PAGPUON NIN PAKIKIPAG-ULAY
LEKSIYON 5
Pagigin Magalang
Prinsipyo: “Pirmi lugod na magin mabuot an saindong pagtaram.”—Col. 4:6.
Kun Ano an Ginibo ni Pablo
1. Hilingon an VIDEO, o basahon an Gibo 17:22, 23. Dangan pag-isipan an minasunod na mga hapot:
-
Ano an namati ni Pablo sa nahiling niyang palsong relihiyosong mga gibo sa Atenas?—Hilingon an Gibo 17:16.
-
Imbes na husgaran an mga taga Atenas, paano ginamit ni Pablo sa magalang na paagi an saindang mga paniniwala sa paghiras kan maugmang bareta?
Ano an Manunudan Ta ki Pablo?
2. Mas posibleng magdangog sato an mga tawo kun maingat tang pipilion an satong mga sasabihon pati na kun paano asin kun nuarin ta iyan sasabihon.
Arugon si Pablo
3. Magpili nin angay na mga tataramon. Halimbawa, pag nakikipag-ulay sa saro na bakong Kristiyano, tibaad kaipuhan mong liwaton an paagi mo nin pag-introdusir kan Bibliya o an apod mo ki Jesus.
4. Dai tulos itanos an kaulay. Pabayaan siyang magsabi kan nasa buot niya. Kun may sinabi siya na bakong uyon sa sinasabi kan Bibliya, dai makipag-argumento. (Sant. 1:19) Paagi sa pagdangog sa saiya, magkakaigwa ka nin pakasabot kun taano ta arog kaiyan an paniniwala niya.—Tal. 20:5.
5. Kun angay, uyunan asin komendaran an kaulay. Tibaad sinsero siyang nagtutubod na tama an relihiyosong mga paniniwala niya. Maghanap nguna nin puntong mapagkakauyunan nindo, dangan luway-luway na siyang tabangan na masabutan an itinutukdo kan Bibliya.
