ARAM mo kun ano ining nasa ritrato? Saro ining espesyal na tolda para sa pagsamba ki Jehova. Inaapod ining tabernakulo. Natapos kan mga Israelita an paggibo kaiyan sarong taon pagkahali ninda sa Ehipto. Aram mo kun si’say an nagpagibo kaiyan? Si Jehova.

Kan si Moises nasa bukid nin Sinai, sinabi saiya ni Jehova kun paano iyan gigibuhon. Dapat na turutangkas sana an mga parte kaiyan ’nganing pasil darahon asin itindog giraray sa ibang lugar. Kaya, dara-dara kan mga Israelita an tolda sa pagburubalyo ninda nin lugar sa kaawagan.

Sa laog kan sadit na kuwarto sa puro kan tolda, may mahihiling kang kahon. Inaapod ining kaban kan tipan. Sa mag-ibong na puro kaiyan, igwa nin duwang anghel o kerubin na gibo sa bulawan. Isinurat giraray nin Diyos an Sampulong Tugon sa duwang tablang gapo, dahil napasâ ni Moises su inot. An mga gapong ini isinaray sa kaban kan tipan. Isinaray man sa kaban an sarong dulay na may laog na manna. Nagigirumduman mo kun ano an manna?

An tugang ni Moises na si Aaron an pinili ni Jehova na magin halangkaw na saserdote. Siya an nanginginot sa banwaan sa pagsamba ki Jehova. An mga aki niyang lalaki mga saserdote man.

Hilinga an mas dakulang kuwarto kan tolda. Doble an hiwas kaiyan kisa sa sadit na kuwarto. Igwa diyan nin sadit na kahon na may nag-iitaas na aso. Nahihiling mo iyan? Iyan an altar kun sain pigtututong kan mga saserdote an mahamot na sangkap na inaapod na insenso. Yaon man diyan an kandelero na may pitong ilawan, asin an sarong lamesa na pigbubugtakan nin 12 tinapay.

Sa luwas kan tabernakulo, yaon an sarong dakulang palanggana na pano nin tubig. Ginagamit iyan nin mga saserdote sa paghanaw. Yaon man an dakulang altar. Diyan pigtututong an gadan na mga hayop bilang dulot ki Jehova. An tabernakulo nasa tahaw kan kampo, asin sa palibot kaiyan nakaistar an mga Israelita sa mga tolda ninda.