1, 2. (a) Kiisay na instruksiyon, o paggiya, an dapat niyatong sunudon? (b) Anong mga hapot an pag-uulayan niyato sa kapitulong ini?

KAN aki ka pa, tibaad may panahon na habo mong magsunod sa ipinapagibo saimo kan mga magurang mo. Namumutan mo sinda saka aram mong dapat kang magsunod sa sainda. Pero, tibaad habo mo sindang sunudon kun minsan.

² Aram ta na namumutan kita kan satong Ama na si Jehova. Inaataman niya kita asin sinisigurado na igwa kita kan gabos na kaipuhan ta para magin maugma. Tinatawan niya kita nin instruksiyon, o paggiya, na kaipuhan ta para maparahay kita. Kun minsan, may ginagamit siyang mga tawo para giyahan kita. Dapat niyatong igalang an awtoridad ni Jehova. (Talinhaga 24:21) Pero taano ta nadidipisilan kita kun minsan na akuon an paggiya? Taano ta hinahagad sa sato ni Jehova na magsunod sa mga instruksiyon? Asin paano ta maipapahiling na iginagalang ta an saiyang awtoridad?—Hilingon an Dagdag na Impormasyon 9.

3, 4. Taano ta bakong perpekto an mga tawo? Taano ta puwedeng magin dipisil sa sato na akuon an paggiya kan iba?

³ Bilang tawo, may tendensiya kitang magrebelde. Totoo ini puon pa kan magkasala an inot na lalaki asin babayi, si  Adan asin Eva. Dawa linalang sindang perpekto, nagrebelde sinda sa awtoridad nin Diyos. Kaya puon kaidto, an gabos na tawo ipinapangaki na bakong perpekto. Dahil sa satong pagkabakong perpekto, puwedeng magin dipisil sa sato na akuon an paggiya ni Jehova asin kan ibang tawo. Apuwera kaiyan, bako man perpekto an mga ginagamit ni Jehova para giyahan kita.—Genesis 2:15-17; 3:1-7; Salmo 51:5; Roma 5:12.

⁴ Dahil bako kitang perpekto, may tendensiya kita na magin mapalangkaw. Huli sa kapalangkawan, o pride, nagigin dipisil sa sato na akuon an itinataong paggiya. Halimbawa, kan panahon kan mga Israelita, pinili ni Jehova si Moises na magin lider kan Saiyang banwaan. Pero sarong lalaki na an pangaran Kora, na dakul na taon nang naglilingkod ki Jehova, an nagin mapalangkaw asin dai iginalang si Moises. Dawa ngani si Moises an nanginginot sa banwaan nin Diyos, bako siyang mapalangkaw. Sa katunayan, sinasabi kan Bibliya na siya an pinakamapakumbabang tawo na nabuhay kan panahon na idto. Pero habo ni Kora na magsunod ki Moises. Kinumbinsir pa ngani niya an dakul na magrebelde man ki Moises. Ano an nangyari ki Kora asin sa mga rebelde? Ginaradan sinda. (Bilang 12:3; 16:1-3, 31-35) Dakul nin mga halimbawa sa Bibliya na nagtutukdo sa sato na peligroso an kapalangkawan.—2 Cronica 26:16-21; hilingon an Dagdag na Impormasyon 10.

5. Paano inabuso kan nagkapira an saindang kapangyarihan?

⁵ May mga tawo na nakakagibo nin maraot huli sa posisyon o kapangyarihan. Sa bilog na kasaysayan, dakul na tawo an nag-abuso sa saindang kapangyarihan. (Basahon an Parahulit 8:9.) Halimbawa si Saul. Marahay saka mapakumbaba siya kan pilion siya ni Jehova na magin hadi kan Israel. Pero tinugutan niya na magtubo sa puso niya an kapalangkawan saka pagkauri, kaya pinersegir niya an inosenteng si David. (1 Samuel 9:20, 21; 10:20-22; 18:7-11)  Pag-abot nin panahon, nagin hadi si David, asin saro siya sa nagin pinakamatibay na naghadi sa Israel. Pero may pagkakataon na inabuso man ni David an saiyang kapangyarihan. Nagkaigwa siya nin seksuwal na relasyon ki Bat-seba, an agom ni Urias, asin pinurbaran pa niyang itago an saiyang kasalan paagi sa pagsugo ki Urias sa labanan para magadan ini.—2 Samuel 11:1-17.

6, 7. (a) Huling namumutan ta si Jehova, ano an ginigibo ta? (b) Ano an makakatabang sa sato na magin masinunod dawa sa mga pagkakataon na bako iyan madali?

