Nakaatender ka na sa mga pagtiripon kan Mga Saksi ni Jehova? Kun dai pa, tibaad nag-aalangan kang mag-atender sa primerong pagkakataon. Tibaad iniisip mo: ‘Ano an ginigibo sa mga pagtiripon na iyan? Taano ta importante ’yan? Dapat daw akong mag-atender?’ Sa leksiyon na ini, maaaraman mo kun paano makakatabang an mga pagtiripon sa relasyon mo sa Diyos saka sa pang-aroaldaw mong buhay.

1. Taano ta nagtitiripon an Mga Saksi ni Jehova?

Sinabi kan sarong kagsurat kan Bibliya an pinakamahalagang dahilan kun taano ta nagtitiripon kaidto an mga lingkod nin Diyos: “Sa dakulang katiripunan, uumawon ko si Jehova.” (Salmo 26:12) Kaya nauugma man na marhay ngunyan an mga Saksi ni Jehova na magtiripon. Sain man sindang lugar, nagtitiripon sinda kada semana tanganing umawon an Diyos, magkanta, asin mamibi. Saka pirang beses sa sarong taon, nag-aatender sinda sa darakulang mga pagtiripon para magsamba.

2. Ano an manunudan mo sa mga pagtiripon mi?

Sa mga pagtiripon, pinag-aadalan mi an Tataramon nin Diyos, “na ipinapaliwanag iyan na marhay asin sinasabi nin malinaw an kahulugan kaiyan.” (Basahon an Nehemias 8:8.) Pag nag-atender ka, makakanuod ka manungod ki Jehova saka sa saiyang magagayon na kuwalidad. Mantang mas naaaraman mo kun gurano ka niya kapadangat, mas lalo ka man na mapaparani sa saiya. Maaaraman mo man an mga giyang itinatao niya para magkaigwa ka nin maugmang buhay.—Isaias 48:17, 18.

3. Paano ka puwedeng matabangan kan mga mabibisto mo sa samong mga pagtiripon?

Ipinagbuot sa sato ni Jehova na “isipon ta an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon.” (Hebreo 10:24, 25) Sa mga pagtiripon mi, mabibisto mo an mga tawo na talagang nagmamalasakit sa lambang saro. Saka arog mo, gusto nindang makanuod pa manungod sa Diyos. Madadangog mo an saindang nakakapakusog sa buot na mga komento o tataramon na base sa Bibliya. (Basahon an Roma 1:11, 12.) May makakaulay ka man na mga may agom saka daing agom na maugma man giraray dawa may mga problema. Nagkapira sana iyan sa mga dahilan kun taano ta gusto ni Jehova na regular kitang mag-atender sa mga pagtiripon!

 ARAMON PA

4. Mga pagtiripon kan Mga Saksi ni Jehova

Kan inot na siglo, regular na nagtitiripon an mga Kristiyano para sambahon si Jehova. (Roma 16:3-5) Basahon an Colosas 3:16, dangan pag-ulayan an hapot na ini:

• Paano sinasamba si Jehova kan mga Kristiyano kaidto?

1. Sa mga pagtiripon mi, may mga pahayag, presentasyon, saka mga video. Pinupunan saka tinatapos an pagtiripon paagi sa kanta saka pamibi

2. May mga parte kan programa na puwedeng magkomento an mga nagdadangog

3.   Welcome an gabos—mga pamilya, daing agom, gurang, saka mga aki

4. Libre an pag-atender; mayo nin pangungulekta

5. Kaipuhan nin paghihinguwa para makaatender sa mga pagtiripon

• Taano ta dapat kitang regular na mag-atender sa mga pagtiripon?

 SUMARYO

An pag-atender sa mga pagtiripon makakatabang sa saimo na mas makanuod pa manungod ki Jehova, na magin mas harani sa saiya, saka masamba siya kaiba kan iba pa niyang mga lingkod.

Rebyu

• Taano ta gusto ni Jehova na magtiripon kita para magsamba?

• Ano an manunudan mo sa mga pagtiripon kan Mga Saksi ni Jehova?

• Ano an iba pang naiisip mong pakinabang kan pag-atender sa mga pagtiripon?