HILINGA si Josue. Pigsasabi niya: ‘Aldaw, magpundo ka!’ Kaya dai naghiro an aldaw sa laog nin dakul na oras. Dahil iyan sa kapangyarihan ni Jehova! Pero hilingon ta kun ta’no ta habo ni Josue na magsulnop an aldaw.

Kan salakayon an Gibeon kan limang maraot na hadi sa Canaan, nagsugo an mga Gibeonita nin sarong lalaki para maghagad nin tabang ki Josue. ‘Dali, magduman kamo samo!’ an sabi niya. ‘Iligtas nindo kami! An gabos na hadi sa kabubuludan nag-arabot ’nganing giyerahon kami.’

Nagduman tulos si Josue asin an mga suldados niya. Bilog na banggi sindang nagbaklay. Pag-abot ninda sa Gibeon, an mga suldados kan limang hadi nagkatarakot asin nagdurulag. Dangan nagpauran si Jehova nin darakulang tipak nin yelo. Mas dakul na kalaban an nagkagaradan dahil diyan kisa sa nagadan kan mga suldados ni Josue.

Nahihiling ni Josue na madali nang magsulnop an aldaw. Padiklom na asin dakul sa mga suldados kan limang maraot na hadi an makakadulag. Kaya namibi si Josue ki Jehova asin nagsabi: ‘Aldaw, magpundo ka!’ Padagos na nagliwanag an aldaw, kaya lubos na nanggana an mga Israelita sa ralaban.

Dakul pang maraot na hadi sa Canaan an anggot sa banwaan nin Diyos. Inabot nin mga anom na taon bago nadaog ni Josue asin kan hukbo niya an 31 hadi sa Canaan. Pagkatapos kaini, pinagbaranga ni Josue an Canaan para sa mga tribong mayo pang sadiring daga.

Pakalihis nin dakul na taon, nagadan si Josue sa edad na 110. Kan buhay pa siya asin an mga amigo niya, an banwaan padagos na naglingkod ki Jehova. Pero kan magkagaradan an maray na mga tawong ini, an banwaan nagpuon na maggibo nin maraot asin magkaproblema. Mas kaipuhan ninda ngunyan an tabang nin Diyos.