1. Ano an mga pagkakaagid kan inot na mga Kristiyano asin kan Mga Saksi ni Jehova sa ngunyan?

 MAIGOT sindang nagpatotoo. Mapakumbaba nindang inako an tabang asin paggiya kan banal na espiritu. Dai napapundo nin persekusyon an saindang paghuhulit. Asin abunda sindang benindisyunan nin Diyos. Gabos ini nagin totoo sa inot na mga Kristiyano, asin totoo man ini sa Mga Saksi ni Jehova sa ngunyan.

2, 3. Taano ta napapalain an libro nin Mga Gibo?

² Siguradong naparigon ka kan nakakapakusog sa pagtubod na mga pagkasaysay sa pano nin aksiyon na libro kan Bibliya na Mga Gibo kan mga Apostol! Napapalain an librong iyan, huling iyan sana an solamenteng ipinasabong nin Diyos na pagkasaysay manungod sa kasaysayan kan Kristiyanismo kan inot na siglo.

³ Sinambit sa libro nin Mga Gibo an pangaran kan 95 indibidwal hali sa 32 na kadagaan, 54 siyudad, asin 9 na isla. Sarong buhay na buhay na istorya iyan manungod sa mga tawo—mga ordinaryong tawo, mapalangkaw na mga panatiko sa relihiyon, orgulyosong mga pulitiko, asin madahas na mga parapersegir. Pero an pinakamahalaga, manungod iyan sa satong mga tugang kan inot na siglo na napaatubang sa mga problema sa buhay pero maigot na naghulit kan maugmang bareta.

4. Taano ta harani an buot ta sa mga indibidwal na arog ni apostol Pablo, Tabita, asin kan iba pang maimbod na mga saksi kaidto?

⁴ Haros 2,000 na taon na an nakalihis puon kan panahon kan maiigot na mga apostol na si Pedro asin Pablo, kan namumutan na doktor na si Lucas, kan bukas-palad na si Bernabe, kan makusog an buot na si Esteban, kan mabuot na si Tabita, kan mapagpadagos na si Lidia, asin kan dakul na iba pang maimbod na mga saksi. Pero dawa ngani nabuhay sinda sa ibang panahon, harani an buot ta sa sainda. Taano? Dahil arog ninda, tinawan man kita ni Jesus nin asignasyon na gumibo nin mga disipulo. (Mat. 28:19, 20) Dakulang onra nanggad na makikabtang diyan!

5. Sain pinunan na isagibo kan inot na mga parasunod ni Jesus an asignasyon sa sainda na maghulit?

⁵ Hurop-hurupon an asignasyon na itinao ni Jesus sa saiyang mga  parasunod. “Maako kamo nin kapangyarihan pag umabot sa saindo an banal na espiritu,” an sabi niya, “asin magigin mga saksi ko kamo sa Jerusalem, sa bilog na Judea saka Samaria, asin sagkod sa pinakaharayong parte kan daga.” (Gibo 1:8) Inot, tinawan nin kapangyarihan kan banal na espiritu an mga disipulo na magin mga saksi “sa Jerusalem.” (Gibo 1:1–8:3) Dangan, sa paggiya kan espiritu, nagpatotoo sinda “sa bilog na Judea saka Samaria.” (Gibo 8:4–13:3) Tapos pinunan nindang ihulit an maugmang bareta “sagkod sa pinakaharayong parte kan daga.”—Gibo 13:4–28:31.

6, 7. Sa pagsagibo kan satong ministeryo, ano an bentaha niyato kumpara sa mga kapagtubod ta kan inot na siglo?

⁶ An saimong mga kapagtubod kan inot na siglo mayo pa kan kumpletong Bibliya na magagamit ninda sa saindang gibuhon na pagpatotoo. An Ebanghelyo ni Mateo naisurat kaidto sanang mga 41 C.E. Natapos an nagkapira sa mga surat ni Pablo bago nakumpleto an Mga Gibo, kaidtong mga 61 C.E. Pero an inot na mga Kristiyano mayo nin personal na kopya kan kumpletong Banal na Kasuratan ni kan manlain-lain na publikasyon para itao sa mga interesado. Bago magin mga disipulo ni Jesus, nadadangog na kan mga Kristiyanong Judio an pagbasa kan Hebreong Kasuratan sa sinagoga. (2 Cor. 3:14-16) Alagad kaipuhan pa man giraray nindang magin mahigos na mga paraadal, huling posibleng marhay na kaipuhan nindang memoryahon an kasuratan para makotar iyan.

