1-3. (a) Ano an pagmati kan dakul manungod sa saindang trabaho? (b) Anong mga hapot an pag-uulayan niyato sa kapitulong ini?

AN MGA tawo sa bilog na kinaban nagtatrabahong marhay para masuportaran an saindang sadiri asin an saindang pamilya. Dakul an dai gusto an saindang trabaho, asin an iba ngani dai talaga nauugma na maglaog sa trabaho ninda aroaldaw. Kun arog man kaiyan an namamatian mo, ano an puwede mong gibuhon para magin maugma ka sa saimong trabaho? Ano an magigibo mo para magustuhan mo an saimong trabaho?

² Sinasabi sa sato ni Jehova: “An lambang tawo magkakan asin mag-inom saka mag-ugma sa gabos niyang pinagpagalan. Regalo iyan nin Diyos.” (Parahulit 3:13, NW) Linalang kita ni Jehova na may pangangaipo asin pagmawot na magtrabaho. Gusto niyang magin maugma kita sa satong mga ginigibo.—Basahon an Parahulit 2:24; 5:18.

³ Kaya ano an makakatabang sa sato na magin maugma sa trabaho? Anong mga trabaho an dapat likayan kan mga Kristiyano? Paano niyato mababalanse an satong trabaho asin an satong pagsamba ki Jehova? Asin ano an pinakaimportanteng trabaho na magigibo ta?

4, 5. Ano an paghiling ni Jehova sa trabaho?

⁴ Si Jehova mismo gustong-gusto na magtrabaho. Sinasabi sa Genesis 1:1: “Sa kapinunan linalang nin Diyos  an kalangitan asin an daga.” (NW) Pagkatapos na gibuhon nin Diyos an daga asin an gabos na yaon diyan, sinabi niya na “marahayon” an gabos na linalang niya. (Genesis 1:31, NW) Kontento an satong Kaglalang sa ginibo niya.—1 Timoteo 1:11.

⁵ Dai nagpupundo si Jehova sa pagtrabaho. Sinabi ni Jesus: “An sakuyang Ama padagos sa paggibo sagkod ngunyan.” (Juan 5:17) Dawa ngani dai niyato aram an manungod sa gabos na makangangalas na mga bagay na ginigibo ni Jehova, aram ta an nagkapira sa mga iyan. Nagpipili siya nin mga mamamahala sa saiyang Kahadian kaiba kan saiyang Aki, si Jesu-Cristo. (2 Corinto 5:17) Padagos man na ginigiyahan asin inaataman ni Jehova an mga tawo. Bilang resulta kan pambilog na kinaban na paghuhulit, milyon-milyon an nakakamidbid ki Jehova asin nagkakaigwa nin paglaom na mabuhay nin daing katapusan sa sarong paraisong daga.—Juan 6:44; Roma 6:23.

6, 7. Anong klaseng trabahador si Jesus?

⁶ Arog kan saiyang Ama, gustong-gusto man ni Jesus na magtrabaho. Bago siya nagdigdi sa daga, si Jesus sarong “ekspertong trabahador” na kaiba nin Diyos sa paglalang kan gabos na bagay sa langit asin sa daga. (Talinhaga 8:22-31, NW; Colosas 1:15-17) Mahigos man na nagtrabaho si Jesus kan yaon siya digdi sa daga. Hoben pa siya, mahusay na siyang karpintero, asin posibleng marhay na naggigibo siya kaidto nin mga muwebles asin nagtutugdok nin mga harong. Matibay magtrabaho si Jesus kaya namidbid siya bilang “karpintero.”—Marcos 6:3.

⁷ Pero, an pinakaimportanteng trabaho ni Jesus sa daga iyo an paghulit kan maugmang bareta asin an pagtukdo sa mga tawo manungod ki Jehova. Igwa siya nin tulo may kabangang taon para tapuson an saiyang ministeryo, asin mahigos siyang nagtrabaho puon amay na aga sagkod  banggi. (Lucas 21:37, 38; Juan 3:2) Naglakaw si Jesus nin ginatos na kilometro sa maalpog na mga dalan, na ihinuhulit an maugmang bareta sa pinakadakul na tawo na mapupuwede.—Lucas 8:1.

