1, 2. Kun magkaproblema an mag-agom, nangangahulugan daw na napasala na sinda sa pag-agom? Ipaliwanag.

AN PAG-AGOM regalo hali ki Jehova. Puwedeng magin mas maugma an saro dahil diyan. Pero nagkakaproblema an gabos na mag-agom. Kun minsan ngani garo baga mayo nang katapusan an mga problema, asin puwedeng mamati kan mag-agom na bako na sindang harani sa kada saro arog kan dati.

² Dai dapat ipagngalas kan mga mag-agom kun magkaproblema sinda sa pana-panahon. Pero dai man buot sabihon na huling nagkaigwa sinda nin mga problema, napasala na sinda sa pag-agom. May mga mag-agom na nagkaigwa nin seryosong mga problema pero nakahanap nin paagi para maibalik an saindang relasyon asin mas nagkusog pa ngani an pag-ibanan ninda bilang mag-agom. Paano ninda iyan nagibo?

3, 4. Ano kun minsan an puwedeng mangyari sa relasyon nin mag-agom?

³ Pinagsasaro nin pag-aguman an duwang indibidwal na may kanya-kanyang gusto saka dai gusto, ideya, saka diskarte sa buhay. Posible man na an mag-agom bakong pareho an dinakulaan o kultura. Kaipuhan nin panahon saka paghihinguwa para mas mamidbid asin maintindihan kan mag-agom an kada saro.

 ⁴ Sa paglihis nin panahon, puwedeng magin mas mahalaga na sa mag-agom an kanya-kanya nindang mga gibuhon kaya napaparayo na sinda sa kada saro. Magkaibanan sinda sa sarong harong pero may kanya-kanya sindang buhay. Ano an makakatabang sa sainda para magin mas harani sa kada saro?

5. (a) Ano an makakatabang sa sarong Kristiyano na magin mas dayupot sa saiyang agom? (b) Base sa Hebreo 13:4, ano an dapat na magin kaisipan ta sa relasyon nin mag-agom?

⁵ Nagtatao si Jehova nin marahayon na mga sadol asin giya na makakatabang sa mga mag-agom na magin mas dayupot sa Saiya asin sa kada saro. (Salmo 25:4; Isaias 48:17, 18) Sinabi niya: “Magpahiling an gabos nin hararom na paggalang sa relasyon mag-agom.” (Hebreo 13:4) Pag hararom an paggalang mo sa sarong bagay, papahalagahan asin mamahalon mo iyan, iingatan saka dai mo babaliwalaon.  Arog kaiyan an gusto ni Jehova na magin kaisipan ta sa relasyon nin mag-agom.

6. Ano an sinasabi sa sato kan Mateo 19:4-6 may koneksiyon sa paghiling ni Jehova sa relasyon nin mag-agom?

⁶ Si Jehova an nagkasal sa inot na mag-agom. Sinabi kan aki niyang si Jesus: “Dai nindo nabasa na an saro na naglalang sa sainda sa kapinunan ginibo sindang lalaki asin babayi? Dai man nindo nabasa na sinabi niya: ‘Huli kaini babayaan nin lalaki an saiyang ama asin an saiyang ina saka magdadanay siyang kaibanan kan saiyang agom, asin an duwa magigin sarong laman’? Kaya sinda bako nang duwa, kundi sarong laman. Kun siring, an pinagsaro nin Diyos dai pagsuwayon nin siisay man na tawo.” (Mateo 19:4-6) Sa kapinunan pa sana, gusto ni Jehova na magin panghabangbuhay an relasyon nin mag-agom. Gusto niya na an mga pamilya magin dayupot sa lambang saro asin iribang mamuhay nin maugma.

7. Paano mapapakusog nin mga mag-agom an saindang relasyon?

⁷ Pero, mas dakul ngunyan nin inaagihan na stress saka problema an mga mag-agom. Kun minsan dahil sa sobrang gabat kan problema, iniisip kan iba na wara nang padumanan an relasyon ninda kaya minasuko na sinda. Pero makakatabang sa sato kun nasasabutan ta an paghiling ni Jehova sa relasyon nin mag-agom.—1 Juan 5:3.

8, 9. (a) Nuarin ta dapat sunudon an paggiya ni Jehova may koneksiyon sa relasyon nin mag-agom? (b) Paano ta maipapahiling na dakula an pagpapahalaga niyato sa relasyon ta sa satong agom?

⁸ An paggiya ni Jehova pirming para sa ikakarahay ta. Kaya ngani sinasabi niya sa sato: “Magpahiling . . . nin hararom na paggalang sa relasyon mag-agom.” (Hebreo 13:4; Parahulit 5:4) Kun susunudon ta an paggiya ni Jehova, dawa sa mga sitwasyon na dipisil iyan gibuhon,  siguradong makikinabang kita.—1 Tesalonica 1:3; Hebreo 6:10.   

⁹ Huling dakula an pagpapahalaga niyato sa relasyon ta sa satong agom, lilikayan ta na makagibo o makataram nin ano man na puwedeng makaraot diyan. Imbes, gusto niyatong pakusugon an relasyon ta sa satong agom. Paano ta iyan magigibo?

