Sa mga namumuot sa Diyos na Jehova asin sa saiyang Tataramon, an Bibliya:

“Maaaraman nindo an katotoohan, asin an katotoohan mapatalingkas sa saindo,” an sabi ni Jesus. (Juan 8:32) Isipon an namatian mo kan inot mong maaraman an katotoohan sa Bibliya! Nakakaugmang maaraman na sa kinaban na ini na pano nin mga kaputikan, puwede tang manudan an katotoohan.—2 Timoteo 3:1.

Gusto kan Diyos na Jehova na maaraman ta an katotoohan. Saka huling namumutan niyato an mga tawo, gusto tang sabihon iyan sa sainda. Pero igwa pa kitang dapat gibuhon para mapaglingkudan an Diyos. Dapat tang gibuhon an satong pinakamakakaya na mamuhay bilang mga Kristiyano huling dakula an paggalang ta sa mga prinsipyo ni Jehova. Ipinaliwanag ni Jesus an sarong mahalagang paagi na maipapahiling ta na namumutan ta an Diyos. Sinabi niya: “Kun inuutob nindo an sakong mga tugon, magdadanay kamo sa sakuyang pagkamuot, kun paanong ako, inuutob ko an mga tugon kan Ama asin nagdadanay ako sa saiyang pagkamuot.”—Juan 15:10.

Talagang namumutan ni Jesus an saiyang Ama, asin ginigibo niya an gabos na ipinapagibo sa saiya kan saiyang Ama. Kun aarugon ta si Jesus sa satuyang pamumuhay, mamumutan kita ni Jehova asin magigin tunay na maugma kita. Arog kan sinabi ni Jesus, “kun aram nindo an mga bagay na ini, maugma kamo kun ginigibo nindo iyan.”—Juan 13:17.

Lugod na makatabang an librong ini para maisabuhay mo an katotoohan sa Bibliya asin magin amigo ka nin Diyos. Ipinapamibi mi na lugod lalo mo pang mamutan an Diyos asin magdanay ka “sa pagkamuot nin Diyos . . . na minaresulta sa buhay na daing katapusan.”—Judas 21.