PAKAKOMBERTIR ki Pablo, gustong-gusto niang ipahayag an maogmang bareta manongod sa Kahadean nin Dios​—kaya lang ngonyan an dating paratumang mismo na ini parateng napapaatubang sa grabeng pagtumang. An mayong kapagalan na apostol na ini nagkapirang beses na nagbiahe nin harayo tanganing ihulit an maogmang bareta manongod sa Kahadean na maotob kan orihinal na katuyohan nin Dios para sa katawohan.

Sa Listra, durante kan enot na biahe sa paghuhulit ni Pablo, pinaomayan nia an sarong lalaki na pilay poon pa sa pagkamundag. An mga tawo nagpoon na magkururahaw na si Pablo asin an kaiba nia sa pagbiahe na si Bernabe mga dios. Haros dai mapugolan kan duwang lalaking ini an mga tawo sa pagdolot nin mga atang sa sainda. Minsan siring, huling naimpluwensiahan kan mga kaiwal ni Pablo, dai nahaloy si Pablo ginapo kan mga tawo man sanang ini asin binayaan sa paghona na sia gadan na. Si Pablo nakaligtas sa pagsalakay na ini asin pag-abot nin panahon nagbalik sa siudad na iyan tanganing pakosogon an mga disipulo paagi sa mga tataramon na nakakaparigon sa boot.

May mga Kristianong Judio na nangatanosan na an nagturubod na bakong Judio kaipuhan na magsunod sa mga kabtang kan Ley ni Moises. Dinara ni Pablo an isyung ini sa mga apostol asin kamagurangan na lalaki sa Jerusalem. Pakatapos nin maingat na pagsiyasat sa Kasuratan asin paagi sa paggiya kan banal na espiritu nin Dios, an mga lalaking ini nagsurat sa mga kongregasyon asin sinadol sinda na lumikay sa idolatriya, sa pagkakan nin dugo asin karne na dai pinadugo, saka sa pakikisaro. An siring na mga pagboot “kinakaipuhan na mga bagay,” alagad an paghimate dian dai nangangaipo na sunodon an Ley ni Moises.​—Gibo 15:28, 29.

Sa ikaduwang biahe sa paghuhulit ni Pablo, nagsongko sia sa Berea, na ngonyan nasa presenteng panahon na Grecia. An mensahe maogmang inako kan mga Judio na nag-iistar duman, na sinisiyasat an Kasuratan aroaldaw kun baga tama an itinokdo nia. Sa giraray, napiritan siang humale huli sa pagtumang, ngonyan pasiring na sia sa Atenas. Sa atubangan nin mga may halangkaw na inadalan na taga Atenas, si Pablo nagtao nin mapuersang pahayag na arogan sa paggamit nin taktika, pakamansay, asin tibay sa pagpahayag.

Pakatapos nin ikatolong biahe sa paghuhulit, si Pablo nagduman sa Jerusalem. Kan magbisita sia sa templo duman, may mga Judio na nagpoon nin kariribokan, na gusto siang gadanon. An Romanong mga soldados nag-interbenir asin inusisa si Pablo. Bilang siudadano nin Roma, ginibo nia pakatapos kaini an saiyang pagdepensa sa atubangan kan Romanong Gobernador na si Felix. An mga Judio mayong ikataong ebidensia sa mga sahot ninda ki Pablo. Tanganing maolang ni Pablo si Festo, saro pang Romanong gobernador, na itao sia sa mga Judio, sia nagsabi: “Nag-aapelar ako ki Cesar!” Si Festo nagsimbag: “Ki Cesar ka maduman.”​—Gibo 25:11, 12.

Pakatapos kaiyan, si Pablo isinakay sa barko pasiring sa Italia tanganing bistahon. Huling nabagbag an barko durante kan paglayag na iyan, kinaipuhan siang magdanay sa isla nin Malta dahel sa tiglipot. Kan sa katapustapusi mag-abot sia sa Roma, nag-istar sia nin duwang taon sa arkiladong harong. Minsan ngani sia guardiado nin mga soldados, an pirmeng maigot na apostol na ini padagos na naghulit manongod sa Kahadean nin Dios sa gabos na nagbibisita sa saiya.

​—Basado sa Gibo 11:22–28:31.