1-3. (a) Taano ta sinisigurado kan sarong ina na malinig an saiyang aki? (b) Taano ta gusto ni Jehova na magin malinig an saiyang mga lingkod?

ISIPON an sarong mapagpadabang ina na inaasikaso an saiyang aki na malaog sa eskuwelahan. Sinisigurado niya na nakakarigos na ini saka pakarhay asin malinig an bado. Makakatabang iyan na dai magkahilang an aki saka mahihiling kan iba na dai siya pinapabayaan kan saiyang magurang.

² Gusto kan satong Ama na si Jehova na magin malinig asin dalisay kita. (Salmo 18:26) Aram niya na makikinabang kita pag malinig kita. Saka makakatao iyan nin onra sa saiya.—Ezequiel 36:22; basahon an 1 Pedro 2:12.

 ³ Ano an kaiba sa pagigin malinig asin taano ta sa ikakarahay niyato iyan? Mantang sinisimbag niyato an mga hapot na ini, puwedeng may mahiling kita na mga kaipuhan tang baguhon sa satong sadiri.

4, 5. (a) Taano ta kaipuhan niyatong magin malinig? (b) Ano an itinutukdo sa sato kan mga linalang manungod sa pagmansay ni Jehova sa kalinigan?

⁴ Nakakanuod kitang magin malinig sa halimbawa mismo ni Jehova. (Levitico 11:44, 45) Kaya sa panginot, kaipuhan tang magin malinig huling gusto niyatong magin ‘paraarog sa Diyos.’—Efeso 5:1.

⁵ Dakul an itinutukdo sa sato kan mga linalang manungod sa pagmansay ni Jehova sa kalinigan. Naggibo si Jehova nin natural na mga siklo sa kapalibutan kaya nagigin malinig an satong duros asin tubig. (Jeremias 10:12) Isipon an dakul na paagi kun paano linilinigan kan planetang Daga an sadiri kaini dawa pa atian ini kan mga tawo. Halimbawa, naggibo si Jehova nin saraditon na mga mikrobyo na puwede sanang mahiling gamit an mikroskopyo. Kaya kan mga mikrobyo na gibuhon na bakong peligroso an sarong nakakahilong ati o basura. Kahanga-hangang marhay an prosesong ini. Naggagamit pa ngani an mga siyentista nin mga mikrobyo para solusyunan an mga epekto kan polusyon.—Roma 1:20.

6, 7. Paano ipinapahiling kan Katugunan ni Moises na dapat na magin malinig an mga parasamba ni Jehova?

⁶ Mahihiling ta man kun gurano kahalaga an kalinigan base sa Katugunan na itinao ni Jehova sa mga Israelita paagi ki Moises. Halimbawa, dapat na magin malinig sinda sa pisikal para akuon ni Jehova an saindang pagsamba. Sa Aldaw nin Pagbayad sa Kasalan, kaipuhan na duwang beses magkarigos an halangkaw na saserdote. (Levitico 16:4,  23, 24) Asin bago magtao nin atang an ibang mga saserdote, dapat nguna nindang hanawan an kamot saka bitis ninda. (Exodo 30:17-21; 2 Cronica 4:6) May mga sitwasyon na kagadanan an padusa sa dai pagsunod sa mga pagbuot manungod sa kalinigan.—Levitico 15:31; Bilang 19:17-20.   

⁷ Kumusta man sa ngunyan? Dakul kitang manunudan sa Katugunan manungod sa mga pamantayan ni Jehova. (Malaquias 3:6) Malinaw na ipinapahiling kaiyan na an mga nagsasamba ki Jehova dapat na magin malinig. Dai nagbago an mga pamantayan ni Jehova. Inaasahan pa man giraray niya ngunyan na magigin malinig an saiyang mga parasamba.—Santiago 1:27.

8. Sa anong mga paagi kita dapat na magin malinig?

⁸ Para ki Jehova, bako sanang kalinigan sa hawak, bado, asin harong an kaiba sa pagigin malinig. Kaiba man diyan an satong bilog na pamumuhay—an satong pagsamba, paggawi, asin kaisipan. Iyo, para magin malinig kita sa paghiling ni Jehova, dapat na magin malinig kita sa gabos na aspekto kan satong buhay.

9, 10. Ano an dapat tang gibuhon tanganing magin dalisay an satong pagsamba?