8, 9. Taano ta maugma si Jesus sa saiyang trabaho?

⁸ Para ki Jesus, an paggibo kan kabutan nin Diyos garo pagkakan. Nagtatao iyan sa saiya nin resistensiya asin kusog. May mga aldaw na dai na siya nakakakakan ta mahiguson talaga siya. (Juan 4:31-38) Ginamit niya an lambang oportunidad para tukduan an iba manungod sa saiyang Ama. Kaya masasabi niya ki Jehova: “Pinamuraway taka digdi sa daga asin tinapos ko an gibuhon na itinao mo sa sako.”—Juan 17:4.

⁹ Iyo, si Jehova asin si Jesus parehong mahigos, maugma, saka kontento sa saindang trabaho. Gusto niyato na ‘magin paraarog sa Diyos,’ asin gusto niyato na ‘maingat na sundan an mga lakad ni Jesus.’ (Efeso 5:1; 1 Pedro 2:21) Kaya nagmamaigot kitang marhay sa satong trabaho asin ginigibo ta an satong pinakamakakaya.

10, 11. Ano an makakatabang sa sato na magin positibo sa satong trabaho?

¹⁰ Bilang mga lingkod ni Jehova, nagtatrabaho kitang marhay para masuportaran an satong sadiri asin an satong pamilya. Gusto niyatong magin maugma sa satong trabaho, pero puwedeng magin dipisil iyan. Kaya ano an puwede tang gibuhon kun bako kitang maugma sa satong trabaho?

¹¹ Magin positibo. Puwedeng dai ta mababago kun sain kita nagtatrabaho o kun gurano iyan kagabat, pero puwede tang mabago an satong sabuot. Makakatabang kun aram ta kun ano an mga inaasahan sa sato ni Jehova. Halimbawa:  Inaasahan ni Jehova sa sarong payo nin pamilya na itatao niya an mga pangangaipo kan saiyang pamilya sa abot kan saiyang makakaya. Sa katunayan, sinasabi kan Bibliya na an saro na dai nagsusustento sa saiyang pamilya “mas maraot pa . . . kisa sa tawong mayong pagtubod.” (1 Timoteo 5:8) Kun ika sarong payo nin pamilya, siguradong mahigos kang nagtatrabaho para masustentuhan an saimong pamilya. Gusto mo man o dai an saimong trabaho, aram mong pag nasusustentuhan mo an saimong pamilya, napapaugma mo man si Jehova.

12. Paano kita nakikinabang kun mahigos kita asin onesto sa trabaho?

¹² Magin mahigos asin onesto. Makakatabang iyan na magin maugma ka sa saimong trabaho. (Talinhaga 12:24; 22:29) Kun mahigos ka saka onesto, pagtitiwalaan ka man kan amo mo. Gusto kan mga amo an mga empleyadong onesto, ta dai sinda naghahabon nin kuwarta, gamit, o oras. (Efeso 4:28) An mas importante, nahihiling ni Jehova kun mahigos ka asin onesto. Magkakaigwa ka “nin malinig na konsiyensiya” ta aram mong napapaugma mo an Diyos na namumutan mo.—Hebreo 13:18; Colosas 3:22-24.

13. Ano pa an puwedeng magin resulta kun onesto kita sa trabaho?

¹³ Sa trabaho, isipon na an ugali mo puwedeng magtao nin kaumawan ki Jehova. Saro pa ining dahilan para magin maugma kita sa satong trabaho. (Tito 2:9, 10) Posible nganing magkainteres an saro sa mga katrabaho mo na mag-adal nin Bibliya dahil sa marahay mong halimbawa.—Basahon an Talinhaga 27:11; 1 Pedro 2:12.

14-16. Ano an dapat tang pag-isipan kun nagpipili nin trabaho?