⁶ Sinusunod ta an paggiya ni Jehova huling namumutan ta siya. Asin huling namumutan ta si Jehova nin urog kisa sa ano man o sa siisay man, gusto ta siyang mapaugma. (Basahon an Talinhaga 27:11; Marcos 12:29, 30.) Puon pa kan mag-istar sa hardin nin Eden an inot na mag-agom, gusto na ni Satanas na kuwestiyunon kan mga tawo an awtoridad ni Jehova. Gusto kan Diyablo na isipon tang mayo nin deretso si Jehova na sabihan kita kan dapat tang gibuhon. Pero aram tang bakong totoo iyan. Uyon kita sa mga tataramon na ini: “Angay ka, Jehova na samuyang Diyos, na mag-ako kan kamurawayan asin kan onra asin kan kapangyarihan, huli ta linalang mo an gabos na bagay.”—Kapahayagan 4:11.

⁷ Kan aki ka pa, tibaad tinukduan ka na magsunod sa mga magurang mo dawa pa habo mo. Sa kaagid na paagi, bilang mga lingkod ni Jehova, tibaad may mga pagkakataon na bakong madaling sumunod. Pero namumutan saka iginagalang ta si Jehova, kaya ginigibo niyato an satong pinakamakakaya na sunudon siya. Nagtao nin halimbawa sa sato si Jesus. Sinunod niya si Jehova dawa kan bako iyan madali o kumbenyente sa saiya. Iyan an dahilan kaya masasabi niya sa saiyang Ama: “Mangyari lugod, bako an  kabutan ko, kundi an kabutan mo.”—Lucas 22:42; hilingon an Dagdag na Impormasyon 11.

8. Sa anong mga paagi kita ginigiyahan ni Jehova? (Hilingon an kahon na “ Magdangog sa Sadol.”)

⁸ Ngunyan, ginigiyahan kita ni Jehova sa manlain-lain na paagi. Halimbawa, itinao niya sa sato an Bibliya. Itinao niya man an mga elder sa kongregasyon. Ipinapahiling ta na iginagalang niyato an awtoridad ni Jehova pag iginagalang ta an mga ginagamit niya para giyahan kita. Kun dai ta aakuon an saindang tabang, garo ta man sana kaiyan hinahabuan si Jehova. Kan an mga Israelita habong magsunod ki Moises, dai iyan basta sana binaliwala ni Jehova. Para saiya, garo man sana siya an dai ninda pigsunod.—Bilang 14:26, 27; hilingon an Dagdag na Impormasyon 12.

9. Paano kita mapapahiro kan pagkamuot na magsunod sa instruksiyon?

⁹ Pag iginagalang ta an awtoridad, ipinapahiling man kaiyan na namumutan niyato an satong mga tugang. Isipon ini: Pag may nangyaring kalamidad, an sarong rescue team nagtatarabangan para mas dakul an mailigtas sagkod na posible. Tanganing magin epektibo an team, dapat na may manginot sa pagtao nin mga instruksiyon asin kaipuhan na magsunod diyan an gabos na miyembro. Pero paano kun baliwalaon kan sarong miyembro an mga instruksiyon asin magsadiring diskarte man? Dawa pa marahay an saiyang intensiyon, an dai niya pagsunod sa instruksiyon puwedeng magkawsa nin mga problema sa mga ka-team niya o ikapahamak pa ngani ninda. Arog man kaiyan kun dai kita masunod sa instruksiyon, o paggiya, ni Jehova saka sa mga tinawan niya nin awtoridad. Puwedeng ikapahamak iyan kan iba. Pero kun nagsusunod kita ki Jehova, ipinapahiling ta na namumutan ta an satong mga tugang asin iginagalang ta an areglo ni Jehova.—1 Corinto 12:14, 25, 26.

10, 11. Ano an sunod tang pag-uulayan?

 ¹⁰ Para sa ikakarahay ta an ano man na ipinapagibo sa sato ni Jehova. Pag iginagalang ta an awtoridad sa pamilya, sa kongregasyon, asin mga opisyal nin gobyerno, makikinabang an gabos.—Deuteronomio 5:16; Roma 13:4; Efeso 6:2, 3; Hebreo 13:17.

¹¹ Makakatabang sa sato na igalang an awtoridad kun nasasabutan ta kun taano ta gusto ni Jehova na gibuhon ta iyan. Pag-ulayan ta nin mas detalyado kun paano ta maipapahiling an paggalang sa tulong aspekto kan satong buhay.

