SI Lot asin an pamilya niya kaiba ni Abraham na nag-istar sa Canaan. Sarong aldaw sinabi ni Abraham ki Lot: ‘Kulang na an daga digdi para sa mga hayop ta. Puwede daw na magsuwayan kita? Kun duman ka, digdi man ako sa ibong.’

Tinanaw ni Lot su daga sa palibot. May nahiling siyang maray-rahay na lugar na may tubig saka mahibog na awot * para sa mga hayop niya. Ini an Distrito kan Jordan. Kaya ibinalyo diyan ni Lot su pamilya asin mga hayop niya. Paghaloy-haloy nag-istar sinda sa siyudad nin Sodoma.

Marauton an mga taga Sodoma. Dai kaini naugma si Lot ta maray siyang tawo. Dai man naugma an Diyos. Kaya, nagsugo an Diyos nin duwang anghel para patanidan si Lot na paparaon Niya an Sodoma saka an kataid kaining siyudad na Gomora dahil maraot an mga tawo diyan.

Sinabihan kan mga anghel si Lot: ‘Dali! Kuanon mo an agom mo saka an duwang aki mong daraga. Dulag na!’ Dahil medyo maluway su paghiro ni Lot asin kan pamilya niya, kinabit sinda kan mga anghel asin naghihidaling ilinuwas sa siyudad. Tapos sinabi sainda kan sarong anghel: ‘Dalagan na! Dai kamo magkiling sa likod. Magtukad kamo sa kabubuldan, ’nganing dai kamo magadan.’

Nagkuyog si Lot asin an mga aki niya kaya nagdulag sinda parayo sa Sodoma. Dai sinda nagpundo, dai man sinda nagsalingoy. Pero dai nagkuyog an agom ni Lot. Kan huruharayo na sinda sa Sodoma, nagpundo ini saka nagkiling sa likod. Kaya nagin hariging asin an agom ni Lot. Nahihiling mo siya sa ritrato?

May manunudan kitang magayon na leksiyon digdi. Ipinapahiling kaini na iliniligtas ni Jehova an mga nagsusunod saiya, pero si mga habong magsunod saiya magagadan.