Itinao ni Jehova an daga sa mga tawo. Iyan an istaran niato. Kun siring, an enot na mag-agom, si Adan asin Eva, dai linalang tanganing mag-istar sa langit​—an Dios naglalang na nin mga anghel na maistar duman. (Job 38:4, 7) Imbes, ibinugtak nia an enot na tawo sa kawiliwiling paraiso na inaapod na hardin nin Eden. (Genesis 2:15-17) Tinawan sia ni Jehova asin an mga magikan sa saiya nin oportunidad na mabuhay nin daing katapusan digdi sa daga.​—Basahon an Salmo 37:29; 115:16.

 Sa kapoonpooni, an hardin nin Eden sana an paraiso. Kaipuhan kan enot na mag-agom na panoon nin aki ninda an daga. Pag-abot nin panahon, kaipuhan nindang sakopon an bilog na daga asin gibohon na paraiso. (Genesis 1:28) Dai noarin man malalaglag an daga. Iyan magdadanay na istaran nin katawohan.​—Basahon an Salmo 104:5.

 Hilingon an video na Taano ta Linalang nin Diyos an Daga?

 Nagsuway sa Dios si Adan asin Eva, kaya pinalayas nia sinda sa hardin. Nawara an paraiso, asin mayo nin tawo na ikinabalik iyan sa dati. An Biblia nagsasabi: ‘An daga itinao sa kamot kan tampalasan.’​—Job 9:24.—Basahon an Genesis 3:23, 24.

 Liningawan na daw ni Jehova an orihinal na katuyohan para sa katawohan? Dai! Sia makakamhan sa gabos. Dai sia masusudya. (Isaias 45:18) Ibabalik nia an katawohan sa kamugtakan na talagang gusto nia para sa sainda.​—Basahon an Salmo 37:11, 34.

 Ibabalik iyan digdi sa daga durante kan pamamahala ni Jesus bilang Hade nin Dios. Sa ralaban na inaapod na Armagedon, pangengenotan nia an mga anghel nin Dios asin popohoon an gabos na nagtutumang ki Jehova. Dangan, ibibilanggo  ni Jesus si Satanas sa laog nin 1,000 taon. Makakaligtas sa kalaglagan an mga lingkod nin Dios huling gigiyahan asin poprotektaran sinda ni Jesus. Mabubuhay sinda nin daing katapusan sa Paraiso digdi sa daga.​—Basahon an Kapahayagan 20:1-3; 21:3, 4.

 Noarin tataposon nin Dios an karatan sa daga? Si Jesus nagtao nin “tanda” na indikasyon na madali na an katapusan. Huli sa presenteng kamugtakan sa kinaban, namemeligro an buhay nin tawo asin ipinapahiling kaiyan na kita nabubuhay na sa “pagtatapos kan sistema nin mga bagay” (NW).​—Basahon an Mateo 24:3, 7-14, 21, 22.

 Durante kan 1,000 taon na pamamahala ni Jesus sa bilog na daga mantang nasa langit, tataposon nia an gabos na pagsakit. (Isaias 9:6, 7; 11:9) Apuera sa pagigin Hade, si Jesus maglilingkod bilang Halangkaw na Saserdote asin paparaon an mga kasalan kan mga namomoot sa Dios. Sa siring, paagi ki Jesus, hahaleon nin Dios an helang, paggurang, asin kagadanan.​—Basahon an Isaias 25:8; 33:24.

 An mga makinuyog sa Dios an maistar dian. (1 Juan 2:17) Isinugo ni Jesus an mga parasunod nia na hanapon an mga mahoyo asin tokdoan kun paano aakoon nin Dios. Ngonyan, minilyon an inaandam ni Jehova para sa buhay sa Paraiso digdi sa daga. (Sofonias 2:3) Sa mga Kingdom Hall of Jehovah’s Witnesses, nanonodan nin mga tawo na magin mas marahay na agom na lalaki asin babae saka mas marahay na ama asin ina. An mga aki saka magurang iribang nagsasamba asin nakakanood kun paano makikinabang sa maogmang bareta.​—Basahon an Miqueas 4:1-4.