¹⁴ Dai nagtatao an Bibliya nin lista nin mga trabaho na puwede o dai puwede sa sarong Kristiyano. Pero may mga prinsipyo iyan na makakatabang sato para magin madunong  kita sa pagpili nin trabaho. (Talinhaga 2:6) Gamit an mga prinsipyo sa Bibliya, puwede niyatong ihapot sa satong sadiri an minasunod na mga hapot.

¹⁵ Hinahagad daw sa trabahong ini na gumibo ako nin sarong bagay na sala sa paghiling ni Jehova? Naaraman na niyato an pira sa mga bagay na ikinakaanggot ni Jehova, arog nin paghabon asin pagputik. (Exodo 20:4; Gibo 15:29; Efeso 4:28; Kapahayagan 21:8) Kaya dai kita nag-aako nin trabaho na kontra sa mga pamantayan ni Jehova.—Basahon an 1 Juan 5:3.

 ¹⁶ An trabaho daw na ini nagsusuportar o naggigibo nin mga bagay na ikinakaanggot ni Jehova? Halimbawa, paano kun alukan kang magtrabaho sa tindahan nin sigarilyo? Mayo man maraot sa pagtinda. Pero aram mo an namamati ni Jehova manungod sa pagsigarilyo. Kaya dawa ngani dai ka nagsisigarilyo, bako daw na garo mo man sana kaiyan ineenganyar an iba na magsigarilyo asin atian an saindang hawak?—2 Corinto 7:1.

17. Ano an makakatabang sa sato na makagibo nin mga desisyon na makakapaugma sa Diyos?

¹⁷ Paagi sa pagsunod sa mga prinsipyo nin Diyos, magigin arog kita sa “mga tawong paagi sa paggamit kan saindang [kakayahan na magsabot] sinanay iyan na mamidbid an kalainan kan tama asin kan sala.” (Hebreo 5:14) Haputon an saimong sadiri: ‘Kun aakuon ko an trabahong ini, puwede daw iyan na makapasingkog sa iba? Kaipuhan daw na bayaan ko an sakong agom saka mga aki asin magduman sa ibang nasyon dahil sa trabahong ini? Ano an puwedeng magin epekto kaini sa sainda?’

18. Taano ta puwedeng magin dipisil na padagos na magpokus sa satong pagsamba?

¹⁸ Sa “delikado asin masakit na mga panahon” na ini, puwedeng magin dipisil sa sato an pag-inot sa satong pagsamba ki Jehova. (2 Timoteo 3:1) Puwedeng magin dipisil talaga an paghanap nin trabaho asin an magdanay diyan. Kaipuhan niyatong sustentuhan an satong pamilya, pero aram tang an satong pagsamba an dapat na magin panginot sa sato. Dai ta dapat tugutan na magin sobra kaimportante sa buhay ta an materyal na mga bagay. (1 Timoteo 6:9, 10) Kaya paano niyato masisiyerto “kun ano an mas importanteng mga bagay” mantang sinusustentuhan ta an satong pamilya?—Filipos 1:10.

19. Paano makakatabang an pagtitiwala ki Jehova para magin balanse kita sa satong trabaho?

 ¹⁹ Lubos na magtiwala ki Jehova. (Basahon an Talinhaga 3:5, 6.) Aram niyato na aram nin Diyos kun ano talaga an kaipuhan ta asin na nagmamalasakit siyang marhay sa sato. (Salmo 37:25; 1 Pedro 5:7) Sinasabi sa sato kan saiyang Tataramon: “An saindo lugod na pamumuhay dai mahilingan nin pagkamuot sa kuwarta, mantang kontento na kamo sa kun ano an igwa kamo. Huli ta [an Diyos] nagsabi: ‘Dai taka nuarin man tatalikudan, asin dai taka nuarin man papabayaan.’” (Hebreo 13:5) Habo ni Jehova na pirmi tang pagparahaditan an pagsustento sa satong pamilya. Pauruutrong ipinapahiling ni Jehova na kaya niyang itao an mga pangangaipo kan saiyang mga lingkod. (Mateo 6:25-32) Ano man an sitwasyon ta sa trabaho, regular kitang nag-aadal kan Tataramon nin Diyos, naghuhulit kan maugmang bareta, asin nag-aatender sa Kristiyanong mga pagtiripon.—Mateo 24:14; Hebreo 10:24, 25.