⁹ Dalisay na pagsamba. Dai kita dapat maimbuwelto sa palsong pagsamba sa ano man na paagi. Kan an mga Israelita nagin bihag sa Babilonya, napalibutan sinda nin mga tawong naggigibo nin imoralidad sa saindang pagsamba sa mga paganong diyos. Ihinula ni Isaias na an mga Israelita mabaralik sa Israel asin isasagibo giraray an dalisay na pagsamba. Sinabihan sinda ni Jehova: “Maghali kamo diyan, dai kamo magdutdot nin ano man na maati! Maghali kamo sa saiya, magdanay kamong malinig.” An saindang pagsamba sa Diyos dai dapat masalakan nin mga katukduan,  paggawi, o kaugalian kan palsong relihiyon sa Babilonya.—Isaias 52:11, NW.

¹⁰ Linilikayan man ngunyan kan tunay na mga Kristiyano an palsong relihiyon. (Basahon an 1 Corinto 10:21.) Sa bilog na kinaban, dakul na popular na tradisyon, kaugalian, asin mga paniniwala an basado sa palsong mga katukduan nin relihiyon. Halimbawa, sa dakul na kultura, nagtutubod an mga tawo na may minaluwas sa hawak nin sarong tawo na padagos na nabubuhay pagkagadan, asin dakul na kaugalian an basado sa paniniwalang ini. (Parahulit 9:5, 6, 10) Dapat likayan kan mga Kristiyano an arog kaiyan na mga kaugalian. Posibleng gipiton kita kan satong mga kapamilya na umiba sainda sa mga kaugalian na iyan. Pero dai kita nagpapadara sa sainda dahil gusto tang magin malinig sa paghiling ni Jehova.—Gibo 5:29.

11. Ano an buot sabihon kan pagigin malinig sa satong paggawi?

¹¹ Malinig na paggawi. Tanganing magin malinig kita sa paghiling ni Jehova, dapat na likayan ta an ano man na klase nin seksuwal na imoralidad. (Basahon an Efeso 5:5.) Sa Bibliya, sinasabi sa sato ni Jehova na “rayuan [ta] an seksuwal na imoralidad.” Lininaw niya na an mga imoral na dai nagsusulsol “dai magmamana kan Kahadian nin Diyos.”—1 Corinto 6:9, 10, 18; hilingon an Dagdag na Impormasyon 22.

12, 13. Taano ta dapat na magin malinig an satong kaisipan?

¹² Malinig na kaisipan. Sa parati, ginigibo ta an mga iniisip ta. (Mateo 5:28; 15:18, 19) Kaya kun malinig an satong kaisipan magigin malinig man an satong paggawi. Siyempre bako kitang perpekto, kaya paminsan-minsan may mga salang bagay na minalaog sa satong isip. Pag nangyari iyan, dapat tang halion tulos iyan sa satong isip. Ta kun dai, puwedeng mag-abot an panahon na magin bako nang malinig an satong mga kaisipan. Posibleng  mawuton ta nang gibuhon an mga bagay na pigpaparaisip ta. Kaya dapat na malinig na mga bagay an ilaog niyato sa satong isip. (Basahon an Filipos 4:8.) Linilikayan ta an imoral o madahas na libangan. Pinipili ta man na marhay an satong mga binabasa, hinihiling, asin ipinapakipag-ulay.—Salmo 19:8, 9.

¹³ Kaya tanganing magdanay sa pagkamuot nin Diyos, dapat na magin dalisay kita sa satong pagsamba, paggawi, asin kaisipan. Pero, mahalaga man ki Jehova na magin malinig kita sa pisikal.

14. Taano ta importante an pisikal na kalinigan?

¹⁴ Kun hihinguwahon tang pirming magin malinig an satong hawak asin palibot, makikinabang kita pati an iba. Magigin marahay an satong pagmati, saka dai kita rarayuan kan iba. Pero may saro pang mas importanteng dahilan kaya gusto tang magin malinig sa pisikal. An pagigin malinig niyato nagtataong onra ki Jehova. Pag-isipan ini: Kun makahiling ka nin sarong aki na pirming musingon, posibleng maisip mo na pabaya an mga magurang niya. Kaagid kaiyan, kun pabaya kita sa satong sadiri asin bakong malinig, posibleng matatsaran si Jehova. Sinabi ni Pablo: “Dai nanggad kami naggigibo nin ano man na [puwedeng makaulang sa] iba, tanganing dai mahilingan nin sala an samuyang ministeryo; kundi sa gabos na bagay nagtatao kami nin marahay na halimbawa bilang mga ministro nin Diyos.”—2 Corinto 6:3, 4.

