari mantang hinuhurop-hurop mo an pagkasaysay sa Bibliya. Dakul na kapitulo an may kaibang mga kahon na nagtatao nin dagdag pang mga impormasyon. May mga kahon na nagtatao nin impormasyon manungod sa buhay nin sarong karakter sa Bibliya na an pagtubod angay nanggad na arugon. May mga kahon man na nagtatao nin dagdag na detalye manungod sa mga lugar, mga pangyayari, mga kaugalian, o iba pang mga karakter na nasambit sa Mga Gibo.
Gibuhon nin may pagkaapurado an iinasignar sa saindong teritoryo
19. Anong pagsiyasat sa sadiri an dapat na gibuhon ta sa pana-panahon?
19 Makakatabang sa saimo an publikasyon na ini na makagibo nin onestong pagsiyasat sa sadiri. Gurano ka man kahaloy nang naglilingkod bilang parahayag kan Kahadian, marahay na sa pana-panahon magpundo nguna asin analisaron an mga priyoridad mo sa buhay asin an pagmansay mo sa Kristiyanong ministeryo. (2 Cor. 13:5) Haputon an sadiri: ‘Napagdadanay ko daw an pakamati nin pagkaapurado sa gibuhon na paghuhulit? (1 Cor. 7:29-31) Ihinuhulit ko daw an maugmang bareta nin may kumbiksiyon asin kaigutan? (1 Tes. 1:5, 6) Lubos daw akong nakikikabtang sa gibuhon na paghuhulit asin paggibo nin disipulo sagkod na posible?’—Col. 3:23.
20, 21. Taano ta apuradong marhay an itinao sa satong asignasyon, asin ano an dapat na magin determinasyon niyato?
20 Lugod na pirmi niyatong tandaan na inasignaran kita nin mahalagang gibuhon—an maghulit asin gumibo nin mga disipulo. Sa kada aldaw na minalihis, lalong nagigin mas apurado an asignasyon na iyan. An katapusan kan sistemang ini nin mga bagay marikas na nagdadangadang. Urog kisa kasuarin man, dakulon na buhay ngunyan an nakataya. Dai ta aram kun gurano pa kadakul na tawong igwang pusong nasa tamang kamugtakan an mahimati sa satong mensahe. (Gibo 13:48) Pero paninimbagan niyato na tabangan an siring na mga tawo bago mahuri an gabos.—1 Tim. 4:16.
21 Huli kaini, mahalagang marhay na arugon ta an halimbawa kan maigot na mga parahulit kan Kahadian kan inot na siglo. Lugod na an maingat mong pag-adal sa publikasyon na ini makapahiro saimo na maghulit na may urog na kaigutan asin kusog nin buot. Asin lugod na mapakusog an saimong determinasyon na padagos na ‘lubos na magpatotoo mapadapit sa Kahadian nin Diyos.’—Gibo 28:23.
