HILINGA! Nag-iibong sa Salog nin Jordan an mga Israelita! Pero hain su tubig? Pirang minuto pa sana an nakaagi, pano-pano nin tubig an salog dahil mauranon kan panahon na iyan. Pero ngunyan, mayo nang katubig-tubig! Nagraralakaw an mga Israelita sa marang daga arog kan sa Dagat na Pula! Napasain daw su tubig? Hilingon ta.

Kan an mga Israelita mabalyo na sa Salog nin Jordan, ini an sinabi ni Jehova na itaram ni Josue sa banwaan: ‘Dapat na darahon kan mga saserdote an kaban kan tipan asin mainot sinda sato. Pagtungtong ninda sa tubig kan salog, mapundo an bulos kaini.’

Kaya inalsa kan mga saserdote an kaban kan tipan asin nainot sinda. Pag-abot ninda sa salog, durudiretso sinda sa tubig. Hararumon iyan asin makusugon an sulog. Pero pagtungtong nanggad ninda sa tubig, biglang nagpundo an bulos kaiyan! Sarong milagro! Pinugulan ni Jehova an bulos kan tubig sa may inutan kan salog. Dai nahaloy, nawara na su tubig sa salog!

An mga saserdoteng nagpapasan kan kaban kan tipan nagtindog sa tahaw kan naghubas na salog. Nahihiling mo sinda sa ritrato? Mantang yaon sinda diyan, an gabos na Israelita nagralakaw sa marang daga paibong sa Salog nin Jordan.

Kan makaibong na an gabos, sinabi ni Jehova ki Josue na magsugo nin 12 makukusog na lalaki asin padumanon sinda sa pigtitindugan kan mga saserdote. Sinabi ni Josue sa mga lalaki: ‘Magkua kamo nin 12 gapo asin pagpatong-patungon nindo iyan sa kampo. Pag-abot nin panahon, kun maghapot an mga aki nindo kun ano an kahulugan kan mga gapong ini, dapat nindong sabihon sainda na nagpundo an bulos nin tubig kan mag-agi sa Jordan an kaban kan tipan ni Jehova. An mga gapo mapagirumdom saindo kan milagrong ini!’ Nagbugtak man si Josue nin 12 gapo sa pigtitindugan kan mga saserdote.

Pagkatapos, sinabi ni Josue sa mga saserdoteng nagpapasan kan kaban kan tipan: ‘Maghali na kamo sa Jordan.’ Pagkahali tulos ninda, nagbulos na giraray an tubig sa salog.