10, 11. (a) Ano an seryosong problema kan ibang mag-agom? (b) Taano ta mahalaga an paagi ta nin pakikipag-ulay sa satong agom?

¹⁰ Dakul an puwedeng magin dahilan na makulgan nin saro an saiyang agom. Aram ta na dai dapat kulgan kan mga Kristiyano an saindang mga agom sa pisikal na paagi. Pero, puwede kitang makakulog paagi sa satong mga sinasabi. An satong mga tataramon puwedeng makakulog asin makalugad. Sinabi nin sarong babayi: “Garo ako sinusuntok kan agom ko sa mga sinasabi niya. Mayo man akong mga latâ, pero garo may mga piklat sa puso ko dahil sa pagparataram niya sako nin makulog na mga tataramon arog nin ‘Pagabat ka!’ o ‘Daing serbi!’” Sarong agom na lalaki an nagsabi na pirmi siyang ipinapasupog kan agom niya saka kun ano-anong inaapod sa saiya. Sinabi niya: “Dai ko kayang iistorya sa mabuot na mga kairiba ko su mga pigpaparataram niya sako. Kaya habo kong nakikipag-ulay saiya saka iyan an dahilan kaya nagpapabanggi ako sa trabaho. Mas tuninong pa an isip ko duman kisa sa harong.” Ordinaryo na sana ngunyan an pagsabi nin mapang-insulto saka makulog na mga tataramon.

¹¹ Kun an mag-agom makulog magtaram sa kada saro, minaresulta iyan sa mga lugad sa puso na haloy mapila.  Malinaw na bakong arog kaiyan an gusto ni Jehova na magin pagtrato nin mag-agom sa kada saro. Pero posibleng makulgan mo an saimong agom na dai mo naririsa. Tibaad sa hiling mo mabuot ka sa saiya, pero iyan daw talaga an hiling niya saimo? Kun nakukulgan an agom mo sa sinasabi mo, handa ka daw na magbago?—Galacia 5:15; basahon an Efeso 4:31.

12. Ano an puwedeng makaapekto sa relasyon ki Jehova kan saro na may agom?

¹² Mahalaga ki Jehova an paagi niyato nin pagtaram sa satong agom, sa publiko man iyan o sa pribado. (Basahon an 1 Pedro 3:7.) Ipinapagirumdom sa sato kan Santiago 1:26: “Kun iniisip nin siisay man na tawo na siya sarong parasamba nin Diyos, alagad dai niya maingat na pinupugulan an  saiyang dila, dinadaya niya an sadiri niyang puso, asin sayang sana an saiyang pagsamba.”

13. Ano an saro pang paagi na puwedeng makulgan nin saro an saiyang agom?

¹³ May iba pang paagi para maipahiling kan mag-agom na mapagrisa sinda sa namamatian kan kada saro. Halimbawa, ano an mamamati kan agom mo kun mas dakul na panahon an itinatao mo sa ibang tawo? Dawa marahay man an intensiyon mo, arog kan pag nasa ministeryo ka o kun may inaasikasong problema, posible daw na maghinanakit an agom mo dahil diyan? Sinabi nin sarong Kristiyana: “Makulog sa buot pag nahihiling kong tinatawan ni agom nin dakul na panahon saka atensiyon an sarong sister sa kongregasyon. Pagmati ko nawawaran na ako nin halaga.”

14. (a) Anong panginot na katotoohan an manunudan niyato sa Genesis 2:24? (b) Ano an dapat na ihapot ta sa satong sadiri?

¹⁴ Bilang mga Kristiyano, may responsabilidad kita sa mga magurang ta asin sa mga tugang sa kongregasyon. Pero pag an saro may agom na, an agom niya na an saiyang panginot na responsabilidad. Sinabi ni Jehova na an agom na lalaki “magdadanay [na] kaibanan kan saiyang agom.” (Genesis 2:24, NW) Dapat na mahalagang marhay sa sato an namamatian kan satong agom. Haputon an saimong sadiri: ‘Itinatao ko daw sa agom ko an panahon, atensiyon, saka pagpadangat na kaipuhan niya saka dapat lang na itao ko saiya?’

15. Taano ta dai dapat magin dayupot na marhay an mga Kristiyanong may agom sa bako niyang agom?

¹⁵ Kun magigin dayupot kang marhay sa bako mong agom, madara iyan nin problema sa saindong relasyon. Posibleng mahulog an buot mo asin magkagusto ka sa tawong iyan. (Mateo 5:28) Puwedeng magrarom an pagmating iyan asin makagibo ka nin mga bagay na makakaraot sa relasyon nindong mag-agom.

16. Ano an pagbuot kan Bibliya manungod sa relasyon nin mag-agom?

¹⁶ Pagkatapos sabihon kan Bibliya na dapat kitang ‘magpahiling nin hararom na paggalang sa relasyon nin mag-agom,’ sinabi pa kaiyan: “Dai pagdigtaan an higdaan kan mag-agom, huli ta huhukuman nin Diyos an mga tawong imoral asin mga parasambay.” (Hebreo 13:4) An “higdaan kan mag-agom” nanunungod sa seksuwal na relasyon nin mag-agom. (Talinhaga 5:18) Paano niyato maipapahiling na iginagalang ta iyan asin dai ta dinidigtaan?

