1, 2. Taano ta namumutan mo an Diyos na Jehova?

NAMUMUTAN mo daw an Diyos? Posibleng namumutan mo siyang marhay kaya idinusay mo na an sadiri mo sa saiya. Tibaad ibinibilang mo siyang pinakadayupot mong Amigo. Pero bago mo pa man namutan si Jehova, namutan ka na niya. Mababasa ta sa Bibliya: “Kita namumuot, huli ta inot niya kitang namutan.”—1 Juan 4:19.

² Isipon an gabos na ginibo ni Jehova dahil sa pagkamuot niya sa sato. Itinao niya an daga para magin magayon na istaran ta asin an gabos na iba pang kaipuhan niyato para magin maugma an buhay ta. (Mateo 5:43-48; Kapahayagan 4:11) Gusto niyang magkaigwa kita nin marahay na relasyon sa saiya, asin naggibo siya nin paagi para makanuod kita manungod sa saiya. Pag binabasa ta an Bibliya, dinadangog ta si Jehova. Asin pag namimibi kita, dinadangog niya kita. (Salmo 65:2) Ginigiyahan saka pinapakusog niya kita paagi kan saiyang mapuwersang banal na espiritu. (Lucas 11:13) Isinugo pa ngani niya digdi sa daga an saiyang namumutan na Aki tanganing makabutas kita sa kasalan asin kagadanan.—Basahon an Juan 3:16; Roma 5:8.

3. Ano an dapat tang gibuhon tanganing magpadagos an marahay na relasyon ta ki Jehova?

 ³ Isipon nin madali an saro sa mga amigo mo na yaon pirmi para saimo, sa maugma man o sa masakit na mga panahon. Kaipuhan nin paghihinguwa para magin arog kaiyan kakusog an saindong pagigin mag-amigo. Arog man kaiyan sa pakikiamigo ta ki Jehova, an puwede tang magin pinakaharaning Amigo. An pakikiamigo ta sa saiya puwedeng magpadagos sagkod pa man. Kaya sinasabi sa sato kan Bibliya: “Magdanay kamo sa pagkamuot nin Diyos.” (Judas 21) Paano? Sinasabi kan Bibliya: “Ini an kahulugan kan pagkamuot sa Diyos, an utubon niyato an saiyang mga tugon; alagad ta an saiyang mga tugon bakong magabat.”—1 Juan 5:3.

4, 5. Paano nagpuon na mamutan mo si Jehova?

⁴ Nagigirumduman mo pa daw kun paano nagpuon na mamutan mo si Jehova? Isipon kun ano an namatian mo kan inot mong maaraman na gusto ni Jehova na mabuhay ka nin daing sagkod sa saiyang bagong kinaban.

⁵ Naaraman mo an gabos na ginibo niya para magin posible iyan, asin naintindihan mo kun gurano kahalaga kan regalong itinao sa sato ni Jehova kan isugo niya sa daga an saiya mismong Aki. (Mateo 20:28; Juan 8:29; Roma 5:12, 18) Kan maaraman mo kun gurano kadakula kan pagkamuot saimo ni Jehova, napahiro kaiyan an puso mo, kaya namutan mo man siya.—Basahon an 1 Juan 4:9, 10.

6. Paano mo maipapahiling na namumutan mo an sarong tawo? Huli sa pagkamuot mo sa Diyos, napahiro kang gibuhon an ano?   

⁶ Pero an pagkamuot na iyan na namatian niyato para sa Diyos kapinunan pa sana. Halimbawa, pag namumutan  ta an sarong tawo, dai ta sana sinasabi sa saiya na “Namumutan taka.” Papahiruon kita kan pagkamuot na gumibo nin mga bagay na makakapaugma sa saiya. Sa kaparehong paagi, an pagkamuot mo ki Jehova an nagpahiro saimo na mamuhay sa paaging nakakapaugma sa Saiya. Asin huling lalo mo siyang namutan, posibleng idinusay mo na an sadiri mo sa saiya saka nagpabawtismo. Sa paggibo kaiyan, nangako kang paglilingkudan mo si Jehova habangbuhay. (Basahon an Roma 14:7, 8.) Paano mo mauutob an pangakong iyan?

7. Kun namumutan ta si Jehova, ano an gigibuhon ta? Ano an nagkapira sa mga pagbuot niya?

⁷ Namumutan ta si Jehova, kaya ‘inuutob ta an saiyang mga tugon.’ Paano ta iyan ginigibo? Sinusunod ta siya. Nanudan niyato sa Bibliya kun ano an gusto ni Jehova na magin pamumuhay ta. Halimbawa, sinasabi niya sa sato na sala an pagburat, paghabon o pagputik, pakikipag-sex sa bako tang agom, o pagsamba sa kiisay man o sa ano man apuwera sa saiya.—1 Corinto 5:11; 6:18; 10:14; Efeso 4:28; Colosas 3:9.

