ANO an naiiba sa ritratong ini? Iyo, may mga tawo digdi. Sinda an inot na lalaki asin babayi. Si’say an naggibo sainda? An Diyos. Aram mo an pangaran niya? Jehova. An lalaki asin babayi inapod na Adan asin Eva.

Paano ginibo ni Jehova si Adan? Nagkua siya nin alpog * sa daga asin pinorma iyan na magin perpektong hawak nin lalaki. Dangan, hinayupan niya an dungo kan lalaki, kaya nabuhay si Adan.

Tinawan ni Jehova nin trabaho si Adan. Sinabi niya ki Adan na ngaranan an manlain-lain na klase nin hayop. Siguro, haloy man na pigmasdan ni Adan an mga hayop tanganing makapili siya kan pinakamagagayon na ngaran para sainda gabos. Mantang pigngangaranan ni Adan an mga hayop, may narisa siya. Aram mo kun ano?

An mga hayop gabos may kapadis. May mga elepanteng tatay asin elepanteng nanay, saka may mga tatay na leon asin nanay na leon. Pero si Adan mayo nin kapadis. Kaya pinaturog ni Jehova nin nanok si Adan, tapos kinua niya su sarong gusok sa lawas ni Adan. Hali sa gusok na ini, guminibo si Jehova nin babayi para ki Adan, asin ini an nagin agom niya.

Maugmahon na ngunyan si Adan! Siguradong ugmahon man si Eva na makaistar sa magayunon na hardin na idto! Puwede na sindang magkaigwa nin mga aki saka mabuhay nin maugma.

Gusto ni Jehova na mabuhay nin daing sagkod si Adan asin Eva. Gusto niyang pagayunon ninda an bilog na daga kapareho kan hardin nin Eden. Siguradong ugmahon si Adan asin Eva mantang pig-iisip ninda an trabahong ini! Gusto mo daw na tumabang sa paggibo sa daga na magin magayon na hardin? Pero dai nagpadagos an kaugmahan ni Adan asin Eva. Aramon ta kun ta’no.