⁷ Sa ngunyan, kadaklan sa sato igwa nin personal na kopya nin Bibliya asin nin dakul na literatura na basado sa Bibliya. Naggigibo kita nin mga disipulo paagi sa pagpahayag kan maugmang bareta sa 240 kadagaan asin sa dakul na lengguwahe.

8, 9. (a) Tinabangan kan banal na espiritu an mga disipulo ni Jesus na magibo an ano? (b) Ano an pigpoprodusir kan maimbod na uripon sa tabang kan espiritu nin Diyos?

⁸ Kan asignaran ni Jesus an saiyang mga disipulo na magin mga saksi, sinabi niya sa sainda: “Maako kamo nin kapangyarihan pag umabot sa saindo an banal na espiritu.” Sa paggiya kan espiritu nin Diyos, o kan saiyang aktibong puwersa, magigibo kan mga parasunod ni Jesus na magin mga saksi sa bilog na daga. Paagi sa banal na espiritu, si Pedro asin Pablo nagpaumay nin mga may hilang, nagpalayas nin mga demonyo, asin nagbuhay pa ngani nin mga gadan! Pero, igwa pa nin urog na mahalagang katuyuhan an kapangyarihan na inako ninda paagi sa banal na espiritu. Pinangyari kaiyan na maipaabot kan mga apostol asin kan iba pang mga disipulo an tamang kaaraman na nangangahulugan nin buhay na daing katapusan.—Juan 17:3.

⁹ Kan aldaw nin Pentecostes 33 C.E., an mga disipulo ni Jesus nagtaram sa “lain-lain na lengguwahe, sigun sa kun ano an pinangyari kan espiritu na maitaram ninda.” Sa siring, nakapagpatotoo sinda manungod sa “kahanga-hangang mga bagay nin Diyos.” (Gibo 2:1-4, 11) Dai kita milagrosong nakakapagtaram ngunyan sa manlain-lain na lengguwahe. Pero sa tabang  kan espiritu nin Diyos, an maimbod na uripon nagpoprodusir nin mga literaturang basado sa Bibliya sa dakul na lengguwahe. Halimbawa, minilyon na kopya kan An Torrengbantayan asin Gumising! an iniimprenta kada bulan, asin an satong website na jw.org nagtatampok nin basado sa Bibliya na mga publikasyon asin mga video sa labing 1,000 lengguwahe. Gabos ini nakakatabang sa sato na maipahayag an “kahanga-hangang mga bagay nin Diyos” sa mga tawo kan gabos na nasyon, tribo, asin lengguwahe.—Kap. 7:9.

10. Puon 1989, ano na an naisagibo may koneksiyon sa pagtradusir nin Bibliya?

¹⁰ Puon 1989, tinawan nin espesyal na atensiyon kan maimbod na uripon na magin available an Bagong Kinaban na Traduksiyon kan Banal na Kasuratan sa dakul na lengguwahe. An Bibliyang ini naitradusir na sa labing 200 na lengguwahe, asin manampulong milyon na kopya kaiyan an naimprenta—asin dakulon pa an iniimprenta. An mga paghihinguwang ini dai magigin mapanggana kun bako sa tabang nin Diyos asin kan saiyang espiritu.

11. Ano na an naisagibo may koneksiyon sa pagtradusir nin mga publikasyon kan mga Saksi?

¹¹ An pagtradusir ginigibo nin rinibong boluntaryong Kristiyano sa labing 150 nasyon asin kadagaan. Dai ta ini dapat ipagngalas huling mayo na nin ibang organisasyon digdi sa daga an ginigiyahan kan banal na espiritu sa “lubos na pagpatotoo” sa bilog na kinaban manungod sa Diyos na Jehova, sa saiyang Mesiyanikong Hadi, asin sa naestablisar na Kahadian sa langit!—Gibo 28:23.