8, 9. Paano ta maaaraman kun ano an gusto ni Jehova na gibuhon ta sa mga sitwasyon na daing espesipikong pagbuot an Bibliya? Magtao nin halimbawa.

⁸ Pero tanganing mapaugma ta si Jehova, bako sanang basta pagsunod sa mga ipinagbubuot niya an kaipuhan. Dai niya kita tinawan nin halabang lista nin mga dapat niyatong gibuhon sa lambang sitwasyon. Kaya may mga pagkakataon na daing espesipikong pagbuot an Bibliya kun ano an dapat tang gibuhon. Paano kita ngunyan makakagibo nin marahay na mga desisyon? (Efeso 5:17) Sa Bibliya, may mga prinsipyo o panginot na mga katotoohan na nagtutukdo sa sato kun ano an paghiling ni Jehova  sa mga bagay-bagay. Mantang binabasa ta an Bibliya, mas nabibisto ta si Jehova bilang Persona. Naaaraman ta kun paano siya mag-isip, pati na an mga bagay na gusto saka habo niya.—Basahon an Salmo 97:10; Talinhaga 6:16-19; hilingon an Dagdag na Impormasyon 1.

⁹ Halimbawa, paano kita nagpipili nin mga hihilingon sa TV o sa Internet? Mayo nin eksaktong susundon na itinatao si Jehova sa kun ano an dapat tang gibuhon. Pero an mga prinsipyong itinatao niya matabang sa sato na makagibo nin marahay na mga desisyon. Dakul sa mga libangan ngunyan an nagtatampok nin kadahasan asin sex. Sa Bibliya, sinasabi sa sato ni Jehova na ‘ikinakaungis niya an siisay man na namumuot sa kadahasan’ asin na “huhukuman [niya] an mga tawong imoral.” (Salmo 11:5, NW; Hebreo 13:4) Paano makakatabang an mga prinsipyong ini para makagibo kita nin marahay na mga desisyon? Pag aram ta nang ikinakaanggot ni Jehova an sarong bagay o imoral iyan sa paghiling niya, dapat tang likayan iyan.

10, 11. Taano ta sinusunod ta si Jehova?

¹⁰ Taano ta sinusunod ta si Jehova? Bako lang para makalikay sa padusa o sa mga problemang resulta nin salang mga desisyon. (Galacia 6:7) Sinusunod ta si Jehova dahil namumutan ta siya. Arog nin mga aki na gustong mapaugma an saindang ama, gusto ta man na mapaugma an satuyang Ama sa langit. Marahayon nanggad sa pagmati pag aram tang nauugma sa sato si Jehova!—Salmo 5:12; Talinhaga 12:2; hilingon an Dagdag na Impormasyon 2.

¹¹ Nagsusunod kita ki Jehova bako sana pag pasil iyan sa sato o pag wara na kitang ibang magigibo. Saka dai ta man pinipili kun arin sana sa mga pagbuot saka  pamantayan niya an susunudon ta. (Deuteronomio 12:32) Imbes, lubos an pagsunod ta sa saiya, arog kan salmista na nagsabi: “An mga tugon mo sakuyang nawiwilihan, iyo, namumutan ko an mga iyan.” (Salmo 119:47, NW; Roma 6:17) Gusto tang arugon si Noe, na ginibo an gabos na ipinagbuot sa saiya ni Jehova ta namumutan niya Siya. Sinasabi kan Bibliya na ‘iyan nanggad an ginibo’ ni Noe. (Genesis 6:22, NW) Gusto mo daw na sabihon man iyan ni Jehova manungod saimo?

12. Paano ta mapapaugma si Jehova?

¹² Ano an namamatian ni Jehova pag sinusunod ta siya? ‘Napapaugma ta an puso niya.’ (Talinhaga 11:20; 27:11) Isipa baya iyan! Napapaugma ta an Kaglalang kan uniberso pag sinusunod ta siya. Pero dai niya kita pinipirit. Kita an pinapapili niya kun ano an gusto tang gibuhon. Buot sabihon, nasa sato kun pipilion tang gibuhon an tama o an sala. Gusto ni Jehova na an pagkamuot ta sa saiya an magpahiro sa sato na gumibo nin marahay na mga desisyon para magkaigwa kita kan pinakamaugmang buhay.—Deuteronomio 30:15, 16, 19, 20; hilingon an Dagdag na Impormasyon 3.

13, 14. Taano ta masasabi ta na bako man dipisilon sunudon an mga pagbuot nin Diyos? Magtao nin halimbawa.