12. Paano maipapahiling kan agom na lalaki na iginagalang niya an awtoridad?

¹² Si Jehova an Kagpundar kan pamilya, asin tinawan niya nin papel an lambang miyembro kaiyan. Pag aram  kan kada miyembro kun ano an inaasahan ni Jehova sa saiya, magigin magayon an iribanan ninda saka makikinabang an bilog na pamilya. (1 Corinto 14:33) Itinao ni Jehova sa mga agom na lalaki an responsabilidad na magin payo kan pamilya. Buot sabihon, inaasahan ni Jehova na aatamanon saka mapagpadangat na gigiyahan niya an saiyang agom asin mga aki. Kaya maninimbag ki Jehova an agom na lalaki sa kun paano niya inaasikaso an saiyang pamilya. An sarong Kristiyanong agom na lalaki mabuot asin mapagpadangat, saka tinatrato niya an saiyang pamilya kapareho kan pagtrato ni Jesus sa kongregasyon. Pag ginigibo ini kan agom na lalaki, ipinapahiling niya na iginagalang niya si Jehova.—Efeso 5:23; hilingon an Dagdag na Impormasyon 13.

13. Paano maipapahiling kan agom na babayi na iginagalang niya an awtoridad?

¹³ Igwa man nin mahalaga asin may dignidad na papel  an Kristiyanong agom na babayi. Sinusuportaran niya an saiyang agom mantang pinagmamaigutan kaini na magin marahay na payo nin pamilya. Katabang kan saiyang agom, responsabilidad man niya na sanayon an saindang mga aki. Kun magalang siya, sarong paagi iyan nin pagtutukdo sa saiyang mga aki na magin magalang man. (Talinhaga 1:8) Iginagalang niya an saiyang agom na lalaki asin nakikipagtabangan sa mga desisyon kaini. Dawa pa dai siya uyon manungod sa sarong bagay, ipinapaliwanag niya iyan sa agom niya sa mabuot saka magalang na paagi. May ibang kadipisilan man pag bakong Saksi an agom nin sarong Kristiyana. Pero kun padagos niyang mamumutan saka irerespeto an saiyang agom, posibleng pag-abot nin panahon magkainteres na man an agom niya na mamidbid si Jehova asin sumamba sa Saiya.—Basahon an 1 Pedro 3:1.

14. Paano maipapahiling kan mga aki na iginagalang ninda an awtoridad?

¹⁴ Mahalagang marhay ki Jehova an mga aki, asin kaipuhan nindang marhay nin proteksiyon asin paggiya. Pag an mga aki nagsusunod sa mga magurang, napapaugma ninda an saindang mga magurang. An mas mahalaga, naipapahiling ninda na iginagalang ninda si Jehova saka napapaugma ninda siya. (Talinhaga 10:1) Sa dakul na pamilya, nagsosolong magurang an nagpapadakula sa mga aki. Puwede ining magin masakit para sa magurang saka sa mga aki. Pero kun masinunod an mga aki saka sinusuportaran ninda an saindang ina o ama, mas nagigin maugma an pamilya. Ano man an sitwasyon, mayong perpektong pamilya. Pero magigin mas maugma an pamilya kun susunudon kan kada miyembro an paggiya ni Jehova. Magtatao iyan nin kaumawan ki Jehova, an Kagpundar kan gabos na pamilya.—Efeso 3:14, 15.

15. Paano ta maipapahiling na iginagalang ta an awtoridad sa laog kan kongregasyon?

¹⁵ Ginagamit ni Jehova an Kristiyanong kongregasyon para giyahan kita, asin si Jesus an tinawan niya nin lubos na awtoridad diyan. (Colosas 1:18) Itinao man ni Jesus sa “maimbod asin mapagmansay na uripon” an responsabilidad na atamanon an mga lingkod nin Diyos digdi sa daga. (Mateo 24:45-47) Sa ngunyan, “an maimbod asin mapagmansay na uripon” iyo an Namamahalang Grupo. Itinatao sa sato kan Namamahalang Grupo an kaipuhan ta sa tamang panahon tanganing pirming magin makusog an satong pagtubod. Sa bilog na kinaban, an mga elder, mga ministeryal na lingkod, saka mga paraataman nin sirkito nagtatabang sa mga kongregasyon asin nakakaresibi nin giya saka mga instruksiyon hali sa Namamahalang Grupo. Tinawan sinda nin responsabilidad na pangatamanan kita. Maninimbag sinda ki Jehova sa kun paano ninda ginigibo an saindang responsabilidad. Kaya pag iginagalang ta an mga lalaking ini, iginagalang ta man si Jehova.—Basahon an 1 Tesalonica 5:12; Hebreo 13:17; hilingon an Dagdag na Impormasyon 14.