12. Paano naisagibo ni Pablo asin kan ibang mga Kristiyano an gibuhon na pagpatotoo?

¹² Kan magpatotoo si Pablo sa mga Judio asin Hentil sa Antioquia sa Pisidia, “nagturubod an gabos na igwang pusong nasa tamang kamugtakan para sa buhay na daing katapusan.” (Gibo 13:48) Sa pagtatapos kan libro nin Mga Gibo, isinurat ni Lucas na “ihinuhulit [ni Pablo] an Kahadian nin Diyos, . . . na libre nanggad na nakakapagtaram manungod diyan na mayong ulang.” (Gibo 28:31) Sain nagpapatotoo an apostol? Sa Roma mismo—an pambilog na kinaban na kapangyarihan kaidto! Iyan man paagi sa mga diskurso o sa iba pang mga pamamaagi, naisagibo kan inot na mga parasunod ni Jesus an gabos nindang gibuhon sa pagpapatotoo paagi sa tabang asin paggiya kan banal na espiritu.

13. Taano ta dapat kitang mamibi pag pinepersegir kita?

¹³ Kan nakaeksperyensiya nin persekusyon an inot na mga disipulo ni Jesus, nakimahirak sinda ki Jehova na tawan sinda nin kusog nin buot. Ano an resulta? Napano sinda nin banal na espiritu asin daing takot nindang ipinahayag an tataramon nin Diyos. (Gibo 4:18-31) Namimibi man kita na lugod tawan kita nin kadunungan asin nin kusog tanganing padagos na makapagpatotoo sa ibong nin persekusyon. (Sant. 1:2-8) Huling binebendisyunan kita nin Diyos asin tinatabangan kan saiyang espiritu,  padagos kitang nakakapaghulit. Mayo nin makakapapundo sa gibuhon na pagpatotoo—iyan man grabeng pagkontra o maringis na persekusyon. Pag pinepersegir kita, kaipuhan ta nanggad na mamibi para sa banal na espiritu asin para sa kadunungan asin kusog nin buot na maipahayag an maugmang bareta.—Luc. 11:13.

14, 15. (a) Ano an nagin resulta “kan persekusyon na nangyari pagkatapos kan ginibo ki Esteban”? (b) Sa satong panahon, paano naaraman kan dakul na tawo sa Siberia an katotoohan?

¹⁴ Daing takot na nagpatotoo si Esteban bago siya nagadan sa kamot kan saiyang mga kalaban. (Gibo 6:5; 7:54-60) Huli sa “grabeng persekusyon” na nangyari kan panahon na iyan, an gabos na disipulo apuwera sa mga apostol nagkasuruway-suway sa bilog na Judea asin Samaria. Pero padagos pa man giraray an gibuhon na pagpatotoo. Nagpa-Samaria si Felipe tanganing “ihulit [sa mga taga diyan] an Cristo” asin marahayon an nagin mga resulta kaiyan. (Gibo 8:1-8, 14, 15, 25) Ini pa an sinasabi sa sato kan pagkasaysay: “Idtong mga nagkasuruway-suway huli kan persekusyon na nangyari pagkatapos kan ginibo ki Esteban nakaabot sagkod sa Fenicia, Ciprus, asin Antioquia, pero sa mga Judio sana ninda ipinahayag an mensahe. Alagad, an nagkapirang taga Ciprus asin Cirene nagduman sa Antioquia saka nagpuon na maghulit sa mga tawong nagtataram nin Griego, na ipinapahayag an maugmang bareta manungod sa Kagurangnan na Jesus.” (Gibo 11:19, 20) Huli sa persekusyon kan panahon na iyan, nakalakop an mensahe kan Kahadian sa dakul na lugar.

¹⁵ Sa satong panahon, may nangyari man na arog kaiyan sa dating Unyon Sobyet. Lalo na kan dekada nin 1950, rinibong Saksi ni Jehova an idinistiyero sa Siberia. Huling nagkasuruway-suway sinda sa manlain-lain na lugar, an maugmang bareta padagos na luminakop sa mahiwas na kadagaan na iyan. Mayo nanggad nin kakayahan an dakulon na Saksing iyan na magkaigwa kan kuwartang kakaipuhanon sa pagbiyahe nin tibaad mga 10,000 kilometros tanganing ipahayag an maugmang bareta! Alagad, an gobyerno na mismo an nagpadara sa sainda sa manlain-lain na lugar sa bilog na nasyon. “An nangyari lugod,” sabi nin sarong brother, “an mga awtoridad na mismo an nagtabang sa rinibong sinserong tawo sa Siberia na maaraman an katotoohan.”

