TA’NO ta nagkakagaraba an mga lanob na ini kan Jerico? Garo iyan binagsakan nin makusog na bomba. Pero mayo man kaidto nin bomba; maski badil wara. Milagro na naman ini ni Jehova! Hilingon ta kun paano ini nangyari.

Arog kaini an sinabi ni Jehova ki Josue: ‘Magmartsa kamo kan mga suldados mo sa palibot kan siyudad. Libuton nindo iyan nin sarong beses kada aldaw sa laog nin anom na aldaw. Darahon nindo an kaban kan tipan. Pitong saserdote an malakaw sa inutan kaiyan mantang pigpapatanog an mga hamudyong.

‘Sa ikapitong aldaw, pitong beses kamong magmartsa sa palibot kan siyudad. Dangan patanugon nindo nin makusog an mga hamudyong, asin magkurahaw kamo nin makusugon. Mabagsak an lanob kan siyudad!’

Ginibo ni Josue asin kan banwaan an sinabi ni Jehova. Mantang nagmamartsa, gabos sinda daing girong-girong. An nadadangog sana iyo an tanog kan mga hamudyong asin bitis. Siguradong takuton an mga kaiwal kan Israel sa Jerico. Nahihiling mo an pulang pisi sa bintana? Ki’say na bintana iyan? Iyo, ginibo ni Rahab su sinabi saiya kan mga espiya. Kairiba niya an bilog niyang pamilya.

Kan ikapitong aldaw, pagkatapos magmartsa nin pitong beses sa palibot kan siyudad, pinatanog an mga hamudyong, nagkurahaw an mga suldados, asin nagaba an mga lanob. Sinabi ni Josue: ‘Gadanon an gabos sa siyudad asin suluon an gabos na bagay diyan, apuwera sa plata, bulawan, tanso asin lansang. * Darahon iyan sa kaban nin yaman sa tabernakulo ni Jehova.’

Sinabi ni Josue sa duwang espiya: ‘Iluwas nindo sa harong si Rahab pati an bilog niyang pamilya.’ Nakaligtas sinda, arog kan ipinangako kan mga espiya ki Rahab.