15, 16. Ano an puwede tang gibuhon para pirmi kitang magin malinig?

¹⁵ An satong hawak asin bado. An paglinig kan satong sadiri dapat na magin parte kan satong pang-aroaldaw na buhay. Halimbawa, regular kitang nagkakarigos, aroaldaw sagkod na posible. Naghahanaw kita nin kamot gamit  an sabon asin tubig, lalo na bago magluto o magkakan, asin siyempre pagkatapos magkasilyas o magkapot nin maati. Garo baga simpleng bagay sana an paghanaw nin kamot, pero kaipuhan iyan para dai maglakop an bakterya asin hilang. Puwede ngani ining makapagligtas nin buhay. Kun mayo kita nin kasilyasan o C.R., puwede pa man giraray kitang makagibo nin ibang paagi. Mayong kasilyasan an mga Israelita kaidto, kaya itinatalbong ninda sa daga an saindang udo, na harayo sa saindang istaran asin sa pinagkukuanan nin tubig.—Deuteronomio 23:12, 13.

¹⁶ Dai man kaipuhan na magarbo, mamahalon, o an pinakauso an satong mga bado. Pero dapat na maayos iyan asin malinig. (Basahon an 1 Timoteo 2:9, 10.) Gusto niyato pirmi na an satong itsura makatao nin onra ki Jehova.—Tito 2:10.

17. Taano ta hinihinguwa tang pirming magin malinig an satong harong asin palibot?

 ¹⁷ An satong harong asin palibot. Sain man kita nakaistar, hinihinguwa tang pirming magin malinig an satong harong. Sinisigurado ta man na malinig an satong awto, motorsiklo, bisikleta, o ano man na lunadan na igwa kita, lalo na kun ginagamit ta iyan pag nag-aatender sa mga pagtiripon o pag naghuhulit. Dapat lang iyan ta sarong malinig na paraisong daga an ipinapakipag-ulay ta sa mga tawo pag naghuhulit kita. (Lucas 23:43; Kapahayagan 11:18) Pag malinig an satong harong asin palibot, ipinapahiling ta na nag-aandam na kita ngunyan sa pag-istar sa malinig na bagong kinaban.

18. Taano ta gusto tang magin malinig an satong lugar nin pagsamba?

¹⁸ An satong lugar nin pagsamba. Ipinapahiling niyato na importante sa sato an kalinigan pag pirming malinig an satong lugar nin pagtiripon, sa Kingdom Hall man iyan o sa mga lugar nin asembleya. Pag may bagong nag-atender sa Kingdom Hall, sa parati an naririparo ninda iyo an kalinigan kaiyan. Nagtatao iyan nin onra ki Jehova. Bilang mga miyembro nin kongregasyon, gabos kita igwa nin pribilehiyong magtabang sa paglinig asin pagmentenar kan satong Kingdom Hall.—2 Cronica 34:10.

19. Ano an dapat niyatong likayan?

¹⁹ Dawa ngani dai sinaro-saro sa Bibliya an maraot na mga bisyo na dapat tang likayan, may mga prinsipyo diyan na makakatabang sa sato na masabutan kun ano an namamatian ni Jehova sa mga bagay na iyan. Habo niya kitang magsigarilyo., magburat, o magdroga Kun amigo kita nin Diyos, lilikayan ta iyan. Taano? Huling iginagalang tang marhay an regalo niyang buhay. Dahil sa mga bisyong  iyan, puwede kitang magadan nin amay, magkahilang, asin puwedeng makaapektar iyan sa mga tawo sa palibot niyato. Dakul an naghinguwa na halion an maraot na mga bisyong ini huling iniisip ninda an salud ninda. Pero bilang mga amigo ni Jehova, igwa kita kan pinakamarahay na dahilan na halion iyan—an satong pagkamuot sa Diyos. Sarong hoben na babayi an nagsabi: “Sa tabang ni Jehova, nalinig ko an buhay ko saka nahali ko an mga bisyo ko. . . . Siguro kun ako lang tibaad dai ko idto nahali.” Aramon ta an limang prinsipyo sa Bibliya na makakatabang sa saro na mahali an nakakaraot na mga bisyo.