16, 17. Anong patunay an itinatao sa sato kan libro nin Mga Gibo na binebendisyunan ni Jehova an gibuhon na pagpatotoo?

¹⁶ Daing duda na binendisyunan ni Jehova an inot na mga Kristiyano. Si Pablo asin an iba pa an nagtanom saka an nagbaribi, “pero an Diyos an padagos na nagpapatalubo kaiyan.” (1 Cor. 3:5, 6) Mababasa ta sa libro nin Mga Gibo an patunay kan pagtalubong iyan na resulta kan pagbendisyon ni Jehova sa gibuhon na pagpatotoo. Halimbawa, “an tataramon nin Diyos nagpadagos sa paglakop, asin an bilang kan mga disipulo padagos na nagdadakul nin marikas sa Jerusalem.” (Gibo 6:7) Mantang naglalakop  an gibuhon na pagpatotoo, “nagkaigwa nin panahon nin katuninungan an kongregasyon sa bilog na Judea asin Galilea saka Samaria, asin padagos sindang napapakusog; asin mantang namumuhay sinda na may pagkatakot ki Jehova saka may pagranga kan banal na espiritu, padagos sindang nagdadakul.”—Gibo 9:31.

¹⁷ Sa Antioquia sa Siria, naaraman kan mga Judio asin kan mga tawong nagtataram nin Griego an katotoohan sa makusog an buot na mga saksi. “Siring man,” an sabi kan pagkasaysay, “yaon sa sainda an suporta ni Jehova, asin dakulang bilang an nagturubod saka nagin parasunod kan Kagurangnan.” (Gibo 11:21) Manungod sa urog pang pag-uswag sa siyudad na iyan, mababasa ta: “An tataramon ni Jehova padagos na naglalakop, asin nagdadakul an mga nagtutubod.” (Gibo 12:24) Asin huli sa lubos na pagpatotoo na ginibo ni Pablo asin kan iba pa sa mga tawong Hentil, “sa pambihirang paagi an tataramon ni Jehova padagos na naglalakop asin nagigin mapuwersa.”—Gibo 19:20.

18, 19. (a) Taano ta sigurado kitang yaon sa sato “an suporta ni Jehova”? (b) Magtao nin halimbawa na nagpapahiling na inaalalayan ni Jehova an saiyang mga lingkod.

¹⁸ Daing duda na yaon man sa sato ngunyan “an suporta ni Jehova.” Iyan an dahilan kun kaya dakulon an nagtuturubod asin sinisimbolisaran an pagdusay ninda paagi sa pagpabawtismo. Saro pa, paagi sana sa tabang asin bendisyon nin Diyos kun kaya nagigibo tang tagalan an grabeng pagkontra—kun minsan, grabeng persekusyon—asin mapanggana niyatong naisasagibo an satong ministeryo, arog kan ginibo ni Pablo asin kan iba pang inot na mga Kristiyano. (Gibo 14:19-21) Pirming yaon an Diyos na Jehova para tabangan kita. An “saiyang mga takyag na daing katapusan” pirmi nanggad na maalalay sa sato sa gabos na pagbalo. (Deu. 33:27) Tandaan ta man na alang-alang sa saiyang dakulang pangaran nungkang papabayaan ni Jehova an saiyang mga lingkod.—1 Sam. 12:22; Sal. 94:14.

