MUNDUON saka garo dai nang magigibo pa an solteritong ini. Siya si Jose. Ipinabakal siya kan mga tugang niya sa mga lalaking ini na pasiring sa Ehipto. Duman, magigin uripon si Jose. Ta’no ta ginibo kan mga tugang niya an marauton na bagay na ini? Dahil sa pagkauri.

Padabaon si Jose kan saindang ama na si Jacob. Nagpagibo siya nin magayon na halabang bado para ki Jose. Kan mahiling kan sampulo niyang matuang tugang kun gurano kapadangat ni Jacob si Jose, nauri asin naanggot sinda saiya. Pero, may saro pang rason kun ta’no ta naanggot sinda.

Duwang beses na nangaturugan si Jose na nagsubsob sa atubangan niya an saiyang mga tugang. Kan iistorya ini ni Jose sainda, lalo pa sindang naanggot.

Sarong aldaw, kan pigpapasturan kan mga tugang niya su mga karnero kan tatay ninda, sinugo ni Jacob si Jose ’nganing aramon an kamugtakan ninda. Kan mahiling kan mga tugang ni Jose na nagdadangadang siya, nagsabi an iba sainda: ‘Gadanon ta siya!’ Pero an pinakamatua na si Ruben nagsabi: ‘Dai nindo paggibuhon ’yan!’ Imbes, ginuyod ninda si Jose saka ihinulog sa marang bubon. Tapos, pinag-isipan ninda kun anong gigibuhon saiya.

Nagkataon man na may nag-aging mga lalaking Ismaelita. Sinabi ni Juda sa mga tugang niya: ‘Ipabakal ta siya sa mga Ismaelita.’ Kaya ipinabakal ninda si Jose sa halagang 20 pidaso nin pirak. Marauton sinda saka daing hirak!

Ano kayang sasabihon kan magturugang sa tatay ninda? Ginadan ninda an sarong kanding saka ibinuntog su bado ni Jose sa dugo kaini. Tapos dinara ninda su bado ki Jacob saka nagsabi: ‘Nakua mi ini. Hilinga po kun baga ki Jose ini.’

Nahiling ni Jacob na ki Jose man nanggad idto. ‘Ginadan gayod si Jose nin layas na hayop,’ an sabi niya na naghihibi. Talagang iyan an gusto kan mga tugang ni Jose na isipon ni Jacob. Grabe su pagmundo ni Jacob. Pirang aldaw siyang nagparahibi. Pero bako man gadan si Jose. Hilingon ta kun anong mangyayari saiya sa lugar na dinarahan saiya.