¹³ Paano kun iniisip mo na sobra kaistrikto o dipisilon sunudon an mga pagbuot ni Jehova? Malinaw an sinasabi kan Bibliya: “An saiyang mga tugon bakong magabat.” (1 Juan 5:3) An Griegong tataramon para sa “magabat” ginamit sa iba pang mga teksto bilang deskripsiyon sa bakong rasonableng mga patakaran o sa mga tawo na gustong kontrulon o pasakitan an iba. (Mateo 23:4; Gibo 20:29, 30) Arog kaini an pagkasabi diyan kan An Marahay na  Bareta Biblia: ‘An saiyang mga tugon bako man masakit na pag-utubon.’ Iyo, an mga pagbuot ni Jehova bakong “magabat,” o bakong masakit sunudon. Pirmi siyang rasonable sa mga ipinapagibo niya sa sato.

¹⁴ Halimbawa, isipon na tinatabangan mo an sarong amigo sa paglipat niya nin harong. Inimpake niya na sa mga kahon an gabos niyang gamit. An ibang kahon magian saka madaling darahon, pero an iba magabaton kaya kaipuhan na duwang tawo an mag-alsa. Ipapaalsa daw saimo nin solo kan amigo mo an sarong magabaton na kahon? Siyempre dai! Taano? Huling habo niyang mabarian ka. Arog kan amigong iyan, dai nuarin man ipapagibo sa sato ni Jehova an sarong bagay na dipisilon gibuhon. (Deuteronomio 30:11-14) Naiintindihan kita ni Jehova. “Aram niyang marhay kun paano kita hinaman, na ginigirumdom na kita alpog lang.”—Salmo 103:14, NW.

15. Taano ta makakasigurado kita na para sa ikakarahay ta an mga pagbuot ni Jehova?

¹⁵ Sinabi ni Moises sa nasyon nin Israel na an mga pagbuot ni Jehova para sa ‘ikakarahay ninda pirmi’ asin an pagsunod diyan makakatabang sa sainda na ‘padagos na mabuhay.’ (Deuteronomio 5:28-33; 6:24, NW) Totoo man iyan ngunyan. Para sa ikakarahay ta an ano man na ipinapagibo sa sato ni Jehova. (Basahon an Isaias 48:17.) Aram pirmi kan satong Ama, si Jehova, kun ano an pinakamarahay para sa sato. (Roma 11:33) Sinasabi sa sato kan Bibliya: “An Diyos pagkamuot.” (1 Juan 4:8) Buot sabihon, pagkamuot an dahilan kan gabos na sinasabi saka ginigibo ni Jehova.

16. Taano ta puwede kitang magin masinunod dawa pa bako kitang perpekto asin nabubuhay sa maraot na kinaban?

¹⁶ Bakong pirming pasil para sa sato na magsunod sa  Diyos. Nabubuhay kita sa maraot na kinaban na pinapamahalaan kan Diyablo. Iniimpluwensiyahan niya an mga tawo na gumibo nin sala. (1 Juan 5:19) Apuwera kaiyan, kaipuhan tang labanan an sato mismong bakong perpektong isip asin puso huling puwedeng magin dahilan iyan na suwayon ta an Diyos. (Roma 7:21-25) Pero an pagkamuot ta ki Jehova matabang sa sato na magin determinado na gibuhon an tama. Nahihiling niya an mga paghihinguwa ta na sunudon siya, saka tinatabangan niya kita paagi sa saiyang mapuwersang banal na espiritu. (1 Samuel 15:22, 23; Gibo 5:32) Tinatabangan kita kan banal na espiritu na magkaigwa nin mga kuwalidad na matabang sa sato para magin mas madali an pagsunod ta sa saiya.—Galacia 5:22, 23.

17, 18. (a) Ano an manunudan ta sa librong ini? (b) Ano an pag-uulayan ta sa sunod na kapitulo?

¹⁷ Sa librong ini, manunudan ta kun paano mamumuhay sa paaging nakakapaugma ki Jehova. Manunudan ta kun paano masusunod an saiyang mga prinsipyo asin pamantayan sa moral. Tandaan na dai kita nuarin man pinipirit ni Jehova na sunudon siya. Pero kun susunudon ta siya, magigin mas marahay an buhay ta saka magkakaigwa kita nin magayunon na puturo. An pinakamahalaga, ipinapahiling kan satong pagsunod sa Diyos na talagang namumutan ta siya.—Hilingon an Dagdag na Impormasyon 4.

¹⁸ Para tabangan kita na maaraman kun ano an tama asin sala, tinawan ni Jehova an lambang saro sa sato nin konsiyensiya. Kun sasanayon ta an satong konsiyensiya, matatabangan kita kaiyan na “utubon . . . an saiyang mga tugon.” Kaya, ano an konsiyensiya, asin paano ta iyan sasanayon? Aramon ta.