MGA 350 taon na an nakaagi poon kan Baha kan panahon ni Noe. An patriarkang si Abraham nakaistar sa maoswag na siudad nin Ur sa lugar na inaapod ngonyan na Iraq. Si Abraham sarong tawo na may pambihirang pagtubod. Alagad ngonyan nabalo an saiyang pagtubod.

Sinabi ni Jehova ki Abraham na humale sa nasyon na namundagan nia asin bumalyo sa ibang daga, na iyo palan an Canaan. Si Abraham nagkuyog na daing pag-alangan. Iiniba nia an saiyang kasararo sa harong, kaiba an saiyang agom na si Sara, asin an saiyang sobrinong si Lot, dangan pakatapos kan halawig na pagbaklay sia nag-istar sa tolda sa Canaan. Sa ipinakipagtipan Nia ki Abraham, si Jehova nanuga na magibo Sia nin dakulang nasyon hale sa saiya, na an gabos na pamilya sa daga bebendisyonan paagi sa saiya, asin na an daga nin Canaan magigin sadiri kan mga magikan sa saiya.

Nag-oswag an buhay ni Abraham asin Lot, na nagkaigwa nin kadakol na aripompon nin mga karnero asin baka. Daing kaimotan na pinapili ni Abraham si Lot kun arin na lugar an gusto nia. Pinili ni Lot an matabang daga sa distrito kan Salog nin Jordan asin nag-erok harani sa siudad nin Sodoma. Minsan siring, an mga tawo sa Sodoma imoral​—na labi-labi an kasalan ki Jehova.

Pakalihis kaiyan, sinierto giraray ni Jehova Dios ki Abraham na an saiyang mga aki magigin arog kadakol kan mga bitoon sa langit. Nagtubod si Abraham sa panugang iyan. Pero, an namomotan na marhay na agom ni Abraham na si Sara nagdanay na daing aki. Dangan, kan si Abraham 99 anyos na asin si Sara madali nang mag-90, sinabi nin Dios ki Abraham na sia asin si Sara magkakaaki nin lalaki. Kaoyon kan sinabi nin Dios, ipinangaki ni Sara si Isaac. Si Abraham nagkaigwa nin iba pang mga aki, alagad ki Isaac magikan an Paraligtas na ipinanuga sa Eden.

Mientras tanto, si Lot asin an saiyang pamilya nakaistar sa Sodoma, alagad an matanos na si Lot dai nagin arog kan imoral na mga nag-iistar sa siudad na iyan. Kan magdesisyon si Jehova na hokoman an Sodoma, sia patienot na nagsugo nin mga anghel tanganing patanidan si Lot dapit sa nagdadangadang na paglaglag. Sinadol kan mga anghel si Lot asin an saiyang pamilya na dumulag sa Sodoma asin dai magsalingoy. Dangan, an Dios nagpaoran nin kalayo asin asupre sa Sodoma asin sa kaharaning maraot na siudad nin Gomorra, na luminaglag sa gabos na nag-iistar duman. Nakadulag si Lot asin an saiyang duwang aking babae. Alagad nagsalingoy an agom ni Lot, na tibaad nanghihinayang sa mga bagay na binayaan nia. Huli sa dai pagkuyog, sia nagadan.

​—Basado sa Genesis 11:10–19:38.