¹⁹ Uni an sarong halimbawa kun paano inaalalayan ni Jehova an saiyang mga lingkod: Dahil sa padagos na pagpatotoo ni Brother Harald Abt, dinara siya kan mga Nazi sa kampo de-konsentrasyon sa Sachsenhausen kaidtong Giyera Mundiyal II. Kan Mayo 1942, dinumanan kan Gestapo sa harong an saiyang agom na si Elsa, kinua an saindang aking babayi, asin inarestar si Elsa. Pigpalipat-lipat nin kampo si Elsa. “May nanudan akong mahalagang marhay na leksiyon kan mga taon na nasa mga kampo de-konsentrasyon ako kan Germany,” an sabi ni Sister Abt. “Iyan iyo na, puwede kang tawan kan espiritu ni Jehova nin pambihirang kusog pag yaon ka sa grabeng pagbalo! Bago ako naarestar, may nabasa akong surat nin sarong sister na nagsasabing pag nasa irarom nin grabeng pagbalo papangyarihon kan espiritu ni Jehova na magin kang kalmado. Naisip ko na medyo sobra man an sinasabi niya. Pero kan ako na mismo an napaatubang sa mga pagbalo, napatunayan kong totoo su sinabi niya. Iyan talaga an nangyayari. Masakit iyan maimahinar kun dai mo pa iyan naeeksperyensiyahan. Pero talagang iyan an nangyari sako.”

20. Ano an ginibo ni Pablo mantang nakapreso sa harong, asin paano ini nakakapakusog sa nagkapira sa mga tugang ta?

²⁰ Nagtapos an libro nin Mga Gibo sa pagsabing si Pablo maigot na “ihinuhulit . . . an Kahadian nin Diyos.” (Gibo 28:31) Dahil nakapreso siya sa harong, dai niya magibong magpatotoo sa harong-harong sa Roma. Dawa arog kaiyan, padagos siyang nagpatotoo sa gabos na nagduduman sa saiya. Sa ngunyan, an nagkapira sa satong namumutan na mga tugang garo man nakapreso sa harong, tibaad dai na nakakabangon sa higdaan, o nakaistar na sa mga nursing home huli sa paggurang, pagkakahilang, o kabiyadian. Alagad, dai lamang nababawasan an saindang makusog na pagkamuot sa Diyos asin pagmawot na magpatotoo. Ipinapamibi ta sinda asin puwede tang hagadon sa satong Ama sa langit na lugod tabangan sindang makaulay an mga tawong nagmamawot na mamidbid siya asin maaraman an saiyang magagayon na katuyuhan.

21. Taano ta dapat kitang magpatotoo nin may pagkaapurado?

²¹ Kadaklan sa sato puwedeng makikabtang sa pagpapatotoo sa harong-harong asin sa iba pang pamamaagi nin paggibo nin disipulo. Kaya lugod na gibuhon kan kada saro sa sato an gabos na posibleng magigibo ta tanganing maisagibo niyato an satong papel bilang mga parabalangibog kan Kahadian, na nakikikabtang sa pagpapatotoo “sagkod sa pinakaharayong parte kan daga.” An gibuhon na ini dapat na isagibo nin may pagkaapurado, huling an “tanda” kan presensiya ni Cristo hiling-hiling ta na ngunyan. (Mat. 24:3-14) Dai na magsayang nin panahon. Sa ngunyan, dakul kitang dapat na gibuhon sa “gibuhon kan Kagurangnan.”—1 Cor. 15:58.

22. Ano an dapat na determinado niyatong gibuhon mantang hinahalat ta an aldaw ni Jehova?

²² Mantang hinahalat tang “umabot an dakula asin makangingirhat na aldaw ni Jehova,” lugod na magin determinado kita na padagos na magpatotoo nin may kusog nin buot asin may kaimbudan. (Joel 2:31) Dakul pa kitang mahahanap na mga tawong arog kan mga taga Berea na “interesadong marhay [na] nagdangog kan mensahe.” (Gibo 17:10, 11) Kaya lugod na padagos kitang magpatotoo sagkod sa matapos an gibuhon asin garo sinasabi na sa sato: “Magayon an ginibo mo, marahay asin maimbod na uripon!” (Mat. 25:23) Kun maigot niyatong ginigibo an satong kabtang sa gibuhon na paggibo nin disipulo ngunyan asin kun pirmi kitang magdadanay na maimbod ki Jehova, siguradong mag-uugma kita sagkod lamang na nagkaigwa kita kan dakulang pribilehiyo na ‘lubos na magpatotoo mapadapit sa Kahadian nin Diyos’!