Namumutan na Parahulit kan Kahadian:

Imahinaron na saro ka sa mga apostol na nakatindog sa Bukid nin mga Olibo. Nagpahiling sa saindo si Jesus. Kan pasakat na siya sa langit, nagsabi siya: “Maako kamo nin kapangyarihan pag umabot sa saindo an banal na espiritu, asin magigin mga saksi ko kamo sa Jerusalem, sa bilog na Judea saka Samaria, asin sagkod sa pinakaharayong parte kan daga.” (Gibo 1:8) Ano an magigin reaksiyon mo?

Tibaad isipon mo na garo imposible an ipinapagibo ni Jesus. Tibaad ihapot mo sa saimong sadiri, ‘Paano mi magigibong makapagpatotoo “sagkod sa pinakaharayong parte kan daga” kun diiton lang kaming mga disipulo?’ Tibaad magirumduman mo an patanid ni Jesus kan banggi bago siya gadanon: “An uripon bakong mas urog sa saiyang kagurangnan. Kun pinersegir ninda ako, pepersegiron man ninda kamo; kun inutob ninda an sakuyang tataramon, uutubon man ninda an saindo. Pero gigibuhon ninda an gabos na bagay na ini laban sa saindo huli sa ngaran ko, dahil dai ninda midbid Siya na nagsugo sa sako.” (Juan 15:20, 21) Mantang iniisip-isip an mga tataramon na iyan, tibaad ihapot mo sa saimong sadiri, ‘Paano ako lubos na makakapagpatotoo sa ibong nin mga pagkontra asin persekusyon?’

Sa ngunyan, iyan man an mga ihinahapot niyato. Bilang Mga Saksi ni Jehova, asignasyon man niyato na lubos na magpatotoo “sagkod sa pinakaharayong parte kan daga,” sa “mga tawo kan gabos na nasyon.” (Mat. 28:19, 20) Paano ta daw ini maisasagibo, lalo na ta may ihinulang mga pagkontra sa sato?

Mababasa ta sa Mga Gibo kan Mga Apostol an nakakapakusog na salaysay kun paano naisagibo kan mga apostol asin kan mga kapwa ninda Kristiyano kan inot na siglo C.E. an saindang asignasyon sa tabang ni Jehova. An publikasyon na ini na binabasa mo ngunyan dinisenyo tanganing tabangan kang siyasaton an rekord na iyan asin mamati kun gurano sinda kaugma sa marikas na paglakop kan gibuhon na paghuhulit. Mapapangalas ka sa dakul na pagkakapareho kan mga lingkod nin Diyos kan inot na siglo asin kan mga lingkod niya ngunyan. Mahihiling mo na an mga pagkakaparehong ini bako sanang manungod sa gibuhon kundi pati man sa pagkaorganisar sa sato para maisagibo an gibuhon na iyan. Mantang pinag-iisipan mo an mga pagkakaparehong ini, siguradong mapapakusog an saimong pagtitiwala na padagos na ginigiyahan kan Diyos na Jehova an daganon na kabtang kan saiyang organisasyon.

Naglalaom kami asin ipinapamibi mi na lugod na an pagsiyasat mo sa libro nin Mga Gibo makapakusog sa saimong kumpiyansa na tatabangan ka ni Jehova asin na gagamiton niya an saiyang banal na espiritu tanganing tawan ka kan puwersa na makatagal. Lugod na mapakusog an saimong buot na padagos na ‘lubos na magpatotoo mapadapit sa Kahadian nin Diyos’ asin tabangan an iba na maglakaw sa dalan pasiring sa kaligtasan.—Gibo 28:23; 1 Tim. 4:16.