17. (a) Ano an paghiling ngunyan kan dakul manungod sa pagsambay? (b) Ano an dapat na paghiling kan mga Kristiyano manungod sa pagsambay?

¹⁷ Sa ngunyan, iniisip kan iba na mayo man maraot kun dai ka magin maimbod sa agom mo. Dai kita dapat magpaimpluwensiya sa arog kaiyan na kaisipan. Malinawon an sinabi ni Jehova na ikinakaanggot niya an seksuwal na imoralidad asin pagsambay. (Basahon an Roma 12:9; Hebreo 10:31; 12:29) Kun magkakaigwa ka nin seksuwal na relasyon sa bako mong agom, madidigtaan kaiyan an saindong relasyon. Ipinapahiling kaiyan na dai mo irinerespeto an mga pamantayan ni Jehova, asin makakaraot iyan sa relasyon mo sa saiya. Kaya dapat tang likayan dawa an inot pa sanang lakdang na puwedeng magresulta sa pagsambay. Kaiba diyan an pagpantasya sa bako tang agom.—Job 31:1.

18. (a) Taano ta masasabing arog nin pagsamba sa palsong mga diyos an pagsambay? (b) Ano an paghiling ni Jehova sa pagsambay?

¹⁸ Sa Katugunan ni Moises sa suanoy na Israel, an pagsambay seryosong kasalan arog nin pagsamba sa palsong mga diyos. Kagadanan an padusa sa mga iyan. (Levitico 20:2, 10) Taano ta masasabing arog nin pagsamba sa palsong mga diyos an pagsambay? Kun an sarong Israelita magsamba sa palsong mga diyos, dai niya inuutob an saiyang panuga na magigin maimbod siya ki Jehova. Kun magsambay  siya, dai niya inuutob an panuga niya na magigin maimbod siya sa saiyang agom. (Exodo 19:5, 6; Deuteronomio 5:9; basahon an Malaquias 2:14.) Malinaw na sarong seryosong marhay na kasalan kaidto para ki Jehova an pagsambay.

19. Ano an makakatabang sa sato na magin determinadong dai magsambay?

¹⁹ Kumusta man ngunyan? Bagaman dai na kita sakop kan Katugunan ni Moises, dai nagbago an paghiling ni Jehova sa pagsambay. Kun paanong dai kita nuarin man masamba sa sarong palsong diyos, dai man kita nuarin man dapat magtraydor sa satong agom. (Salmo 51:1, 4; Colosas 3:5) Kun gigibuhon ta iyan, dai niyato ipinapahiling an paggalang sa relasyon ta sa satong agom asin sa satong Diyos na si Jehova.—Hilingon an Dagdag na Impormasyon 26.

20. Paano an kadunungan makakatabang sa relasyon nin mag-agom?

²⁰ Paano mo mapapakusog an relasyon nindong mag-agom? Sinasabi kan Tataramon nin Diyos: “Paagi sa kadunungan napapasarig an harong, asin paagi sa pakasabot iyan napaparigon.” (Talinhaga 24:3, NW) An sarong harong puwedeng magin boring saka mamundo o puwede man iyan na magin maugma, komportable, saka tiwasay. Arog man kaiyan sa relasyon nin mag-agom. Sisiguraduhon nin sarong madunong na tawo na an relasyon nindang mag-agom magigin tiwasay, magayon, asin maugma.

21. Paano an kaaraman makakapakusog sa relasyon nin mag-agom?

²¹ May koneksiyon giraray sa harong, sinabi pa kan Bibliya: “Paagi sa kaaraman napapano an mga kuwarto kaiyan nin gabos na klase nin mamahalon asin magagayon na kayamanan.” (Talinhaga 24:4, NW) Makakatabang an mga nanunudan mo sa Tataramon nin Diyos para magin mas marahay an relasyon nindong mag-agom. (Roma 12:2;  Filipos 1:9) Pag binabasa nindong magkaibanan an Bibliya asin an satong mga publikasyon, pag-ulayan kun paano nindo maisasabuhay an saindong nanunudan. Maghanap nin mga paagi kun paano nindo maipapahiling sa kada saro an pagkamuot asin paggalang, pati man an kabuutan saka pagigin maasikaso. Hagadon ki Jehova na tabangan kang magkaigwa nin mga kuwalidad na makakatabang para kumusog an saindong relasyon asin tanganing lalo ka pang mamutan kan agom mo.—Talinhaga 15:16, 17; 1 Pedro 1:7.

22. Taano ta dapat na magpahiling kita nin pagkamuot, respeto, asin onra sa satong agom?

²² Dapat gibuhon nindong mag-agom an saindong pinakamakakaya para maipahiling na namumutan, irinerespeto, asin tinatawan nindo nin onra an kada saro. Paagi kaiyan, magigin mas maugma saka mas makusog an relasyon nindong mag-agom. Asin an pinakamahalaga, mapapaugma nindo si Jehova.—Salmo 147:11; Roma 12:10.