16. Taano ta masasabi ta na pignombrahan nin banal na espiritu an mga elder saka mga ministeryal na lingkod?

¹⁶ An mga elder saka mga ministeryal na lingkod an nagtatabang sa kongregasyon na pirming magin maimbod asin nagkakasararo. Siyempre, bako sindang mga perpekto arog ta. Kaya paano sinda pinipili? May mga kuwalipikasyon sa Bibliya na dapat maabot kan mga brother na ini. (1 Timoteo 3:1-7, 12; Tito 1:5-9) Ginamit ni Jehova an banal na espiritu tanganing tabangan an mga kagsurat kan Bibliya na isurat an mga kuwalipikasyon na iyan. Namimibi ki Jehova an mga elder na giyahan sinda kan banal na espiritu pag pinag-uulayan kun siisay an dapat nombrahan  bilang elder o ministeryal na lingkod. Kaya si Jehova asin si Jesus talaga an naggigiya sa mga kongregasyon. (Gibo 20:28) An mga lalaking pignombrahan para tabangan saka atamanon kita mga regalo hali sa Diyos.—Efeso 4:8.

17. Para ipahiling an paggalang, ano an kaipuhan na gibuhon nin sarong sister kun minsan?

¹⁷ May mga sitwasyon na mayo nin elder o ministeryal na lingkod na puwedeng maggibo kan mga asignasyon sa kongregasyon. Sa parati, puwedeng magtabang an ibang bawtisadong brother. Pero kun mayo talagang brother, puwedeng sarong sister an maggibo kan asignasyon na sa parati bawtisadong brother an naggigibo. Pero sa arog kaiyan na sitwasyon, kaipuhan na magkulbong an sister. Puwedeng maggamit siya nin scarf, kupya (o, kalo). (1 Corinto 11:3-10) Paagi kaiyan, ipinapahiling niya an paggalang sa areglo ni Jehova sa pagkapayo sa laog nin pamilya asin sa kongregasyon.—Hilingon an Dagdag na Impormasyon 15.

18, 19. (a) Ano an itinutukdo sa sato kan Roma 13:1-7? (b) Paano ta maipapahiling na iginagalang ta an mga opisyal nin gobyerno?

¹⁸ Sa ngunyan, itinutugot ni Jehova na magkaigwa nin awtoridad an mga gobyerno, kaya dapat ta sindang igalang. Pinapamahalaan ninda an mga nasyon saka mga komunidad tanganing magin areglado an mga bagay-bagay saka para magtao nin mga serbisyong kaipuhan kan mga tawo. Sinusunod kan mga Kristiyano an pagbuot na nasa Roma 13:1-7. (Basahon.) Iginagalang niyato an “haralangkaw na awtoridad” asin sinusunod an mga ley kan nasyon o komunidad kun sain kita nakaistar. An mga ley na ini puwedeng may epekto sa satong pamilya, negosyo, o mga pagsasadiri. Halimbawa, nagbabayad kita nin buhis saka itinatao ta an mga impormasyon na hinahagad kan gobyerno. Pero paano  kun ipagbuot kan gobyerno na gibuhon ta an sarong bagay na kontra sa pagbuot nin Diyos? Sinabi ni apostol Pedro: “An Diyos an dapat niyamong sunudon bilang tagapamahala imbes na an mga tawo.”—Gibo 5:28, 29.

¹⁹ Kun makikipag-ulay kita sa sarong opisyal nin gobyerno, arog nin huwes o pulis, dapat na pirmi kitang magin magalang. Iginagalang man kan Kristiyanong mga hoben an saindang mga maestra asin iba pang empleyado sa eskuwelahan. Sa trabaho, nagpapahiling man kita nin paggalang sa satong boss o amo maski pa dai iyan ginigibo kan ibang empleyado. Sa paggibo kaiyan, inaarog ta si apostol Pablo, na magalang sa mga opisyal dawa pa masakit iyan gibuhon kun minsan. (Gibo 26:2, 25) Saka dawa bakong marahay an pagtrato sa sato kan iba, magalang pa man giraray kita.—Basahon an Roma 12:17, 18; 1 Pedro 3:15.

20, 21. Ano an puwedeng magin marahay na mga resulta pag iginagalang ta an iba?

²⁰ Sa bilog na kinaban, nawawaran na nin paggalang an mga tawo. Pero bakong arog kaiyan an mga lingkod ni Jehova. Hinihinguwa ta na irespeto an gabos. Sinusunod ta an sinabi ni apostol Pedro: “Tawan nindo nin onra an gabos na klase nin tawo.” (1 Pedro 2:17) Kun may paggalang kita sa iba, maririsa ninda iyan. Sinabi ni Jesus: “Paliwanagon nindo an saindong ilaw sa atubangan nin mga tawo, tanganing mahiling ninda an marahay nindong mga gibo asin pamurawayon ninda an saindong Ama.”—Mateo 5:16.

²¹ Pag nagpapahiling kita nin paggalang sa laog kan satong pamilya, kan kongregasyon, asin sa iba pang aspekto kan satong buhay, puwede iyan makatabang sa iba na magin interesado na mabisto si Jehova. Asin pag iginagalang niyato an iba, iginagalang ta mismo si Jehova. Paagi kaiyan, napapaugma niyato siya asin naipapahiling tang namumutan ta siya.