20. Paano ta mapapagdanay na simple an satong buhay?

²⁰ Pagdanayon na nakapokus an saimong mata. (Basahon an Mateo 6:22, 23.) Nangangahulugan ini na kaipuhan mong padagos na hinguwahon na magin simple an saimong buhay para makapagpokus sa paglilingkod ki Jehova. Aram niyato na kamangmangan kun tutugutan tang magin mas mahalaga sa sato an kuwarta, an maginhawang istilo nin pamumuhay, o an pinakabagong mga gadyet kisa sa satong relasyon sa Diyos. Kaya ano an makakatabang sa sato na inuton an dapat inuton? Sagkod sa mapupuwede, dai mangutang. Kun may utang ka, gumibo nin praktikal na mga paagi para mabawasan iyan o mabayadan na iyan nin bilog. Kun dai kita mag-iingat, puwedeng maubos sa materyal na mga bagay an satong panahon asin kusog, asin tibaad dai na kita magkaigwa nin panahon sa pagpamibi, pag-adal, o paghuhulit. Imbes na tugutan an  materyal na mga bagay na magpakomplikado kan satong buhay, gusto tang makontento sa panginot na mga pangangaipo arog nin “kakanon asin maisusulot.” (1 Timoteo 6:8) Asin ano man an sitwasyon ta, marahay na pag-isipan ta sa pana-panahon kun paano kita mas lubos na makakapaglingkod ki Jehova.

21. Taano ta kaipuhan tang pilion kun ano an iinuton ta sa satong buhay?

²¹ Magkaigwa nin tamang mga priyoridad. Dapat na magin madunong kita sa paggamit kan satong panahon, kusog, asin materyal na mga bagay. Kun dai kita mag-iingat, tibaad maubos an satong panahon sa bakong gayong importanteng  mga bagay, arog kan edukasyon o kuwarta. Sinabi ni Jesus: “Padagos na hanapon nguna an Kahadian.” (Mateo 6:33) An satong mga desisyon, kinahihiligan, ginigibo sa aroaldaw, asin an mga gusto tang maabot sa buhay nagpapahiling kun ano an panginot sa satong puso.

22, 23. (a) Ano an pinakaimportanteng trabaho ta bilang mga Kristiyano? (b) Ano an makakatabang sa sato na magin maugma sa satong trabaho?

²² An pinakaimportanteng trabaho niyato iyo an paglilingkod ki Jehova asin an paghuhulit kan maugmang bareta sa iba. (Mateo 24:14; 28:19, 20) Arog ni Jesus, gusto tang gibuhon an satong pinakamakakaya sa trabahong ini. An iba nagbalyo sa ibang lugar para maglingkod kun sain mas dakula an pangangaipo para sa mga parahayag. An iba man nag-aadal nin ibang lengguwahe para makapaghulit sa mga tawong iba an lengguwahe. Haputon an mga nakagibo na kaini. Iiistorya ninda saimo kun paano nagin mas maugma asin mas makahulugan an buhay ninda kan gibuhon ninda iyan.—Basahon an Talinhaga 10:22.

²³ Ngunyan, dakul sa sato an kaipuhan magtrabaho nin dakul na oras o magkua pa ngani nin dagdag na trabaho para lang masustentuhan an panginot na mga pangangaipo kan satong pamilya. Aram iyan ni Jehova, asin pinapahalagahan niya an gabos na ginigibo ta para atamanon an satong pamilya. Kaya lugod na padagos tang arugon si Jehova asin si Jesus sa pagigin mahigos, ano man an trabaho niyato. Asin lugod na dai ta paglingawan na an pinakaimportante niyatong trabaho iyo an paglilingkod ki Jehova asin an paghuhulit kan maugmang bareta kan Kahadian nin Diyos. Iyan an magtatao sa sato nin tunay na kaugmahan.