20, 21. Anong klaseng mga bisyo an gusto ni Jehova na mahali ta?

²⁰ “Huling ipinanuga sa sato an mga bagay na ini, mga namumutan, linigon niyato an satuyang mga sadiri sa gabos na bagay na nakakaramog sa laman asin espiritu, na sa siring urog kitang nagigin banal mantang ipinapahiling ta an pagkatakot sa Diyos.” (2 Corinto 7:1) Gusto ni Jehova na mahali ta an maraot na mga bisyo na puwedeng makaraot sa satong isip o hawak.

²¹ Mababasa sa 2 Corinto 6:17, 18 an sarong magabat na dahilan para “linigon niyato an satuyang mga sadiri sa gabos na bagay na nakakaramog.” Sinasabi diyan ni Jehova sa sato: “Ipundo nindo an pagdutdot kan maating bagay.” Tapos nanuga siya: “Dangan aakuon ko kamo. Asin ako magigin sarong ama sa saindo, asin kamo magigin sakuyang mga aking lalaki saka aking babayi.” Iyo, kun lilikayan niyato an ano man na makakapaati sa sato sa paghiling ni Jehova, mamumutan niya kita arog nin sarong ama.

22-25. Anong mga prinsipyo sa Kasuratan an makakatabang sa sato na halion an maating mga bisyo?

²² “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong  isip.” (Mateo 22:37) Ini an pinakaimportanteng tugon sa gabos. (Mateo 22:38) Dapat sana na itao ta ki Jehova an satong bilog na pusong pagkamuot. Dai ta siya mamumutan nin bilog na puso kun naggigibo kita nin mga bagay na puwedeng makapahalipot kan satong buhay o makaraot kan satong isip. Imbes, gigibuhon ta an satong pinakamakakaya para maipahiling na iginagalang ta an buhay na itinao niya sa sato.

²³ “[Si Jehova] an nagtatao sa gabos na tawo nin buhay, nin hinangos, asin nin gabos na bagay.” (Gibo 17:24, 25) Kun tawan ka nin sarong espesyal na regalo kan saro mong amigo, iaapon mo daw iyan o rarauton? An buhay saro talagang kahanga-hangang regalo hali ki Jehova. Pinapahalagahan tang marhay an regalong ini. Kaya gusto niyatong gamiton an satong buhay sa paaging magtatao nin kamurawayan ki Jehova.—Salmo 36:9.

²⁴ “Kamutan mo an saimong kapwa nin siring sa saimong sadiri.” (Mateo 22:39) Bako sana kita an mapaparaot kun may maati kitang mga bisyo. Puwede man iyan makaraot sa mga nakapalibot sa sato, na sa parati mga mahal ta sa buhay. Halimbawa, an saro na may kaibanan sa harong na parasigarilyo puwedeng magkaigwa nin malalang hilang huli sa nasisinghot niyang aso. Pero kun ipupundo niyato an maraot na mga bisyo, maipapahiling niyato sa mga nakapalibot sa sato na namumutan ta sinda.—1 Juan 4:20, 21.

²⁵ “Padagos mo sindang pagirumdumon na magpasakop saka magin masinunod sa mga gobyerno asin mga awtoridad.” (Tito 3:1) Sa dakul na nasyon ipinagbabawal kan ley an pagkaigwa o paggamit nin nagkapirang klase nin droga. Dahil ipinagbuot sa sato ni Jehova na igalang an gobyerno, sinusunod ta an mga ley na iyan.—Roma 13:1.

26. (a) Ano an dapat tang gibuhon para akuon ni Jehova an satong pagsamba? (b) Taano ta an pagigin malinig sa paghiling nin Diyos an pinakamarahay na klase nin pamumuhay?

 ²⁶ Kun gusto tang magin amigo ni Jehova, tibaad may mga kaipuhan kitang baguhon. Kun igwa, baguhon na iyan tulos. Bako pirming pasil na punduhon an maating bisyo, pero makakaya ta iyan! Nangangako si Jehova na tatabangan niya kita. Sinabi niya: “Ako, si Jehova, an saimong Diyos, an Saro na nagtutukdo sa saimo tanganing ika makinabang, an Saro na naggigiya sa saimo sa dalan na dapat mong lakawan.” (Isaias 48:17, NW) Kun hinihinguwa ta na pirming magin malinig asin dalisay, makakasigurado kita na natatawan ta nin onra an satong Diyos.